استانا قالاسىنىڭ تۇرعىندارى مەن قوناقتارى بيىل قىستا ءتورت مۇز قالاشىعىن قىزىقتاي الادى, دەپ حابارلادى استانا قالاسى اكىمدىگىنىڭ مادەنيەت باسقارماسى.
قالاداعى مۇز قالاشىقتارىنىڭ قۇرىلىسى قارقىندى ءجۇرىپ جاتىر. مۇز قالاشىق ەلىمىزدىڭ باس شىرشاسى جاعىلعان 18 جەلتوقساننان باستاپ اشىلادى.
قالالىق مادەنيەت باسقارماسىنىڭ حابارلاۋىنشا, بيىل مۇز قالاشىقتار «حان شاتىر» ويىن-ساۋىق ورتالىعىنىڭ جانىندا, قالالىق اكىمدىك جانىنداعى الاڭدا, ەسىل وزەنىنىڭ جاعالاۋىندا, «ستۋدەنتتەر» پاركىنىڭ جانىندا ورنالاسپاق.
«بىلتىرعى تاجىريبەگە سۇيەنەك, قالا حالقى مۇز قالاشىقتارعا وتە كوپ بارعان. سوندىقتان, بيىل دا مەرەكە كۇندەرى مەن دەمالىس كەزىندە حالىققا ارناپ ءار ءتۇرلى كوڭىل كوتەرۋ باعدارلامالارىن, فلەشموبتار مەن جارىستار ۇيىمداستىرماقپىز. بۇل شارالاردىڭ ماقساتى – ەلوردا حالقىنىڭ دەمالىسىن كوڭىلدى ەتۋ ءارى سالاۋاتتى ءومىر سالتىن قالىپتاستىرۋ», – دەيدى مادەنيەت باسقارماسىنىڭ ءباسپاسوز قىزمەتى.
بيىل استانادا جاڭا جىل مەرەكەسىنە ارنالعان باس شىرشا تاۋەلسىزدىك كۇنىنەن كەيىن, 18 جەلتوقساندا «حان شاتىر» ويىن-ساۋىق ورتالىعىنىڭ جانىندا جاعىلادى. جىل سايىن شىرشا 1 جەلتوقسان كۇنى ەلباسى نۇرسۇلتان نازارباەۆتىڭ قاتىسۋىمەن جاناتىن. بيىل تاۋەلسىزدىكتىڭ 25 جىلدىعىنا وراي, قالا الدىمەن تاۋەلسىزدىك مەرەكەسىنە دايىندالىپ جاتىر.
ەلوردادا جاڭا جىل مەرەكەسىنە وراي بارلىعى 17 شىرشا ورناتىلادى. ءبىر عانا ەسىل اۋدانى مەن ۇركەر, قالاماڭى تۇرعىن القاپتارىندا 10 شىرشا ورناتۋ جوسپارلانعان. بيىلعى جاڭاجىلدىق بەزەندىرۋدىڭ باستى نىشانى - تاۋىق قانا ەمەس, ەلىمىزدىڭ باستى وقيعاسى - ەكسپو كورمەسى دە بولادى.
ايتا كەتەيىك, استانادا اشىق اسپان استىنداعى ەڭ ۇلكەن مۇز ايدىنى «اراي» ساياباعىندا سالىنىپ جاتىر. 250 ادامعا ارنالعان مۇز ايدىنىنىڭ جالپى اۋماعى - 5 مىڭ شارشى مەتر.
