تاۋەلسىزدىكتىڭ 25 جىلدىعىنا وراي 21 مىڭ ماڭعىستاۋلىق سىياقى الادى

ەل تاۋەلسىزدىگىنىڭ 25 جىلدىعىنا وراي ماڭعىستاۋ وبلىسىنىڭ بارلىق ساناتتاعى مۇگەدەكتەرىنە بەس اەك (10 605 تەڭگە) تولەنەدى.  دال وسى ماقساتتا بيۋدجەتتەن 230 ميلليون تەڭگە ءبولۋ قاراستىرىلعان. بۇل تۋرالى ماڭعىستاۋ وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلميرا قالمۇراتوۆا حابارلادى, دەپ جازادى lada.kz.

ماڭعىستاۋ وبلىسىندا 21 مىڭنان استام بارلىق ساناتتاعى مۇگەدەكتەر تولەماقىعا يە بولادى. «ەكىنشى دەڭگەيلى بانكتەردىڭ كارتا-شوتتارىنا اقشا اۋدارۋ باستالدى. كومەك الاتىنداردىڭ قاتارىندا رەسپۋبليكالىق جانە وبلىستىق ماڭىزى بار زەينەتكەرلەر, ۇوس ارداگەرلەرى جانە مۇگەدەك ينتەرناتسيوناليست-جاۋىنگەرلەر دە بار», – دەدى گ.قالمۇراتوۆا. ماڭعىستاۋ وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تاۋەلسىزدىك مەرەكەسى قارساڭىندا وبلىستا بەرىلەتىن تولەمنىڭ ازدىعىنا قاراماستان, ءبىر رەتتىك كومەكتىڭ جىل سايىن بەس مەرەكەگە وراي تۇراقتى بەرىلىپ كەلە جاتقانىن اتاپ ءوتتى. «تولەماقى مولشەرى اۋداندار مەن قالالاردا بىردەي, 2017 جىلعا دا بەكىتىلگەن. بيۋدجەتتە قوسىمشا ماتەريالدىق كومەك ءۇشىن ءبىر جارىم ميلليارد تەڭگە قاراستىرىلعان. بۇل قارجى الەۋمەتتىك پاكەتتى قۇرايدى جانە بۇل قاراجات مۇقتاج جاندارعا كومەك بولادى دەپ ۇمىتتەنەمىز», – دەدى گ.قالمۇراتوۆا.