ەرتىس ۇستىندەگى كوپىر ىسكە قوسىلدى

كەشە ەل تاۋەلسىزدىگىنىڭ 25 جىل­دى­عى مەرەكەسىنە وراي ەلىمىزدەگى ءىرى جوبالاردىڭ ءبىرى – ەرتىس وزەنى ارقىلى وتەتىن الىپ كوپىر ىسكە قوسىلدى. كوپىر قۇرىلىسى ەلباسى تاپسىرماسى بويىنشا باستالعان بولاتىن. ەندى «ورتالىق-شىعىس» كولىك ءدالىزى «نۇرلى جول» باعدارلاماسىنىڭ بولشەگىنە اينالىپ وتىر. «قازاۆتوجول» اق وكىلدەرىنىڭ ايتۋلارىنشا, بۇل اركالى, اسەم دە ەرەكشە الىپ كوپىر زاماناۋي جاڭا تەحنولوگيا­لار بويىنشا ۆانت تۇرىندەگى كولبەۋ يىلگىش ىلمەكتەردى قولدانۋ ارقىلى سالىندى. كوپىردى سالۋدا ەلىمىزدە تۇڭعىش رەت ورتالىق اركانى ارنايى گيدراۆليكالىق جۇيە جانە «Heavy Lifting» دومكراتتارىنىڭ كومەگىمەن كوتەرۋ تەحنولوگياسى قولدانىلدى. كوپىردىڭ جالپى ۇزىندىعى 12,3 شاقىرىم. ەستاكادا بولىگى 66 تىرەكتەن تۇرادى, ولارعا تەمىر-بەتون ارقالىقتاردان تۇراتىن قۇرىلعىلار ورناتىلعان. كولىكتەر جۇرەتىن بولىگى ءتورت جولاقتان تۇرادى, وتكىزۋ قابىلەتى – تاۋلىگىنە 10 مىڭ اۆتوموبيل. جاڭا كوپىر ترانزيتتىك كولىكتىڭ جول ۇزاقتىعىن 40 كم-گە قىسقارتىپ, ۋاقىت ۇنەمدەۋگە مۇمكىندىك بەرەدى. الىپ قۇرىلىسقا 1800 ادام, 700 تەحنيكا بىرلىگى, 6 سۋدا ءجۇزۋ قۇرالدارى جۇمىس جاسادى. سونىمەن قاتار, وبلىستاعى كولىك قىزمەتى, قوعامدىق تاماقتانۋ جانە باسقا قىزمەت كورسەتەتىن 100-گە جۋىق شاعىن جانە ورتا بيزنەس كاسىپ­ورىندارى تارتىلدى. نىساننىڭ قۇرى­لىسىنا جەرگىلىكتى جانە قازاقستاندىق قۇرىلىس ماتەريالدارى: قيىرشىق تاس, تسەمەنت, تەمىر-بەتون بۇيىمدارى جانە باسقا ماتەريالدار پايدالانىلدى. كوپىردەگى قۇرىلىس جۇمىستارىنا جەر­گىلىكتى تۇرعىندار تارتىلدى. جاڭا كوپىردىڭ ىسكە قوسىلۋمەن تاعى دا ءبىر ەرەكشە جول ايىرىعى پايدا بولىپ, ول ەلىمىزدىڭ ورتالىق بولىگىن رەسەيدىڭ كورشىلەس وڭىرلەرىمەن بايلانىستىرادى. كوپىردىڭ اشىلۋ سالتاناتىنا ينۆەستيتسيالار جانە دامۋ مي­نيسترلىگى اۆتوموبيل جولدارى كو­ميتەتىنىڭ توراعاسى مەرەكە پشەن­باەۆ, «قاز­اۆتوجول»ۇك» اق باس­قارما توراعاسى ەرمەك قيزاتوۆ, ەنەر­گەتيكا ءمينيسترى قانات بوزىمباەۆ, وبلىس اكىمى بولات باقاۋوۆ, ءوڭىر جۇرت­شىلىعى قاتىستى. مەرەكەلىك سالتانات كۇنى كوپىردىڭ ۇستىمەن ەلىمىزدە شىعارىلاتىن ەلەكتروموبيلدەر مەن اۆتوموبيلدەر, كوممەرتسيالىق تەحنيكالار ساپ تۇزەپ ءجۇرىپ ءوتتى. فاريدا بىقاي, «ەگەمەن قازاقستان» پاۆلودار وبلىسى