مەدالدار تاپسىرىلدى

الماتىداعى «دوستىق» ۇيىندە قازاقستان تاۋەلسىزدىگى مەرەكەسى قۇرمەتىنە وراي قازاقستان حالقى اسسامبلەياسىنىڭ مۇشەلەرى مەن وسىنداعى ەتنومادەني بىرلەستىكتەر وكىلدەرى, شىعارماشىل جانە عىلىمي زيالى قاۋىم وكىلدەرى ماراپاتتالدى. قازاقستان رەسپۋبليكاسى مەملەكەتتىلىگىنىڭ قالىپتاسۋىنا, ەگەمەندىگىنىڭ نىعايۋى مەن الەۋمەتتىك-ەكونوميكالىق دامۋىنا قوسقان ۇلەسى ءۇشىن حالىقارالىق «قازاق ءتىلى» قوعامدىق بىرلەستىگىنىڭ پرەزيدەنتى ومىرزاق ايتباي ۇلى, «ۆايناح» چەشەن جانە ينگۋش حالىقتارىنىڭ مادەنيەتىن دامىتۋ قاۋىمداستىعى» قوعامدىق بىرلەستىگىنىڭ تەڭ توراعاسى سۇلتان وزدوەۆ, قازاقستان حالقى اسسامبلەياسى عىلىمي-ساراپشىلىق كەڭەسىنىڭ مۇشەسى دوس كوشىم جانە باسقا دا, بارلىعى 30 ادام «قازاقستان رەسپۋبليكاسى تاۋەلسىزدىگىنە – 25 جىل» مەرەيتويلىق مەدالىن كەۋدەسىنە تاقتى. قازاقستان حالقى اسسامبلەياسى كەڭەسىنىڭ شەشىمىمەن ءبىر توپ ازاماتقا قازاقستان رەسپۋبليكاسى تاۋەلسىزدىگى مەن ەل بىرلىگىن نىعايتۋعا, مادەنيەتارالىق قارىم-قاتىناستى دامىتۋعا, قازاقستاندىق ءپاتريوتيزمدى قالىپتاستىرۋعا قوسقان ەلەۋلى ۇلەسى ءۇشىن «قازاقستان حالقى اسسامبلەياسىنىڭ «بىرلىك» التىن مەدالى» قوعامدىق مەدالى تاپسىرىلدى. ماراپاتقا يە بولعان قازاقستان حالقى اسسامبلەياسىنىڭ مۇشەلەرى مەن وسىنداعى ەتنومادەني بىرلەستىكتەر وكىلدەرىنىڭ اراسىندا بەلگىلى ساياساتكەر, قوعام قايراتكەرى ايدوس سارىم, تەمىرجولشى ايجان وسپانوۆا, تەلەۆيزيا قىزمەتكەرلەرى ەرجان قاراق, دانا باقتىعاليەۆا جانە باسقالار بار. قازاقستان رەسپۋبليكاسىنىڭ پرەزيدەنتى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ قول قويعان ناگرادالاردى ماراپات يەلەرىنە قحا توراعاسىنىڭ ورىنباسارى ەرالى توعجانوۆ تابىس ەتتى. ءىس-شاراعا قالالىق ءماسليحات دەپۋتاتتارى, قحا مۇشەلەرى, مەملەكەتتىك ورگانداردىڭ, ەتنومادەني بىرلەستىكتەردىڭ وكىلدەرى, قوعام قايراتكەرلەرى, عىلىمي جانە شىعارماشىل زيالى قاۋىم وكىلدەرى قاتىستى. تالعات ءسۇيىنباي, «ەگەمەن قازاقستان» الماتى