بۇل جونىندە ەلباسى نۇرسۇلتان نازارباەۆ: «جاسامپازدىقتىڭ جاڭىلماس جارعىسى بولعان كونستيتۋتسيا ءبىزدىڭ بارشا جارقىن ىستەرىمىزدىڭ قاينار باستاۋىنا اينالدى. قاستەرلى قۇندىلىعىمىزدىڭ قاعيداتتارىن بۇلجىتپاي ورىنداۋدىڭ ناتيجەسىندە ءبىز قىسقا مەرزىمدە مىزعىماس مەملەكەتتىگىمىزدى ورناتىپ, تاۋەلسىزدىگىمىزدى تۇعىرلى ەتىك. اتا زاڭ تاۋەلسىزدىگىمىز بەن تۇتاستىعىمىزدىڭ كەپىلى رەتىندە ءبىزدىڭ بىرلىگىمىزدى بەكەمدەپ, ەلدەگى تۇراقتىلىق پەن تاتۋلىقتىڭ بەرىك تۇتقاسى بولدى», دەپ اتاپ وتۋىندە تەرەڭ ءمان-ماعىنا جاتىر. «مەملەكەتتىك بيلىكتىڭ بىردەن-ءبىر باستاۋى – حالىق» (3-باپ) بولىپ تابىلاتىندىعى ەشقانداي تالاس تۋدىرمايتىن اقيقات. ەلىمىزدە وتكىزىلىپ جاتقان ءادىل دە ەركىن سايلاۋلار مەن رەفەرەندۋمدار وسىنىڭ بىردەن-ءبىر كەپىلى.
بۇل ورايدا جاقىندا عانا بولىپ وتكەن پارلامەنت سەناتىنىڭ سايلاۋىندا دا وسى تۇجىرىمنىڭ ومىرشەڭدىگىنە كوز جەتتى. ولاي بولسا حالىقتى ۇلىقتاۋ, ولاردىڭ ماقسات-مۇددەسىمەن ساناسۋ نەگىزگى زاڭىمىزدىڭ وزەگى بولىپ تابىلادى. اتا زاڭدا مەملەكەتتىڭ ۇلتتىق قاۋىپسىزدىگىن قامتاماسىز ەتۋ ماسەلەلەرى دە كەڭىنەن تۇجىرىمدالعان. بۇل ورايدا ۇلتتىق قاۋىپسىزدىگىمىزدى قامتاماسىز ەتۋدىڭ كەشەندى جۇيەسىنە كىرەتىن ۇقك اتقاراتىن مىندەتتەرى مەن جاۋاپكەرشىلىگىنىڭ ارتا تۇسەتىندىگى انىق.
اتا-بابامىز اڭساپ وتكەن تاۋەلسىزدىكتىڭ نەگىزگى قاعيدالارى: «رەسپۋبليكانىڭ ەگەمەندىگى ونىڭ بۇكىل اۋماعىن قامتيدى. مەملەكەت ءوز اۋماعىنىڭ تۇتاستىعىن, قول سۇعىلماۋىن جانە بولىنبەۋىن قامتاماسىز ەتەدى» دەگەن (2-باپ) سويلەمدەر كەز كەلگەن ازاماتتىڭ, مەملەكەتتىك قىزمەتكەردىڭ پاتريوتتىق سەزىمىن وياتاتىندىعى ءسوزسىز. سوناۋ الاتاۋدان ارقاعا دەيىنگى, التايدان اتىراۋعا دەيىنگى قازاق دالاسىن قورعاۋ, ون ءتورت مىڭ شاقىرىمنان استام مەملەكەتتىك شەكارا شەبىن مىعىمداۋ, بولاشاق ۇرپاققا اماناتتاۋ ءىسى وسىدان انىق كورىنەدى. بۇل ماڭىزدى مىندەتتى بۇگىنگى ۇرپاق ابىرويمەن جۇزەگە اسىرۋدا. ال وسىنىڭ قۇرامداس بولىگى رەتىندە جىل سايىن ەلورداداعى تاۋەلسىزدىك مونۋمەنتى تۇبىندە اسكەري پارادتىڭ وتكىزىلۋى – ۇلتتىق رۋحىمىزدىڭ اسقاقتاي تۇسكەندىگىنىڭ بەلگىسى.
قاي كەزدە, قاي عاسىردا قازاق حالقى الەمگە پاش ەتىپ, وسىنداي مارتەبەلى شەرۋ وتكىزىپ ەدى؟! بۇل دەگەنىمىز – ەل پرەزيدەنتىنىڭ قازاقستان حالقىنا جولداۋىنداعى ۇزاق مەرزىمدى ماقساتتار مەن ولاردى ىسكە اسىرۋ ستراتەگيالارىنداعى №1 باسىمدىق رەتىندە اتالعان ۇلتتىق قاۋىپسىزدىك يدەياسىنىڭ نىعايا تۇسكەندىگىنىڭ, الداعى كەزدە دە دامي بەرەتىندىگىنىڭ ايقىن دالەلى.
مۇحتار اناربەك,
ۇقك ءباسپاسوز قىزمەتى باستىعىنىڭ ورىنباسارى.
