قولى اشىققا قوشەمەت كورسەتىلدى

ەلوردادا تاۋەلسىزدىكتىڭ 25 جىلدىعىنا وراي, ەلىمىزدىڭ اتىمتاي جومارتتارىنا ارنالعان «قايىرىمدىلىق كەرۋەنى» ءىى فورۋمى ءوتتى. قازاقستان حالقى اسسامبلەياسىنىڭ مۇرىندىق بولۋىمەن ۇيىمداستىرىلعان شارا اياسىندا «قايىرىمدى ەل-2017» جالپىۇلتتىق اكتسياسىنىڭ باستالعانى دا جاريا ەتىلدى. قازاقستان حالقى اسسامبلەياسى ءتور­اعاسىنىڭ ورىنباسارى ە.توعجانوۆ پەن پارلامەنت ءماجىلىسى توراعاسىنىڭ ورىنباسارى ۆ.بوجكو باستاعان ءبىر توپ ءماجىلىس جانە ءماسليحات دەپۋتاتتارى, مەتسەناتتار مەن مەملەكەتتىك ورگاندار جانە ۇكىمەتتىك ەمەس ۇيىمدار, ەتنومادەني بىرلەستىكتىڭ وكىلدەرى قاتىسقان سالتاناتتى جيىندا جىل بويى ءوزىنىڭ جومارتتىعىمەن وزگەگە ۇلگى بولىپ, قالىڭ ەلدىڭ العىسىن ارقالاعان ازاماتتار ماراپاتتالدى. سالتاناتتى جيىندى اشقان قحا توراعاسىنىڭ ورىنباسارى ەرالى توعجانوۆ. مەملەكەت باسشىسى ن.نازارباەۆ پەن كۇللى قازاقستان حالقىنىڭ اتىنان قايىرىمدى جاندارعا زور العىس ايتىپ, ارنايى اتالىمدار بويىنشا سىيلىقتار تابىس ەتتى. «ەلباسىمىز نۇرسۇلتان ءابىش ۇلىنىڭ باستاماسىمەن قۇرىلعان قازاقستان حالقى اسسامبلەياسى بۇگىنگى تاڭدا ۇلتتار اراسىنداعى تاتۋلىقتى ساقتاپ قانا قويماي, مەيىرىمگە بولەيتىن باۋىرمالدىعىمىزدى ارتتىرۋ ماقساتىندا ارنايى اكتسيا جاريالاعان بولاتىن. قايىرىمدىلىعىمەن كومەككە مۇقتاج جاندارعا قول ۇشىن سوزۋ ارقىلى قازاقستان حالقىنىڭ ىنتىماعى جاراسىپ, بەرەكەسى ارتا ءتۇستى. وعان قوماقتى ۇلەس قوسقاندارىڭىز ءۇشىن وزدەرىڭىزگە العىسىمىز شەكسىز», دەدى ە.توعجانوۆ. ودان كەيىن ءسوز العان ءماجىلىس توراعاسىنىڭ ورىنباسارى ۆلاديمير بوجكو اعىمداعى جىل بويى رەسپۋبليكا كولەمىندە جۇرگىزىلگەن اكتسيالار اياسىندا ەلىمىزدىڭ تۇكپىر-تۇكپىرىندەگى مۇقتاج جاندارعا كورسەتىلگەن كومەك كولەمى 40 ملرد تەڭگەدەن اسىپ تۇسكەندىگىن اتاپ ءوتتى. ونىڭ ايتۋىنشا, مۇنداي كومەكتىڭ قۇرامىندا قارجىلاي, ماتەريالدىق نەمەسە قىزمەتتىك قولقابىس ەتۋدىڭ سان ءتۇرى بار. قايىرىمدىلىق شاراسىنا قاتىسىپ, كوپشىلىكتىڭ ىقىلاسىنا بولەنگەندەردىڭ قاتارىندا ەكى دۇركىن وليمپيادا چەمپيونى, داڭقتى زىلتەمىرشى يليا يلين دە بولدى. ول وسى كەزگە دەيىن جاساپ كەلگەن ءتۇرلى باعىتتاعى قايىرىمدىلىق شارالارىن ءالى دە بولسا جالعاستىرا تۇسەتىندىگىن ايتتى. «مەن ءۇشىن ەلىمىزدىڭ ءاربىر ازاماتىنىڭ جانى جايساڭ, قولى اشىق. ءتىپتى, ەڭ بولماعاندا جاقىن ادامدارىڭا قۋانىش سىيلاپ, جاقسىلىق جاساۋدىڭ ءوزى زور باقىت. اسىرەسە, بالانى قۋانىشقا كەنەلتىپ, جۇرەگىڭدى ەلجىرەتە الساڭ, ونىڭ ءوزى دە ءبىر باقىت. شاما-شارقىمىزدىڭ كەلگەنىنشە وسى كەزگە دەيىن بۇلدىرشىندەردى قۋانتۋعا كۇش جۇمساپ كەلدىك. بۇدان بىلاي دا وسى ارەكەتىمىزدى جالعاستىراتىن بولامىز», دەدى ي.يلين. ايتۋلى كەشكە جەزدى وڭىردەن كەلگەن مەتسەنات بەكزات التىنبەكوۆ تە وڭ قولىمنىڭ بەرگەنىن, سول قولىم بىلمەسە ەكەن دەگەن نيەتىن ءبىلدىردى. سوندىقتان دا بولار, ول بىرنەشە جىلدان بەرى جاساپ جۇرگەن قايىرىمدىلىق ارەكەتتەرىنىڭ ەسەبىنەن جاڭىلىسادى. «جالپى, ءوزىم كوپ بالالى وتباسىندا دۇنيەگە كەلگەنمىن. جەسىر ايەلدىڭ جەتىنشى پەرزەنتى بولىپ ءوسىپ, جەتىلگەندىكتەن ءومىر مەنى جاستايىمنان-اق شىڭدادى. جوقشىلىقتى كوپ كورگەنىممەن, قولدىڭ كىرى سانالاتىن قۋ دۇنيە مەنىڭ جۇرەگىمدى تارىلتا قويمادى. سوندىقتان دا بولار, قال-قادەرىمىزشە تۇرمىسى تۇرالاپ, جاعدايى كەلىسىڭكىرەمەي جۇرگەن جاندارعا بارىنشا كومەك قولىن سوزۋعا ۇمتىلىپ جاتامىز. بۇل ادامدار اراسىنداعى مەيىرىم, شاپاعاتتىڭ شۋاعىن شاشادى ەمەس پە؟», دەيدى بەكزات التىنبەكوۆ. ايتا كەتەيىك, جۇزگە جۋىق قولى اشىق جومارت جاندار ماراپاتتالعان بۇل جيىندا «كوز قۋانتقان بىرەگەي تۋىندىلار» تاقىرىبىندا سۋرەت كورمەسى دە ۇيىمداستىرىلدى. كورمەدە باشپايىمەن سۋرەت سالىپ الەمگە تانىلعان قوستانايلىق سۋرەتشى قىز مايا دەمەەۆانىڭ تۋىندىلارى كوپشىلىك نازارىنا ۇسىنىلدى. نۇرلىبەك دوسىباي, «ەگەمەن قازاقستان» سۋرەتتى تۇسىرگەن ورىنباي بالمۇرات, «ەگەمەن قازاقستان»