ورازا ايت مەيرامى قۇتتى بولسىن, جاماعات!

قادىرلى مۇسىلمان باۋىرلار, قۇرمەتتى وتانداستار! مەيىرىمدى, راحىمدى اللانىڭ اتىمەن باستايمىن! مىنە, ايلاردىڭ تورەسى, كۇللى مۇسىلمان بالاسى ءۇشىن قاسيەتتى رامازان ايىمەن قي­ماي قوشتاساتىن كۇنگە دە تاياپ قالدىق. ەلىمىزدەگى بارشا مۇسىلماندار كۇننىڭ اپتاپتى ىستىعىنا قاراماستان, تامىز ايىن جاقسى نيەتپەن, تاقۋالىقپەن, ورازامەن وتكىزدى. كەز­دەسكەن قيىندىقتارعا سابىر ەتىپ, جا­را­تۋ­شى يەمىزدىڭ رازىلىعىنا ۇمتىلدى. مي قايناتار ىستىقتى اۋىرسىنباي ورازا ۇستاۋ­عا توزە العان جان, ءومىردىڭ باسقا دا سىناق­تا­رىنا سابىرلىق تانىتا الاتىنى ءسوزسىز. رامازان – قۇلشىلىق پەن سابىر, بەرەكە مەن بىرلىك, مەيىرىم مەن قايىرىمدىلىق ايى بولسا, ءۇش كۇن بويى تويلاناتىن ورازا ايت مەيرامى – ادامداردىڭ كوڭىلىنە كوكتەم سىيلاپ, جانىن جادىراتاتىن ۇلىق مەرەكە. بارشاڭىزدى يسلام ۇمبەتىنىڭ ەڭ قاسيەتتى دە ۇلىق مەرەكەسى – ورازا ايت مەيرامىمەن قۇتتىقتايمىن! ەڭبەكتەگەن سابيدەن ەڭكەي­گەن كارىگە دەيىن بارشا مۇسىلمان شات-شادىمان قۋانىشقا بولەنەتىن بۇل مەيرام قازاقستان جۇرتشىلىعىنا دا قۇت-بەرەكە, ىنتىماق, ىرىس اكەلسىن! پايعامبارىمىز (س.ع.س.) مەككەدەن ما­دي­نا­عا كوشىپ كەلگەندە, جەرگىلىكتى حالىقتىڭ مەي­رامداپ, كوڭىل كوتەرىپ جاتقانىن كورىپ: «بۇل قانداي مەرەكە؟» دەپ سۇراعاندا: «بۇل ءبىزدىڭ يسلامعا دەيىن تويلاپ كەلە جاتقان مەرەكەلەرىمىز», دەگەن جاۋاپ ەستىدى. سوندا راسۋلۋللا (س.ع.س..): «اللا سىزدەرگە بۇدان دا ۇلىق ەكى مەيرام بەردى. ولار رامازان جانە قۇربان ايتتارى», دەپ وسى يسلامي مەيرام­دار­دىڭ مارتەبەلى ەكەندىگىن بىلدىرگەن. ورازا ايتى ادامداردى باۋىرمالدىلىق پەن كىشىپەيىلدىلىككە, كەشىرىمدىلىك پەن سۇيىسپەنشىلىككە شاقىرادى. يسلام شاريعاتىندا ءپىتىر ساداقاسىنىڭ وسى ايت قارساڭىندا بەرىلۋى دە جايدان-جاي ەمەس. ورازا ايتتىڭ حاديستەردە «عيدۋل-فيتر», ياعني ء«پىتىر مەيرامى» دەپ اتالۋى دا سوندىقتان. ءپىتىر ساداقالار جاعدايى ناشار, مۇمكىندىگى شەك­تەۋلى وتباسىلاردى قۋانىشقا بولەپ, ايت مەيرامىندا داستارقان جايۋعا جاعدايى كەلمەگەندەرگە دەمەۋ بولادى. سونىمەن قاتار, بۇل كۇنى مۇسىلماندار ولىلەرىن دە ەسكە الىپ, اللادان ولارعا شاپاعات تىلەپ, دۇعا ەتەدى. ايت كۇنىنىڭ وزىنە ءتان جاراسىمدى دا ساۋاپتى امالدارى مول. بۇل كۇنى عۇسىل قۇيىنىپ, ۇستىنە جۇپار ءيىس سەۋىپ, ايت نامازىنا قاتىسۋ سۇننەت. ءار ۇيدە ءسانى مەن سالتاناتى ەرەكشە مەرەكەلىك داستارقان جايىلادى. مۇسىلماندار تۋعان-تۋىس, دوس-جاران, كورشى-قولاڭدى ارالاپ, ءبىر-ءبىرىنىڭ ۇيىنەن ءدام-تۇز تاتىپ, مارە-سارە بولادى. رەنجىسىپ قالعان كىسىلەرمەن تاتۋلاسۋ, قانداي دا ءبىر كەلىسپەۋشىلىكتىڭ سالدارىنان قاتىناس ۇزىلگەن تۋىستاردىڭ ۇيلەرىن ار­نايى ارالاۋ دا ەرەكشە ماڭىزدى. ويتكەنى, اللا تاعالا: «سەن كەشىرىم جولىن ۇستان, جاق­سى­لىققا بۇيىر, ناداندىقتان بەت بۇر» («اعراف» سۇرەسى, 199-ايات) دەپ مۇسىل­مانداردى بارىنشا كەشىرىمدى بولا تۇسۋگە شاقىرعان. كۇندەگى ورازاسىن قۇرمامەن اشۋدى سۇننەت ەتكەن پايعامبارىمىز (س.ع.س) ايت نامازىنا باراردا الدىمەن قۇرمادان ءدام تاتىپ بارىپ ۇيىنەن شىققاندى ۇناتاتىن. ءدال وسى كۇنى بالالاردى جاڭا كيىم, تاتتىلەر مەن سىيلىقپەن قۋانتۋدى داعدىعا اينالدىرساق, ورازا ايتتى ولار دا اسىعا كۇتەتىن بولادى. جالپى, ورازا ايتى قاسيەتتى رامازان ايى اياقتالعانىنىڭ بەلگىسى عانا ەمەس, ول – ءبىر ايلىق قۇلشىلىعىمىزدىڭ قۋانىشى مەن جەمىسى. پايعامبارىمىز (س.ع.س) ءبىر حاديسىندە: «ورازا تۇتقان ادام ەكى رەت قۋانادى: ءبىرى – اۋىز اشاردا, ەكىنشىسى – اقىرەتتە ۇستاعان ورازاسىنىڭ ساۋابىن العاندا», – دەگەن ەكەن. بۇل مەيرام – ون ءبىر ايعا اۋىز اشاتىن قۇددى ءبىر ۇلكەن اۋىزاشارداي. سوندىقتان ايت كۇندەرىندە ورازا ۇستاۋعا بولمايدى. ايتتا ءدۇيىم جۇرت كوڭىل كوتەرۋى كەرەك. ارينە ايت كۇندەرىندە دە شاريعاتقا قايشى ىستەردەن اۋلاق بولۋىمىز ءلازىم. مۇباراك ايدىڭ قۇرمەتىنە كاسىپكەر مۇسىلمان باۋىرلارىمدى جاساعان يەمىزدىڭ رازىلىعىن تىلەپ, ازىق-ت ۇلىك نارقىن, قو­ناق­ۇيلەر مەن قوعامدىق قىزمەتتەردىڭ باعا­سىن 10 پايىزعا جەڭىلدەتۋگە شاقىرعان ەدىم. ەلىمىزدىڭ بارلىق ايماقتارىنان كوپتەگەن كاسىپكەر ازاماتتار ۇندەۋىمە قۇلاق ءتۇرىپ, ەرەكشە ىقىلاسپەن قولدادى. اللا تاعالا ولاردىڭ جاساعان قايىرىمدىلىقتارىن ساۋاپتان جازىپ, كاسىپتەرىنە بەرەكە بەرسىن! وتباستارىنا اماندىق تىلەيمىن! بيىلعى تاۋەلسىزدىگىمىزدىڭ 20 جىلدىعى قارساڭىندا ەل مۇسىلماندارى قازاقستان­نىڭ جۇرگىزىپ وتىرعان ىشكى جانە سىرتقى سايا­ساتىنا قولداۋ بىلدىرۋمەن قاتار, سۇيىكتى وتانىمىزدى وركەندەتۋ مەن ونىڭ مادەني, رۋحاني قۇندىلىقتارىن ساقتاپ, دامىتا تۇسۋگە مۇنان بىلاي دا كۇش-جىگەرىن اياماي جۇمساي بەرمەك. قادىرمەندى ەلباسى ن.ءا.نا­زارباەۆ پەن ەل قامىنداعى اسىل ازامات­تا­رى­مىزعا اللا تاعالا جار بولسىن! ويعا العان ءىس-جوسپارلارىن جۇزەگە اسىرۋعا جانە ەلىمىزدى ادىلدىكپەن باسقارۋعا كۇش-قۋات بەرگەي! اللا تاعالا رامازان ايىندا ۇستاعان ورازالارىمىز بەن قۇلشىلىق-عيبادات­تارىمىزدى قابىل ەتىپ, ەكى دۇنيەنىڭ باقىتىن ءناسىپ ەتسىن! مۇباراك ورازا ايت مەيرامىن وتباسى, وشاق قاسىندا, بەيبىت اسپان استىندا اتاپ وتۋلەرىڭىزدى, ەلىمىزدىڭ بىرلىك پەن تاتۋلىق قۇشاعىندا ءوسىپ-وركەندەۋىن, جۇرت امان, ىرىس تۇگەل, اق مول بولۋىن حاق تاعالادان تىلەيمىن! ءاۋمين! ىزگى تىلەكپەن, شەيح ءابساتتار قاجى دەربىسالى, قازاقستان مۇسىلماندارى ءدىني باسقارماسى جانە ورتا ازيا مۇفتيلەر كەڭەسىنىڭ توراعاسى, باس ءمۇفتي.