سپورتقا جۇمسالعان قارجى قايتارىمدى

دەنىڭ ساۋ, تۇلا بويىڭ سەرگەك ءجۇرۋى ءۇشىن سپورتتىڭ پايداسى زور. مەن ءوزىم بالا جاسىمنان سپورتتى ءسۇيىپ ءوستىم. بەسىنشى سىنىپتان باستاپ بالالار مەن جاسوسپىرىمدەر سپورت مەكتەبىنە بارىپ, ۆولەيبولمەن اينالىستىم. تالاي جارىستارعا دا قاتىستىم. مىقتى سپورتشى بولۋ ءۇشىن تالماي تەر توگۋ كەرەك ەكەنىن جاستايىمنان ۇعىندىم. سوندىقتان كاسىپكەر رەتىندە سپورتقا قامقورلىق جاساپ, ءداستۇر رەتىندە حالىقتىڭ سالاماتتى ءومىر سالتىن ۇستانعانىن قالايمىن. وسى مۇمكىندىكتى پايدالانا وتىرىپ, «دين ينتەر» جشس-ءنىڭ قۇرىلتايشىسى رەتىندە وليمپيالىق رەزەرۆى سپورت كەشەنىن سالىپ بەرگەنىمدى ايتقىم كەلەدى. ونىڭ جوبالىق قۇنى 200 ميلليون تەڭگەگە ءتۇستى. جالپى اۋماعى 1,5 مىڭ شارشى مەتر سپورت كەشەنىندە ۆولەيبول, فۋتبول, باسكەتبول, ۇلكەن جانە ۇستەل تەننيستەرى, كۇرەس, كاراتە جانە باسقا سپورت تۇرلەرىمەن شۇعىلدانۋعا بولادى. كەلۋشىلەر باسسەينگە ءتۇسىپ, سۋعا جۇزۋمەن اينالىسادى. ءار ءتۇرلى ترەناجەرلار ورناتىلعان زالداردا كىم قانداي سپورتپەن اينالىسامىن دەسە دە جاقسى جاعداي بار. سپورت كەشەنىن اشۋ ارقىلى 20 ادام جۇمىسپەن قامتىلدى. قازىر سپورت كەشەنىنە كۇنىنە 200-دەن استام ادام كەلىپ, جاتتىعادى, دەنەسىن شىنىقتىرادى. مۇندا كىرۋ اقىسى دا باسقا سپورت زالدارعا قاراعاندا اناعۇرلىم تومەن. بۇل – وسى شاعىن اۋدان تۇرعىندارىنا قىزمەت كورسەتەتىن وسى زامانعى جابدىقتالعان بىردەن-ءبىر سپورت كەشەنى. سوندىقتان تۇرعىندارعا ىڭعايلى ءارى باعاسى قولجەتىمدى. بيىل وبلىستا تۇڭعىش رەت جاعاجاي ۆولەيبولى الاڭىن پايدالانۋعا بەردىم. جاعاجاي ۆولەيبولى الاڭىن قورشاپ, قۇم توسەپ, ەۋروستاندارتقا ساي جابدىقتادىم. الاڭ قۇرىلىسى 1,5 ايدا اياقتالدى. الاڭ پايدالانۋعا بەرىلگەن ازعانا ۋاقىتتا جاعاجاي ۆولەيبولىنان ەكى جارىس ۇيىمداستىرۋعا مۇرىندىق بولدىق. جارىستاردى جارنامالاۋعا عانا 200 مىڭ تەڭگە بولدىك. سونىڭ ناتيجەسىندە اقتوبەلىكتەر ءۇشىن جاڭا سپورت ءتۇرى جاعاجاي ۆولەيبولىنان العاشقى قالالىق تۋرنيرگە 15 كوماندا قاتىسسا, وبلىستىق جارىستا 30 كوماندا سىنعا ءتۇستى. بۇل جارىسقا الىستاعى بايعانين, حرومتاۋ اۋداندارىنان دا ۆولەيبولشىلار قاتىسىپ, كۇشتەرىن سىنادى. شىنىن ايتقاندا, بيىل تۇڭعىش رەت وتكىزىلىپ وتىرعانىنا قاراماستان وسىنشاما كوماندا قاتىسۋى جاعاجاي ۆولەيبولىنىڭ بولاشاقتا تىم ءتاۋىر دامىپ كەتەتىنىنە سەندىرەدى. جەڭىمپازدار مەن جۇلدەگەرلەرگە باعالى سىيلىقتار ۇسىنىلدى. بۇل ءبىزدىڭ وڭىردە جاعاجاي ۆولەيبولىنان تۇڭعىش وتكىزىلگەن جارىس. بۇل ءتۋرنيردى الدا ءداستۇرلى تۇردە ۇيىمداس­تىرماق ويىمىز بار. ءبىزدىڭ وبلىستا ۆولەيبول سپورتى كەنجە قالىپ كەلەدى. جاعاجاي ۆولەيبولىن دامىتۋ ارقىلى سپورتتىڭ وسى تۇرىنە دەگەن جاستاردىڭ قىزىعۋشىلىعىن تۋدىرماقپىز. سپورتشىلارعا دەمەۋشىلىك جاساۋ دا قاجەتتى ءىس. بيزنەس تاراپىنان بولاتىن وسىنداي باستامالار بۇقارالىق سپورتتى دامىتۋعا سەرپىن بەرەدى دەپ ويلايمىن. عالىمجان ەلەۋوۆ, «دين ينتەر» جشس-ءنىڭ قۇرىلتايشىسى, وتاشى دارىگەر. اقتوبە وبلىسى.