ارقا سۇيەرلەرىمىز بار

راسىن ايتقاندا, سپورتپەن الاڭسىز شۇعىلدانۋعا, ونى تەرەڭدەتە جالعاس­تى­رىپ, اقىرىندا دىتتەگەن ماق­سات­تار­عا جەتۋگە كومەك-قولداۋ­دىڭ ىقپال-اسەرى زور ەكەندىگىن ءبىز جاقسى بىلەمىز. كەيىنگى كەزدە مەملەكەتتىك قامقور­لىق­تىڭ كۇشەيە ءتۇ­سۋى­نە باي­لانىستى ونى سۇيىك­تى سەرىك ەتۋشىلەر ءۇشىن جاقسى جاعداي قالىپتاستى. سونىمەن بىرگە, جەكەلەگەن ۇيىمدار مەن ازا­ماتتاردىڭ دەمەۋشىلىك ءۇردىس قالىپتاستىرۋى وسى با­عىت­تاعى تالپىنىستى تاۋداي قى­لىپ كەلەدى. ءوز ەركىمەن, كو­ڭىل قالاۋىمەن سۇيەنىش, تىرەك بولۋعا تىلەك قۋانتارلىق قۇ­بىلىس قازىرگى. سوندايلىق نيەت بىلدىرۋشىلەرگە رازىلىعىمىز ەرەكشە. ءسوز ورايىندا ورتاعا سالعاندا, قاراعاندىلىق سپورتشىلاردىڭ جۇل­دىزدارى جارقىراپ, ەل تۋىن جوعارى كوتەرىپ, الىسقا تانىلىپ جاتۋى ءبىر جاعىنان سولاردىڭ كەڭ پەيىلدەرى ارقاسىندا دەر ەدىم. ال ارامىزدا تالاپكەرلەرگە جاناشىرلار از ەمەس. ماسەلەن, مەن بۇل رەتتە ۆيكتور ليم دەگەن ازاماتتىڭ ەسىمى مەن ءىسىن ايرىقشا اتاۋىما بولادى. كەزىندە ءوزى دە كىلەم ۇستىندە كۇش سىناسقان, بۇگىندە بەلگىلى كاسىپكەر ول مىنەكي, بىرنەشە جىلدان بەرى قازاق كۇرەسىن دامىتۋعا ۇلكەن ۇلەس قوسۋدا. جا­رىستاردىڭ ۇلگىلى ءوتۋىن, وعان جەر-جەردەن بالۋانداردىڭ قامتىلۋىن جومارتتىقپەن قولدايتىن بىردەن-ءبىر كىسى وسى. ماۋسىم ايىندا قارا­عان­دىدا ۇيىمداستىرىلعان قازاق كۇرەسىنەن رەسپۋبليكالىق سپارتا­كيا­دانىڭ ەستە قالارلىقتاي بولۋى­نا الدىمەن ۆيكتور افانا­سە­ۆيچ­تىڭ بەلسەندى كومەگىنىڭ زور سەپتىگى ءتيدى. ول شاكىرتتەرىمنىڭ حالىقارالىق ءىرى سايىستارعا قاتىسۋىن قامتاما­سىز ەتۋدەن قاشاندا قالىس قال­ماي­دى. بىلتىر استانادا وتكەن الەم چەمپيوناتىنا ءوز سال­ما­عى بويىنشا بەلدەسۋشىلەر اراسىندا ءجۇل­دەلى ورىن­نان كورىنگەن ولجاس سلام­بەكوۆتىڭ دايىن­دىعىن, بارۋ­ىن كوتەردى. ءبىر كەزدە قولىم­نان قانات قاعىپ, اتاقتى سامب­وشىعا اينالعان تالعات بايشولاقوۆ تا ءىزباسارلارى تالابىن ۇشتاۋعا ءاردايىم ىنتالى ازامات. قازاق قىز­دا­رى اراسىنان العاشقى سام­بوشى اتانعان كەلبەت نۇر­عا­زينا ءتارىزدى ماقتانىشى­مىز­دىڭ قامقورى ەكەنىن كوپ­شىلىك بىلە بەرمەۋى مۇمكىن. ايتا بەرسە, ايماعى­مىز­دا وسىنداي سپورت دەمەۋشىلەرى از سانالمايدى. جاتتىق­تىرۋشىلار, سپورتشىلار, اتا-انالار اتىنان ولار­عا اق العىسىمدى جەتكىزگىم كەلەدى. ارقايسىسىنىڭ جاق­سىلىعى مەن قايىرىمدىلىعى ۇلكەن سپورتقا سەبىلگەن شاپاعات. ونىڭ شۋاعىنا بولەنگەن شاكىرت­تە­رىم ءوز تاراپتارىنان سەنىمدى اقتاۋعا, نامىسقا بەرىك. ديقانباي بيتكوزوۆ, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى. قاراعاندى وبلىسى.