ارميامىز بيىل ءۇشىنشى رەت اسكەري شەرۋگە قاتىسپاق
قازاقستان رەسپۋبليكاسى ءتاۋەلسىزدىگىنىڭ 20 جىلدىعى مەن كونستيتۋتسيا كۇنىنە ارنالعان اسكەري شەرۋگە ازىرلىك شىلدەنىڭ شىلىڭگىر ىستىعىندا باستالدى. توگىلگەن تەردىڭ تەككە كەتپەگەنىن ەلوردامىز استانادا 30 تامىز كۇنى وتەتىن اسكەري شەرۋدە كوز جەتكىزەمىز. وعان 2500 اسكەري قىمەتكەر, 130-دان استام قارۋ-جاراق پەن اسكەري تەحنيكا, سونداي-اق 60-تان استام ۇشاق پەن تىكۇشاق قاتىسادى.
كونستيتۋتسيا كۇنىنە ارنالعان اسكەري شەرۋ بيىل وسىمەن ءۇشىنشى رەت «قازاق ەلى» مونۋمەنتى الدىندا وتكىزىلگەلى وتىر. ەل پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن جالاۋىن كوتەرەتىن اسكەري شەرۋ بيىل دا باستى وقيعالاردىڭ ءبىرى بولماق. قازاقستاندىق اسكەري قىزمەتكەرلەر قۇرلىقتا, اۋەدە كۇردەلى اسكەري تەحنيكانى جوعارى كاسىبي شەبەرلىكپەن باسقارا الاتىندىقتارىن پاش ەتەدى.
بار-جوعى ءۇش جىل بولسا دا داستۇرگە اينالىپ كەلە جاتقان مەرەكەمىزدى قازاقستاندىقتار ساعىنا كۇتىپ, وندا بولار جاڭالىقتى ءوز كوزدەرىمەن كورۋگە اسىعادى. بيىلعى شەرۋدىڭ وتكەن جىلعىمەن سالىستىرعانداعى ەرەكشەلىكتەرى مەن جاڭالىقتارىن اۋىز تولتىرىپ ايتۋعا بولادى.
بىرىنشىدەن – تامىز ايىنىڭ 25-ىنەن باستاپ ەل پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ جارلىعىمەن قارۋلى كۇشتەرىمىزدە جاڭا, جەتىلدىرىلگەن مەرەكەلىك جانە كۇندەلىكتى كيىپ ءجۇرەتىن اسكەري كيىم ۇلگىcىنىڭ ەنگىزىلگەندىگى. ءبىر ايتا كەتەرلىگى, وتان قورعاۋشىلار كونستيتۋتسيا كۇنى, ەل تاۋەلسىزدىگىنىڭ 20 جىلدىعى قارساڭىندا وتەتىن اسكەرلەر شەرۋىندە جاڭا كيىم ۇلگىسىن تۇڭعىش رەت كيىپ شىعادى. دەمەك, بۇدان بىلاي قازاقستاندىق اسكەري قىزمەتشىلەر ەلىمىزدەگى ايگىلى كيىم ديزاينەرى قۇرالاي نۇرقادىلوۆا ازىرلەگەن جاڭا مەرەكەلىك جانە كۇندەلىكتى اسكەري فورماعا اۋىسادى.
اسكەري كيىم قازىرگى تاڭدا قازاقستان ارمياسىنىڭ اسكەري قىزمەتشىلەرى مەن وفيتسەرلەرى كيىپ جۇرگەن فورمادان ەرەكشە. ونى ازىرلەۋ كەزىندە تارتىمدى تالداۋلار جاسالىپ, بۇگىنگى كۇننىڭ تالاپتارى, شەتەلدەردىڭ وزىق تاجىريبەلەرى, سونداي-اق, اسكەري قىزمەتشىلەردىڭ تىلەكتەرى مەن ۇسىنىستارى ەسكە الىندى.
قازىرگى تاڭدا قازاقستان ەكونوميكاسىنىڭ ءوسۋى قازاقستاندىق اسكەري قىزمەتشىلەردىڭ فورماسىن ەڭ جوعارى حالىقارالىق ستاندارتتارعا ساي بولۋىنا جول اشۋدا. ءبىزدىڭ توقىما فابريكالارىندا اسا ءتوزىمدى ماتا ۇلگىلەرى پايدا بولدى. وسى فورمالاردىڭ وتاندىق مەكەمەلەردە تىگىلۋى دە ۇلكەن جەتىستىكتىڭ بەلگىسى.
اسكەري قىزمەتشىلەردىڭ جاڭا كيىم-كەشەگىنىڭ رەڭى دە وزگەرىسكە ۇشىرادى. قۇرلىق اسكەرلەرىنىڭ سالتاناتتى جانە كۇندەلىكتى كيىم ۇلگىسى ءۇشىن «قارا جۋسان» ءتۇس, ال اۋە قورعانىس كۇشتەرى ءۇشىن – قارا كوك ءتۇس قولدانىلسا, اسكەري-تەڭىز كۇشتەرى اسكەري قىزمەتشىلەرىنىڭ كيىمى ءىس جۇزىندە وزگەرىسسىز قالىپ, فلوتتىڭ كوپعاسىرلىق داستۇرلەرى ساقتالدى.
باس كيىمدەر دە وزگەرتىلدى, اتاپ ايتقاندا فۋراجكالار. ول قازىرگى زامانعا ساي ۇلگىگە يە بولدى. ءتوبەسى كىشىرەيتىلىپ, بارلىق مەتالدىق فۋرنيتۋرا ورنىنا كەستە تىگىلدى. پوگون مەن جەڭ ءۇستىندەگى بەلگىلەر ديزاينى جەتىلدىرىلدى.
جوعارى وفيتسەرلىك قۇرامنىڭ سالتاناتتى كيىم-كەشەگىندە قولدانىلعان كەستەلەۋ – لاۆر جاپىراقتارىنىڭ ۇلتتىق ويۋلارمەن ۇيلەستىرىلۋى كيىم ۇلگىسىنە ءساندى سيپات بەردى. جاڭا فورمانى كيىپ, سىننان وتكىزىپ ۇلگەرگەن ءاسكەري قىزمەتشىلەر ونىڭ ادەمىلىگى مەن ىڭعايلىلىعىن, جايلىلىعىن ءجانە بارلىق تالاپتارعا ساي ەكەندىگىن, جاڭا كەلبەتكە دە يە بولعانىن سەزىندى.
ەكىنشىدەن – قازاقستاندىقتار بۇعان دەيىن بۇرىن-سوڭدى كورمەگەن جاڭا اسكەري تەحنيكالار مەن جاساقتاردى ەلىمىزدىڭ باس الاڭىنان بيىل ءبىرىنشى رەت تاماشالايدى. مەحانيكالاندىرىلعان لەككە تانكتەرگە قولداۋ كورسەتەتىن جاۋىنگەرلىك ماشينالار, اۋىر وق اتاتىن جۇيەلەر جانە جەتىلدىرىلگەن بتر-82 اسكەري تەحنيكاسى قوسىلماق.
ۇشىنشىدەن – اسكەري شەرۋگە تۇڭعىش رەت مەرگەندەر جاساعى مەن قۇرلىق اسكەرلەرىنىڭ تاۋلى اتقىشتار بريگاداسىنىڭ اسكەري قىزمەتشىلەرى قاتىسادى. قۇراما تاۋلى جاعدايدا دۇرىس ۇرىس ءجۇرگىزۋى ءۇشىن بارلىق قاجەتتى زاماناۋي جابدىقتارمەن قامتاماسىز ەتىلگەن.
بيىلعى اسكەري شەرۋگە قاتىسۋشى لەكتەر ءار تەكتىلىگىمەن ەرەكشەلەنبەك. ايەل اسكەري قىزمەتشىلەردەن قۇرالعان ەكى كولوننا – «قوراپ» كوز قىزىقتىرماق. ءمىنبەر الدىنان سانيتارلىق نۇسقاۋشىلاردىڭ توپتاستىرىلعان روتاسى مەن اسكەري ازاماتتارمەن ءبىر ساپتا قولعا قارۋ الىپ جاۋىنگەرلىك تاپسىرما ورىنداۋعا ءازىر ايەل اسكەري قىزمەتشىلەر كوپشىلىكتى تامساندىرماق.
تورتىنشىدەن – بيىل انگارلاردى ارتقا تاستاپ, اسپاندا اتوي سالاتىن 60-تان استام اۆياتسيالىق تەحنيكالار: دىبىستان دا جىلدام ۇشاتىن شابۋىلداۋشى, مايداندىق, بومبالاۋشى ۇشاقتار مەن جاۋىنگەرلىك تىكۇشاقتار كوپشىلىكتىڭ كوزايىمىنا اينالماق.
قاناتتى تەحنيكانىڭ قۇلاعىندا وينايتىن اسكەري ۇشقىشتار جاۋىنگەرلىك ءتارتىپ بويىنشا ۇشىپ, «سىنا», «رومب», «پيراميدا», «جەبە» تاسىلدەرىن كورسەتەدى. استانا قوناقتارى مەن تۇرعىندارى ءۇشىن ناعىز سىيلىقتى «بارىس-جەتىسۋ» ۇشۋ توبى دايارلاپ وتىر. ماسەلەن, «ءبايتەرەك» دەپ اتالاتىن ءتاسىلدى ولار اسپاندا ساعاتىنا 800 شاقىرىم جىلدامدىقپەن ۇشىپ كەلىپ جاسايتىن بولادى. ال «نەستەروۆ تۇزاعىن» سۋ-27 ۇشاعى زۆەنوسى ساعاتىنا 350 شاقىرىم جىلدامدىقپەن ۇشۋ ارقىلى شەبەرلىكپەن ورىنداماق. ءسويتىپ, اسپاندا وتەتىن اسكەري اۆيا دۋمان اسەرلىگىمەن ەستە قالماق.
ءجۇنىس ومار, قورعانىس مينيسترلىگى ءباسپاسوز قىزمەتى ءبولىمىنىڭ باستىعى, پولكوۆنيك.
–––––––––––––––––
سۋرەتتەردى تۇسىرگەن ورىنباي بالمۇرات.
