ءبىر ءسۇيىنىش, ءبىر كۇيىنىش

فرانتسيانىڭ پاريج قالاسىندا دزيۋدودان ءوتىپ جاتقان الەم چەمپيوناتىندا 73 كگ. سالماقتاعى ۇلتتىق قۇرامانىڭ مۇشەسى رينات يبراگيموۆ لوندون وليمپياداسىنا جولداما الدى. بۇل ءبىزدىڭ الەم چەمپيوناتى باستالعالى بەرى قورجىنىمىزعا تۇسكەن العاشقى جولدامامىز. ونىڭ وزىندە يبراگيموۆ ءۇشىنشى ورىن ءۇشىن بولعان سىندا پارتەر يەسى ۋگو لەگراننان جەڭىلىپ, ءوز سالماعىندا وليمپياداعا بەرىلەتىن ورىننىڭ بىرەۋىنە يە بولدى. جارىستا ءبىزدىڭ تاعى ءبىر بالۋانىمىز ەلدار زاپيرحانوۆ تا وسى فرانتسۋزعا جول بەردى. ال باسقا بالۋاندارىمىز قازىر شەتىنەن جەڭى­لىپ جاتىر. شىندىقتىڭ بەتىنە قاراساق, الەم چەمپيوناتى باس­تالعالى بەرى جۇلدەگە ۇمىتكەرلەردىڭ ءبارىنىڭ قارسىلاستارىنا كۇشى جەتپەي جاتقانىن ايتۋ كەرەك. ەڭ اۋەلى 60 كگ. سالماقتى ەلدوس ىسمەتوۆ ۇتىلسا, ودان كەيىن ەركەبۇلان قوساەۆ ءبىر كەزدەسۋدە جەڭىپ, ەكىنشىسىندە رەسەيلىك ارسەن گالستيانعا ەسە جىبەردى. ال 66 كگ. سالماقتاعى ازامات مۇقانوۆ جارىستى جاقسى باستاعان ەدى. ول كانادالىق ميشەل پوپيەلدى جەڭىپ, شيرەك فينالعا شىعاردا رەسەيلىك مۇسا مۋگۋشوۆتان جەڭىلىپ قالدى. سول سياقتى ناۋرىزبەك مايلاشوۆ تا جارىستى ءساتتى باستاپ, ەڭ سوڭىنا كەلگەندە قارسىلاسىنا شاماسى جەتپەدى. ول سوڭعى سىندا فرانتسۋز داميد لاروسقا جول بەردى. قىزدار اراسىنداعى باسەكە دە قىزا تۇسۋدە. بىراق ءبىزدىڭ قۇرا­مانىڭ قىزدارى دا ەرلەر سياقتى بىرىنەن سوڭ ءبىرى جەڭىلىستىڭ ءدامىن تاتىپ جاتىر. الەم چەمپيوناتىنىڭ العاشقى كۇنى 48 كگ.-داعى الەكساندرا پودريادوۆا ءبىر كەزدەسۋىن جەڭىپ, ەكىنشىسىندە, قارسىلا­سىنا ەسە جىبەردى. كەلبەت نۇرعازينا, لەنارا مەنگازوۆا, امينا تەن دە سونىڭ جولىن قايتالادى. ەندى ءبىزدىڭ قۇرامادا ايگەرىم قىدىر­باەۆا مەن زارينا الدينوۆا كۇش سىناسادى. ال ەرلەر اراسىندا پارتەرگە سايات شامشيەۆ, يسلام بوزباەۆ, تيمۋر بولات پەن الەكساندر كاساچەۆ شىعادى. داستان كەنجالين.