تامىزدىڭ جيىرما توعىزى...

 تامىزدىڭ جيىرما توعىزى... جاھانعا جالپاق جايىلعان, شىقپايسىڭ مەنىڭ ويىمنان. سەن ەدىڭ تەكتى ەلىمدى, اتا-جۇرتىمنان ايىرعان.   تامىزدىڭ جيىرما توعىزى... جانعان كۇن كوكتە وشكەن كۇن, تالاي تاعدىردى شەشكەن كۇن. ابىرالىمنىڭ باۋىرىنان ابدىراپ حالقىم كوشكەن كۇن.   تامىزدىڭ جيىرما توعىزى... سۇمدىقتى كورگەن كىم بولدى. تاڭ ەمەس سول تاڭ ءتۇن بولدى دۇنيەنى جۇتقان ءۇن بولدى, ءدۇر سىلكىندىرگەن كۇن بولدى.   تامىزدىڭ جيىرما توعىزى... كۇن ەمەس الىپ شار شىقتى, اسپان كوزىنەن قان شىقتى, دەگەلەڭ دەگەن ءور تاۋدىڭ كەۋدەسىنەن سول كۇن جان شىقتى.   تامىزدىڭ جيىرما توعىزى... ولكەمدى تۇگەل ءورت شالدى, دالامدى تۇگەل دەرت شالدى. ساڭىراۋقۇلاق ءبولىپ شىعاردى ءتورت قۇبىلامنان ءتورت شاردى. سۇراپىل داۋىل سوقتىردى, جارىلۋعا دالام شاق تۇردى. جەر مەنەن كوكتە تۇتاسقان بۇرىن بولماعان وت تۇردى.   تامىزدىڭ جيىرما توعىزى... قاسىرەت قۇشتى قاينارىم, قۋ, دوعالاڭ, تايلانىم, اقبۇلاق, ساماي, مارامىك, اققورا, تاڭات, مىرجىق پەن ابىرالىداي ايماعىم. باياناۋلا, قىزىلتاۋ, قارقارالى, شىڭعىستاۋ قىزىلجال مەن سارىجال, قاراجال مەن قاراولەڭ, جاتقان ءبىر جايناپ دالام ەڭ. جان داۋىسىڭدى ىشقىنعان ەستىدى سول كۇن بار الەم. مايلىقارا, ۇشقارا, بەرىكقارا سۇستانا. تاقىر بوپ قالدى توبەلەر, سىپىرعانداي الىپ ۇستارا. اجداھانىڭ اۋزىنان الىپ قالعان ەلىمدى, الىپ قالعان جەرىمدى, وشپەيتىن ماڭگى رۋح پەنەن قازاققا بىتكەن قۇدىرەتتى قۇدايىم بەرگەن كۇش قانا.   تامىزدىڭ جيىرما توعىزى... ورتەندى سول كۇن, لاستاندى قاز داۋىستى قازىبەك, سوزدەن ءتۇيىن تۇيگەن جەر. سەڭكىباي قاجى اتامىز, سەڭسەڭنەن بورىك كيگەن جەر. ءوندىرباي قالپە باستاعان, نوحا قاجى قوستاعان, ولكەمنەن شىققان قىرىق قاجى ساجدەگە باسىن يگەن جەر. ۇلجان مەن ءدىلدا انالار ءومىر باقي سۇيگەن جەر. الشىنباي مەن قۇنانباي الشاڭداي باسىپ جۇرگەن جەر. قاراتەكە, باقتىباي, جاپالاق پەن سارتىمباي قىراندايىن قومدانىپ, باتىرلار جاۋدى ىلگەن جەر. ساحايىپ قوجا اۋليە ساف التىن عۇمىر سۇرگەن جەر.   تامىزدىڭ جيىرما توعىزى... كوزىمدى مەنىڭ بايلادى, دەنەمە دەرت بوپ بويلادى. جەر-انانىڭ اق شاشىن, اق شاشىن ج ۇلىپ وينادى. قۇستاردىڭ توقتاپ سايراۋى, بويىمدا قانىم قاينادى. ورتەندى اتاقونىسىم قىرداعى مەن ويداعى, امىرەنىڭ اسەم ءانى مەن جاناق اقىننىڭ ويلارى, ابايدىڭ اسىل قىستاۋى, تاتتىمبەتتىڭ جاسىل جايلاۋى. تاپتادى جەردى كيەلى قايداعى مەن جايداعى.   تامىزدىڭ جيىرما توعىزى... سەزىمدەرىمدى شارپىستىر, ويلانار بىزگە تال ءتۇس بۇل. قاسىرەتتى تۇڭعىش جارىلىس, وعان دا ءوتتى الپىس جىل.   تامىزدىڭ جيىرما توعىزى... شەرمەندە بولعان ءوتتى كۇن, جەلبىرەپ ەندى كوك تۋىم. ەلباسىم بەرىپ پارمەندى, پوليگون جابار جەتتى كۇن. كەۋدەمدى تەۋىپ تەكتى جىر, وعان دا جيىرما ءوتتى جىل.   تامىزدىڭ جيىرما توعىزى... جاندىرىپ جاندى ءورت ەتتى, ايىقپاس تانگە دەرت ەكتى. بالالار قانشا ەرتە ءوتتى, ىنىلەر قانشا ەرتە ءوتتى, اپالار مەنەن اعالار, اكەلەر مەنەن انالار, قارىنداستار قانشا ەرتە ءوتتى تاستۇعىر مىناۋ وتكەننىڭ ءتۇسىرسىن ەسكە كۇللىسىن. ورناسىن مىناۋ ەسكەرتكىش ساقتاسىن ەلدىڭ ءتىرىسىن. جاپىراق ءۇشىن جايقالار ورتەڭگە وسەر گۇل ءۇشىن! قازاقستانىم كوركەيسىن, جارىلىس ماڭگى قۇرىسىن! تاسي دا بەرسىن بەرەكەڭ, ارتا دا بەرسىن ىرىسىڭ, ارايلى مەنىڭ ابىرالىم, شىرايلى مەنىڭ شىعىسىم!   تامىزدىڭ جيىرما توعىزى... رامازان ايى ۇلى ەلىم, اللادان تىلەك تىلەدىم, سىيعىزىپ ويدى ولەڭگە. جاھاندى جۇتقان جارىلىس بولماسىن ەندى الەمدە! تامىزدىڭ جيىرما توعىزى. باۋىرجان جاقىپ, مەملەكەتتىك «دارىن» سىيلىعىنىڭ لاۋرەاتى.