تاس ءمۇسىندى اسپەتتەگەنشە ولاق مۇسىنشىلەردىڭ قولىنان شىققان مولاق مۇسىندەردى قالپىنا كەلتىرۋدى ويلاسقان دۇرىس بولار ەدى

24 تامىز كۇنى پەتروپاۆل قالالىق جۇمىسپەن قامتۋ جانە الەۋمەتتىك باع­دارلامالار ءبولىمى جانىنداعى الاڭ­قايعا ەسكەرتكىش ورناتىلدى. كىم­نىڭ دەيسىز عوي؟ لەنيننىڭ! ءيا, ءيا, شورتانداي شورشىپ تۇسپەڭىز. «ەستىمەگەن ەلدە كوپ, ەسەك مىنگەن سارتتا كوپ» دەگەن وسى. ەلباسىمىز باستاعان قازاقستان حالقى مارتەبەمىزدى كوتە­رىپ, مەرەيىمىزدى اسىراتىن تاۋەل­سىز­دىكتىڭ 20 جىلدىعىن ەڭسەلى ىستەرمەن قارسى الۋ شارالارىنا جۇمىلا كىرىسكەندە, جەرگىلىكتى بيلىكتىڭ بۇل قىلى­عىن تۇسىنە الماي دالمىز. بىزگە ءمالىم بولعانىنداي, قازاق­ستان حالىقتىق كوممۋنيستىك پارتيا­سى­نىڭ وبلىستىق فيليالى بۇرىنعى ەت كومبيناتىندا ەش ەسكەرۋسىز تۇرعان تاس ءمۇسىندى كوپشىلىك سەرۋەندەيتىن جەرگە قويۋدى پەتروپاۆل قالالىق اك­ىم­دىگىنەن ءوتىنىپ, ءۇشبۋ حات جولداعان. كوزقاراسى مەن ۇستانىمى ءارتۇرلى سايا­سي ۇيىمدى قالالىق ارداگەرلەر كە­ڭەسى مەن ءماسليحاتتىڭ قوشتاي جونە­لۋى تۇسىنىكسىز. ماسەلەنىڭ قالا اكىمى نۇرجان اشىمبەتوۆ توراعالىق ەتكەن قالا قۇرىلىسى كەڭەسىندە قارالىپ, قولداۋ تابۋى دا ەش اقىلعا سىي­ماي­دى. اكىمدىكتىڭ ءباسپاسوز قىزمەتىنىڭ وقيعاعا ايرىقشا ماڭىز بەرگەنى سون­شالىق, جەرگىلىكتى باسىلىمدار ارقى­لى جار سالىپ, جەردەن جەتى قويان تاپقانداي ءماز بولدى. ەرەكشە بەلسەندىلىك تانىتقان ارداگەرلەر ۇيىمى دا, باسقا قولداۋشىلار دا تاس ءمۇسىندى ماڭىزى بار ارحيتەكتۋرالىق, مادەني ەسكەرتكىشكە جاتقىزۋ قيسىنسىز­دى­عىن بىلە تۇرا «كۇن كوسەمىن» قور­عاشتاپ الەك. «ايتپاساڭ ءسوزدىڭ اتاسى ولەدى» دەمەكشى, رەتى كەلىپ قالعاننان كەيىن كو­ڭىلىمىزدە جۇرگەن مىنا ءجايتتى ورتاعا سالعاندى ءجون كوردىك. بىلتىر وبلىس ورتالىعىنىڭ ءار جەرىندە جان-جا­نۋ­ار­­لار مەن ادامدار بەينەلەنگەن گۇل­زار­لار مەن ساياباقتار پايدا بولدى. سو­لاردىڭ ءبىرى پۋشكين جانە سۇتىشەۆ كوشەلەرىنىڭ قيىلىسىنا ورنالاسقان. قارا جەردى توسەنىش ەتىپ وتىرعان قا­زاقتىڭ قارا شالىنىڭ مىجىرايعان مالاقاي سەكىلدى جۇدەۋ تۇرىنە, قۇر سۇلدەرىنە كوز جىبەرىپ, باستاپقىدا اشارشىلىق قۇرباندارىنا قويىلعان بەلگىگە بالاعانبىز. تەك قولىنداعى اسپابىنا قاراپ (قوبىز ەكەنىن ارەڭ اجىراتتىق) قوبىزشى ەكەن عوي دەپ توپشىلادىق. ءيا, اسانقايعى, ءيا قور­قىت بابا دەيىن دەسەڭ, ۇسقىنىنان ادام شوشيدى. ءبىر جەردە كورگەن سي­ياق­تىمىز. ەسىمىزگە ءتۇستى. ۇيگە كەلگەسىن نەمەرەمىزدىڭ بوقشانتايىن اقتا­را باستادىق. «الداردىڭ شايتاندى ال­داۋى» سۋرەتتى كىتاپشاسى كوزىمىزگە وتتاي باسىلدى. انىق سول. كوشى­رىن­دىسى سەكىلدى, اۋمايدى-اۋ! جەردىڭ جىر­­تىعى بولسا كىرىپ كەتۋگە بارسىڭ. ال «فرەگات» ساۋدا ءۇيى جانىندا «جا­يىلىپ جۇرگەن» ق ۇلىندى بيەدەن اۋدەم جەردە مالداس قۇرعان قازاقتىڭ تاعى ءبىر مىجىرايعان شالى وتىر. قولىندا – كارلەن كەسە. العا قاراي ۇمسىنا تۇسكەن. ءمۇسىنشىنىڭ ءدارۋ سۋ­سىندى باپپەن ىشكەن جاننىڭ بەينەسىن بەرمەك ويى ءساتسىز شىققان. ونىڭ قاسىنان ءارلى-بەرلى وتكەن-كەتكەن كەي­بىرەۋلەردىڭ قول جايعان قايىرشىعا ۇقساتىپ, كەسەگە تيىن تاستاپ كەتەتىنىن سول ماڭايدا تۇراتىن تالاي ادام­نىڭ اۋزىنان ەستىدىك. ءوزىمنىڭ دە كۋا بولعانىم بار. ولاق مۇسىنشىلەردىڭ ۇلتتىق نامىسقا تيەتىن وسىنداي مو­لاق دۇنيەلەرىن تۇزەتۋ, قالپىنا كەلتىرۋ جونىندە قانشا ايتىلىپ كەلە جاتسا دا, ەش ەسكەرىلەر ەمەس. وسىنىڭ ال­دىندا عانا ورتالىق دەمالىس سايابا­عىن­دا ەلىمىزدىڭ تانىمال تۇلعالا­رى­نا ارنالعان ەسكەرتكىشتەردىڭ سيىق­سىز­دىعىنان ءبىرازى الىپ تاستالعان بولاتىن. ەندى, مىنە, وبلىس اكىمى سەرىك ءبى­لالوۆتىڭ «20 يگى ءىس» شاراسىن قولداپ, تاۋەلسىزدىگىمىزگە قاتىستى جان جا­دى­راتار اۋقىمدى جۇمىستاردى ءورىس­تە­تۋدىڭ ورنىنا ارحيتەكتۋرالىق, مادە­ني ەسكەرتكىشتەر مەن تاس ءمۇسىندى شا­تاس­تىرعان «شالا شەكسپيرلەر» مەن «تو­لىسپاعان تولستويلاردىڭ» بۇل ارە­كەتى ەل شەجىرەسىندەگى ەرەكشە بەلەسكە دەگەن «سىيى» بولار, ءسىرا؟! سون­شالىقتى اسپەتتەيتىندەي, قالا­نىڭ قاق تورىنە قوياتىنداي لەنين قازىر كىم ەدى؟! ءومىر ەسقالي, سولتۇستىك قازاقستان وبلىسى.