اتا زاڭ جانە مەملەكەتتىك قىزمەت

30 تامىزدا قازاقستان رەس­پۋب­لي­كاسىنىڭ كونستيتۋتسياسى قابىلدانعا­نىنا 16 جىل تولادى. كونستيتۋتسيا قا­بىلدانعان جىلى دۇنيەگە كەلگەن ءسابي­لەر بيىل كامەلەتتىك جاسقا جەتتى. 1995 جىلعى تۇرمىسىمىزدى, ءۇمىت پەن كۇدىك ارالاس قوعامدىق احۋالدى بۇگىنگى كۇنمەن سالىستىرساق, اتا زا­ڭىمىزدىڭ ساپاسىن, ومىرشەڭدىگىن تۇسىنەمىز. 1994-1995 جىلدارى جۇمىس اتقارعان XIII شاقىرىلىمداعى جوعارعى كەڭەس دەپۋتاتى رەتىندە سول جىلدارى ەلدىڭ تۇكپىر-تۇكپىرىندە الەۋمەتتىك-ەكونومي­كالىق احۋالدىڭ كۇردەلىلىگى جونىندە دە, كەيبىر قوعامدىق-ساياسي كۇشتەردىڭ (ولار­­­دىڭ وكىلدەرى جوعارعى كەڭەس قۇ­رامىندا دا بولدى) ەل بىرلىگىن, مەملەكەت تۇتاس­تىعىن, ءتىپتى قازاقستاننىڭ تاۋەلسىزدىگىن قۇندىلىق رەتىندە باعالا­ماي­تىن­دارى­نان دا حاباردار بولدىق. جوعارعى كەڭەس جۇمىسىندا حالىق تۇرمىسىن جاقسارتۋعا قاجەت زاڭداردى قابىلداۋدان گورى ءتۇرلى توپتاردىڭ ساياسي پىكىرتالاستارى باسىم كورىنىس تاۋىپ, تۇرالاپ قالعان كاسىپ­ورىن­دارعا قاجەت ينۆەستيتسيالار تارتۋعا زاڭنامالىق نەگىز جاساۋ كەشەۋىلدەدى. وسى تۇستا, ءسوزسىز, ابس­تراكتسيالىق قيال ەمەس, قازاقستاننىڭ سول كەزەڭ­دەگى احۋا­لىن دا, بولاشاق باسىمدىقتارىن دا, ۇزاق مەرزىمدى تۇراقتى دامۋ شارت­تارىن دا ەسكەرەتىن اتا زاڭ قاجەت بولدى. ءبىر ويشىل كەزىندە زاڭ­داردىڭ قوعام دامۋىمەن بايلانىسىن بىلاي سۋرەتتەگەن ەكەن: «كەز كەلگەن زاڭ وسكەلەڭ ادامعا پىشىلگەن كيىم سەكىلدى بولۋى ءتيىس. ەگەر ول بۇگىنگى كۇنگە عانا پىشىلسە, ادام وسە كەلە, كيىم تارىلىپ, قيىندىق تۋعىزادى. ەگەر ول تىم كەڭ پىشىلگەن بول­سا, ادام كيىمىنە شالىنىپ, قۇلايدى». ءبىزدىڭ اتا زاڭىمىزدىڭ قازاقستان قوعامىنا لايىق پىشىلگەنىن ەل ءومىرىنىڭ ءوزى, مەملەكەتىمىزدىڭ وسى كەزەڭدەگى جەتىستىكتەرى دالەلدەدى. وسىعان وراي 1995 جىلعى قازاقستان حالقى اسسامبلەياسى وتىرىسىنىڭ ءۇزى­لىسى كەزىندە پرەزيدەنت نۇرسۇلتان ءابىش­ ۇلى نازارباەۆتىڭ بىزگە, جاس مەملەكەتتىك قىزمەتشىلەرگە ايتقان ءسوزىن كەلتىرگىم كەلەدى. ەلباسى: «سەندەر مەملەكەتتىك قىزمەتتىڭ جاڭا بۋىنىسىڭدار. قازىر كونستيتۋتسيا جوباسى تالقىلا­نۋدا. قىزۋ پىكىرتالاستار جۇرۋدە. باستى ولشەم – ەل بىرلىگى, مەملەكەت تۇتاستىعى جانە اتا-بابا ارمانى بولعان تاۋەل­سىزدىك بايان­دى­لىعى, حالىق ءومىرىن تۇراق­تى جاقسارتۋ. وسىنى ەشقاشان ۇمىت­پاڭدار», – دەدى. نۇرسۇلتان ءابىش ۇلىنىڭ وسى سوزدەرى ازاماتتىق, ساياسي تۇرعىدا ءبىزدىڭ تەمىر­قازىعىمىز بولدى. كونستيتۋتسيانىڭ 33-بابىندا قازاق­ستان ازاماتتارىنىڭ مەملەكەتتىك قىز­مەتكە كىرۋىنە تەڭ قۇقىعى بار ەكەنى بەلگىلەنگەن. 1995 جىلعى كونستيتۋتسيا قابىل­دانعان سوڭ, مەملەكەتتىك اپپارات تيىمدىلىگىن ارتتىرۋ جانە وسى باپتى تولىق­قاندى جۇزەگە اسىرۋ ءۇشىن پرەزيدەنت الەمدەگى وزىق مەملەكەتتىك قىزمەت ءتاجى­ريبەسىن زەردەلەۋ جونىندە ءوز اكىم­شىلىگىنە تاپسىرما بەردى. 1996 جىلى باس­تالعان وسى جۇمىس اياسىندا ەۋروپا ەلدەرىنىڭ, جاپونيانىڭ, قىتايدىڭ, ما­­لاي­­زيانىڭ, اقش پەن كانادانىڭ, سينگاپۋر مەن جاڭا زەلانديانىڭ, اۆسترا­ليانىڭ, تۇركيانىڭ, رەسەيدىڭ ءتاجىري­بەلەرى زەرتتەلدى. زەرتتەۋ ءناتي­جەسىندە تۋىنداعان ۇسىنىستاردىڭ كەيبىر باعىت­تارى ەلباسى تاراپىنان ماقۇل­دانىپ, مەملەكەتتىك قىزمەت رە­فور­ماسىنا دايىن­دىق باستالىپ كەتتى. پرەزيدەنت 1997 جىلى قازان ايىندا قازاقستاننىڭ 2030 جىلعا دەيىنگى دامۋ ستراتەگياسىندا مەملەكەتتىك قىزمەتتى ۇزاق مەرزىمدى دامىتۋدىڭ نەگىزگى باسىمدىقتارىن بەلگىلەدى. وسى ستراتەگيانى ىسكە اسىرۋدىڭ ءبىر تەتىگى رەتىندە 1999 جىلى «مەملەكەتتىك قىزمەت تۋرالى» زاڭ قابىلداندى. بۇل زاڭنىڭ باستى ەرەكشەلىگىنىڭ ءبىرى – كونستيتۋتسيانىڭ 33-ءشى بابىنىڭ 4-تار­ماعىن جۇزەگە اسىرۋدىڭ ناقتى جولدارى بەكىتىلگەن. ياعني, ازاماتتاردىڭ مەملەكەتتىك قىزمەتكە كىرۋىنىڭ تەڭ قۇقىعىن قالاي جۇزەگە اسىرۋعا بولادى دەگەن سۇراققا جاۋاپ وسى زاڭمەن بەرىلدى. بۇل قۇقىقتى جۇزەگە اسىرۋ شارتىنىڭ ەكى جاعى بار. ءبىر جاعى – ازاماتتاردىڭ مەملەكەتتىك قىزمەتكە كىرۋگە تەڭ قۇ­قىعى. ەكىنشى جاعى – مەملەكەتتىك قىز­مەت­تەگى بوس ورىندار تۋرالى اقپاراتقا قول جەتكىزۋ مۇمكىندىگى. وسى ەكى جاقتى ۇشتاستىرۋ مەملەكەتتىك ورگانداعى بوس لاۋازىمعا جاريا كونكۋرس وتكىزۋ ارقىلى جۇزەگە اسىرىلا­تىنى زاڭمەن بەكىتىلدى. ءبىزدىڭ اتا زاڭىمىزدىڭ 33-بابىنىڭ 4-تارماعىنا ۇقساس باپتار قازاقستانمەن قاتار تاۋەلسىزدىگىن جاريالاعان تمد مەملەكەتتەرىنىڭ ءبىرازىنىڭ كونستيتۋ­تسيالا­رىندا دا بار. بىراق ولار وسى كونتيتۋتسيالىق باپتى جۇزەگە اسىرۋدىڭ تەتىگىن ءالى زاڭ جۇزىندە بەكىتكەن ەمەس. مەملەكەتتىك قىزمەتتى كاسىبيلەن­دى­رۋ­دىڭ تاعى ءبىر جولى – كاسىبي مامان­داردى ساياسي ۇدەرىستەردىڭ ىقپالىنان قورعاۋ. ول ءۇشىن زاڭ جۇزىندە مەملەكەتتىك قىزمەت­كەرلەر ساياسي جانە اكىمشىلىك قىزمەت­كەرلەر بولىپ ەكى توپقا ءبولىندى. اكىم­شىلىك, ياعني, كاسىبي قىزمەتكەر­لەر­دىڭ قىز­مە­تىن توقتاتۋعا ساياسي قىزمەت­كەرلەردىڭ اۋىسۋى نەگىز بولمايدى دەپ زاڭدا ناقتى كورسەتىلدى. وسى ەكى قاعيدالى وزگەرىس قازاق­ستاننىڭ مەملەكەتتىك قىزمەت رەفور­ماسىنىڭ جاڭا كەزەڭىنىڭ باستى ەرەكشەلىگى بولدى. ونىڭ ۇستىنە تمد ەلدەرىنىڭ ارا­سىندا ءبىرىنشى بولىپ قازاقستاندا مەملەكەتتىك قىزمەت ىستەرى اگەنتتىگى قۇرىلدى. وسى جۇيەلى جۇمىس ءناتي­جەسىندە دۇنيە­جۇزىلىك بانك قازاق­ستاندى مەملەكەتتىك قىزمەت رەفورماسى سا­لاسىندا تمد جانە شىعىس ەۋروپا ەلدەرىنىڭ ارا­سىنداعى كوشباس­شىسى دەپ تانىدى. دەگەنمەن, ءومىر ءبىر ورىندا تۇرعان جوق. قوعام ۇدايى دامۋ ۇستىندە. سول سەبەپتەن دە بولار, الەمدە ءوزىنىڭ مەملەكەتتىك قىز­مەتىمەن تولىق قاناعات­تا­ناتىن قوعام جوق. ءبى­راق, ءار قوعام ءوز دامۋ دەڭگەيىنە باي­لا­نىستى مەملەكەتتىك قىز­مەتكە ءتۇرلى تالاپ قويادى. ءبىزدىڭ قوعام دا ءوسۋ ۇستىندە. قوعامنىڭ ءبىر بولىگى بولىپ تابىلاتىن مەملەكەتتىك قىزمەت­شى­لەر­دىڭ وزدەرىنىڭ نەگىزگى مىندەتتەرىن ءتۇسىنۋ دەڭ­گەيى ءوسۋ ۇستىندە. مىسال رەتىندە كەلتىرەيىن. 1999 جىلى ەڭ العاش كونكۋرستار جاريالانىپ, مەملەكەتتىك قىزمەتكە كىرۋگە ۇمىتكەرلەر كونستيتۋتسيانى جانە نەگىزگى زاڭداردى ءبىلۋى ءتيىس تەستىلەرىنەن وتكەندە, ماعان (مەن ول كەزدە مەملەكەتتىك قىزمەت ىستەرى اگەنتتىگىنىڭ توراعاسى ەدىم) ءبىر وبلىس باسشىسى تەلەفون شالدى. ول لاۋازىم يەسىنىڭ كومەك­شىسى تەستتەن وتپەي قالعان ەكەن. ول كىسى ماعان حابارلاسىپ, «وسى مەنىڭ كومەك­شىمە كونستيتۋتسيانى ءبىلىپ نە قاجەتى بار», – دەپ سۇرادى. بۇگىنگى كۇننىڭ بيىگىنەن قارا­ساڭىز, بۇل كۇلكىلى سۇراق سەكىلدى. بىراق سول كەزدە وسىنداي كوزقاراستاردىڭ ءالى دە بولسا قوعامدا دا, مەملەكەتتىك قىزمەتتە دە بولعانى انىق. بۇگىنگى كۇنى «ەگەمەن قازاقستان», «كازاحستانسكايا پراۆدا» گازەتتەرىندە شىعىپ تۇراتىن مەملەكەتتىك قىزمەتتەگى بوس لا­ۋازىمدارعا جاريالاناتىن كونكۋرستار ءبىزدىڭ ازاماتتار ءۇشىن ۇيرەنشىكتى ءىس بولىپ قالدى. بىراق كورشى مەملەكەتتەرگە بار­ساڭىز, ونداي حابارلاندى­رۋ­لاردى تاپ­پايسىز. سەبەبى, ولار ءالى دە قازاقستاننىڭ 1999 جىلعى جاساعان قادا­مىنا ءتۇرلى سەبەپتەرمەن بارا الماي وتىر. مەملەكەتتىك قىزمەتتىڭ قازاقستاندىق مودەلى كوپتەگەن مەملەكەتتەردى قىزىق­تىرۋدا. سونىڭ ءبىر دالەلى – رەسەي ۇكىمە­تىنىڭ مەملەكەتتىك باسقارۋ سالاسىنداعى نەگىزگى جوعارى وقۋ ورىندارى 2009 جىلى ازىرلەپ شىعارعان «مەملەكەتتىك قىزمەت» وقۋلىعىندا الەمدەگى 9 مەملەكەت قانا مىسالعا كەلتىرىلگەن. وسى 9 مەملەكەتتىڭ اراسىندا ۇلىبريتانيا, اقش, فرانتسيا, گەرمانيا, قازاقستان جانە قىتايعا عانا جەكە تاراۋلار ارنالعان. ياعني, قازاق­ستاننىڭ مەملەكەتتىك قىزمەت جۇيەسى مەن وسى سالاداعى تاجىريبەسى الپاۋىت مەملەكەتتەر تاجىريبەسىمەن قاتار رەسەي وقۋ ورىندارىندا وزىق ۇلگى رەتىندە زەرتتەلەدى. دەمەك, قازاقستان بۇل سالادا كوشباس­شىلاردىڭ ءبىرى رەتىندە تانىلادى. ءبىز ەڭ العاشقى بولىپ كونكۋرس جۇيە­سىن ەنگىزسەك, كەيىن سول كونكۋرس جۇيە­سىنىڭ تازالىعىن قامتاماسىز ەتۋ مەن مەملەكەتتىك قىزمەتكە ەڭ لايىقتى ازاماتتاردى تارتۋ ماڭىزدى بولدى. ءبىز مەملەكەتتىك قىز­مەتكەرلەردى ساياسي جانە اكىمشىلىك دەپ ءبولىپ, كاسىبي دەڭگەيىن كوتەرگىمىز كەلسە, كەيىن سول تەتىكتى ودان ءارى جەتىلدىرىپ, كادر­لىق ساياساتتا جانە مەملەكەتتىك ورگان­­داردىڭ جۇمىسىندا ىرعاقتى ساباق­تاس­تىقتى قامتاماسىز ەتەتىن تەتىكتى ىزدەۋىمىز كەرەك بولدى. سول جولداعى قادامنىڭ ءبىرى – 2007 جىلعى ورتالىق اتقارۋشى ورگانداردا جاۋاپتى حاتشى لاۋازىمىن ەنگىزۋ ەدى. بۇل قادام قازاقستان مەملەكەتتىك قىزمەتىنىڭ ەرەكشەلىكتەرىنەن, ومىرلىك ءتا­جىريبەدەن جانە ورتالىق مەملەكەتتىك ورگانداردا جۇمىس ساباقتاستىعىن قامتا­ماسىز ەتۋ قاجەتتىلىگىنەن تۋعان ەدى. وتكەن ءتورت جىلدا, العاشقى كەزەڭنىڭ قيىن­دىقتارىنا قاراماستان, جاۋاپتى حاتشى ينستيتۋتى قالىپتاستى. بۇگىن جاۋاپتى حاتشى ستراتەگيالىق جوسپارلاۋدى جۇزەگە اسىرۋ ىسىندە شەشۋشى ءرول اتقارىپ وتىرعان لاۋازىمعا اينالدى. 2005 جىلى سىبايلاس جەمقورلىققا قارسى كۇرەستىڭ ءبىر تەتىگى رەتىندە مەملەكەتتىك قىزمەت ىستەرى اگەنتتىگىنىڭ ءار وبلىس پەن الماتى, استانا قالالارىندا ءتار­تىپتىك كەڭەستەر قۇرىلدى. تارتىپتىك كە­ڭەس­تەر ءوز قۇزىرەتىنە سايكەس وڭىرلەردەگى مەملەكەتتىك قىزمەتكەرلەردىڭ زاڭناما مەن بەلگىلەنگەن تالاپتاردى بۇزۋ فاكتىلەرى, سىبايلاس جەمقورلىق, تاعى دا باسقا زاڭ بۇزۋشىلىقتارىن قاراۋمەن اي­نالىسادى. بۇگىنگى كۇنگە دەيىن تارتىپتىك كەڭەس­تەردىڭ جيناقتاعان تاجىريبەسى مەملەكەتتىك قىزمەتكەرلەردىڭ ەتيكانى ساقتاۋىندا ءجا­نە سىبايلاس جەمقورلىققا قارسى كۇرەستە كەلەر قادامدارعا نەگىز بولا الادى. ارينە, زاڭىمىز تەز وزگەرگەنىمەن, ءدىلىمىز ءبىر كۇندە وزگەرمەيدى. ونى وزگەرتۋ ءۇشىن زاڭ بۇلجىتپاي ورىندالۋى قاجەت. زاڭنىڭ ورىندالۋىنا كەدەرگى دە از ەمەس. ايماقتىق كوشباسشىلىققا جانە قو­عامنىڭ جەتىلگەن تالابىنا سايكەس بولۋ ءۇشىن, مەملەكەتتىك قىزمەت تە تۇراقتى دامۋى ءتيىس. سوڭعى جىلدارى باستاپقى كەزەڭگە قاراعاندا, كونكۋرستىق جۇيەگە قوعامنىڭ سەنىم دەڭگەيى ازايدى. مەملەكەتتىك قىزمەتكەرلەردىڭ دە تەك ءوز ءبىلىمى مەن بىلىگىنە سۇيەنىپ, ساتىلاپ لاۋازىم­دارمەن جوعارىلايمىن دەگەن سەنىمى ازايدى. سول سەبەپتەن ەلباسى ۇنەمى مەملەكەتتىك قىزمەتتىڭ ساپاسىن ارتتىرۋداعى جاڭا باسىمدىقتارعا نازار اۋدارۋدا. مىسالى, 2008 جىلى حالىقارالىق كونفەرەنتسيادا سويلەگەن سوزىندە ەلباسى مەملەكەتتىك قىز­مەتتە كادر ىرىكتەۋ ماسەلەسىنىڭ ءالى دە بولسا وڭتايلى جولعا تۇسپەي كەلە جاتقانىنا, قازىرگى زامان تالابىنا سايكەس مەملەكەتتىك قىزمەت­كەرلەردىڭ ىشىندەگى باسقارۋ ەليتاسىن قالىپتاس­تىرۋ وزەكتىلىگىنە باسا نازار اۋداردى. 2011 جىلعى 17 ساۋىردە كەڭەيتىلگەن ۇكىمەت ماجىلىسىندە وسى باعىتتاعى شارالاردى شۇعىل جەتىلدىرىپ, مەملەكەتتىك قىزمەتتى جەتىلدىرۋدىڭ جاڭا كەزەڭىن باستاۋ قاجەت ەكەنىن اتاي كەلە, مەملەكەت باسشىسى ۇكi­مەت ال­دىنا بىرنەشە مىندەت قوي­دى: سىبايلاس جەم­قور­لىقپەن كۇرەستi كۇشەيتۋ, كادرلىق رەزەرۆتi قالىپتاس­تىرۋ, مەملەكەتتىك قىزمەتتi ساياسي جانە اكiمشiلiك توپ­تارعا جىكتەۋدى جالعاس­تىرۋ, روتاتسيا­لىق قاعيدانى ەنگىزۋ. مەملەكەتتىك قىزمەتتى جە­تىلدىرۋ, حا­لىققا قىزمەت ساپاسىن ارتتىرۋ ىسىندە بيىلعى جىلى 21 شىلدەدە پرەزيدەنت جارلىعىمەن بەكىتىلگەن «قازاقستان رەس­­پۋبليكاسى مەملەكەتتىك قىزمەتى جاڭا مودەلىنىڭ تۇ­جىرىمداماسى» جاڭا سەرپىن بەردى. تۇجىرىمدامانى جۇزەگە اسىرۋ – بارلىق ءتيىستى مەملەكەتتىك ورگانداردىڭ مىندەتى. مەملەكەتتىك قىزمەت ىستەرى اگەنتتىگىنىڭ وسى باعىتتاعى ماقساتتى كورسەتكىشتەرى: - كادرلاردى كونكۋرستىق ىرىكتەۋ جۇيە­سىنە حالىق سەنىمىنىڭ دەڭگەيىن ارتتىرۋ; - مەملەكەتتىك قىزمەتتە مەريتوكراتيا قاعيداتىنىڭ ساقتالۋىنا سەنىم دەڭگەيىن ارتتىرۋ; - مەملەكەتتىك قىزمەتشىلەردىڭ كاسىبيلىگىن ارتتىرۋ, ونىڭ ىشىندە مەملەكەتتىك ورگاننىڭ باسشىسى اۋىسقان كەزدە مەملەكەتتىك اكىمشىلىك قىزمەت­شىلەردى نەگىزسىز بوساتۋدان قورعاۋ; - جوعارى كورپوراتيۆتىك مادە­نيەت­تى قالىپتاستىرۋ جانە مەملەكەتتىك قىز­مەتشىلەر ەتيكاسىن جەتىلدىرۋ. تۇجىرىمدامادا مەملەكەتتىك ساياسي قىزمەتتەن, «ا» باسقارۋشىلىق كورپۋسى جانە «ب» اتقارۋشىلىق كورپۋسىنان تۇراتىن جاڭا كورپۋستىق ۆەرتيكالدى قالىپتاستىرۋ قاراستىرىلعان. «ا» كور­پۋسى – ستراتەگيالىق شەشىمدەر قابىل­داۋ مەن ولاردى ورىنداۋ اراسىنداعى ءوزارا بايلانىستى, سونداي-اق مەملەكەتتىك ورگاننىڭ كادر ساياساتى مەن ۇزاق مەرزىمدى مىندەتتەرىن ىسكە اسىرۋداعى سا­باقتاستىقتى قامتاماسىز ەتەتىن مەملەكەتتىك قىزمەتتىڭ باسقارۋشى ەليتاسى بولماقشى. «ب» كورپۋسى – «ا» باس­قارۋشىلىق كورپۋسىنىڭ جەتەكشىلىگىمەن جوسپارلاردى ىسكە اسىرۋ (اتقارۋ­شىلىق) قىزمەتىن جۇزەگە اسىراتىن مەملەكەتتىك قىزمەتشىلەر. «ا» باسقارۋشىلىق كورپۋسىنىڭ كادر رەزەرۆىن قالىپتاستىرۋدى جانە «ا» كورپۋسىنىڭ مەملەكەتتىك قىزمەت­شىلەرىنە قاتىستى كادر ساياساتىن ءجۇر­گىزۋدى قازاقستان رەسپۋبليكاسى پرەزيدەنتى اكىمشىلىگىنىڭ باسشىسى باسقا­راتىن پرەزيدەنت جانىنداعى كادر ساياساتى جونىندەگى ۇلتتىق كوميسسيانىڭ جۇزەگە اسىرۋى كوزدەلگەن. «ب» كورپۋسىنا ىرىكتەۋ ەكى كەزەڭنەن تۇراتىن كونكۋرس نەگىزىندە جۇزەگە اسى­رىلاتىن بولادى. ءبىرىنشى كەزەڭدە اگەنت­تىك بەلگىلى ءبىر مەرزىمدىلىكپەن (مىسالى, ايىنا ءبىر رەت) زاڭنامانى ءبىلۋ جونىندەگى تەستىلەۋدىڭ نەگىزىندە جانە كاسىبي جانە جەكە قۇزىرەتتەرى بويىنشا كادر رەزەرۆىنە جيناقتاۋدى جۇرگىزەتىن بولادى. ول ءۇشىن قاجەت بولعان جاعدايدا اڭگىمەلەسۋ, ەسسە جازۋ كوزدەلگەن. ەكىنشى كەزەڭدە مەملەكەتتىك ورگان بوس لاۋا­زىمعا كونكۋرس وتكىزەدى. وعان كادر رەزەرۆىنە ءبىرىنشى كەزەڭدە ىرىكتەلگەن ازاماتتار عانا قاتىسا الادى. كونكۋرستىق ىرىكتەۋدىڭ اشىقتىعى مەن وبەكتيۆتىلىگىنىڭ اسا جوعارى دەڭ­گەيىن قامتاماسىز ەتۋگە باعىتتالعان بىرقاتار شارالار, اتاپ ايتقاندا: مەملەكەتتىك ورگانداردىڭ كونكۋرستىق كو­ميس­سيالارىنىڭ قۇرامىنا سىرتقى ساراپ­شىلاردى قوسۋ, كونكۋرستىق كوميسسيا مۇشەلەرىنىڭ جاۋاپكەرشىلىگىن بەلگىلەۋ, اڭگىمەلەسۋ ءراسىمىنىڭ اشىقتىعىن قام­تاماسىز ەتۋ ءۇشىن ونىڭ جاريا­لىلىعىن باق پەن قوعام وكىلدەرىنىڭ باقىلاۋ مۇمكىندىگى كوزدەلەدى. «قازاقستان-2030» دامۋ ستراتە­گياسىندا مەملەكەتكە قىزمەت ەتۋ ۇلتقا (قوعامعا) قىزمەت ەتۋ ۇعىمىنىڭ ءسينونيمى بولۋعا جانە مەملەكەتتىك قىزمەت­تەردى تۇتىنۋشى بولىپ تابىلاتىن حا­لىق­قا باعىتتالۋعا ءتيىس دەپ كورسەتىلگەن. بيىل 5 شىلدەدە ءبىر توپ ساياسي مەملەكەتتىك قىزمەتكەرلەردەن انت قابىل­دا­عاندا, ەلباسى بىزگە «مەملەكەتتىك قىز­مەتكە ءبىز جۇمىس ىستەۋ ءۇشىن شا­قىرامىز. سەبەبى حالقىمىز ءبىزدى وزىنە جۇمىس ىستەۋ ءۇشىن جالدايدى. سون­دىقتان ءبىز ءوزىمىزدىڭ حالىقتىڭ قىز­مەتشىسى ەكەنىمىزدى ۇمىت­پايىق. مان­ساپقورلىق كورسەت­پەي, حالىققا جاقىن, ءار ىستە ءادىل بولىپ, ءاربىر ادامنىڭ مۇڭ-مۇقتاجىن قولدان كەلگەنشە ءتۇسىنىپ, ونى ءدال سول كەزدە ورىنداي الماساڭ دا ءتۇسىندىرىپ, دۇرىس جاۋاپ بەرىپ, شىعارىپ سالۋ – ءبىزدىڭ پارىزىمىز. سوندا اكىمشىلىك تە, مەملەكەتتىك قىزمەتكەرلەر دە حالىققا جاقىن بولادى» دەدى. اتا زاڭىمىز ەلدى تۇراقتى دامىتۋ مەن مەملەكەتىمىزدى نىعايتۋ جولىنداعى جەتىستىكتەردىڭ قۇقىقتىق نەگىزى بولسا, ەلباسىمىزدىڭ وسى سوزدەرى ءاربىر مەملەكەتتىك قىزمەتشى ءۇشىن باستى قاعيداعا اينالۋى ءتيىس. ءاليحان بايمەنوۆ, قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ توراعاسى.