كادەت كورپۋسى

وسى كۇندەرى قورعانىس مينيس­ترلىگىنىڭ شوقان ءۋاليحانوۆ اتىنداعى كادەت كورپۋسىنىڭ وقۋ ورتالىعىندا جاس جاۋىنگەرلەر كۋرسى وتۋدە. وعان بيىل وقۋعا تۇسكەن 209 كۋرسانت قاتىسۋدا. اتالعان كۋرس 5 تامىز كۇنى باستالعان. وسى كەزدەن باستاپ كۋرسانتتار دالادا ورنالاسقان شاتىرلى قالاشىقتا تۇرىپ, كۇن سايىن تاڭەرتەڭنەن كەشكە دەيىن اسكەري دايىندىقتان وتۋدە. كادەت كورپۋسىنىڭ باسشىسى, پودپولكوۆنيك تالعات باۋدينوۆتىڭ ايتۋىنشا, وقۋ ور­تالىعىندا كۋرسانتتارعا تەوريالىق ساباقتار ءىس جۇزىندە كورسەتىلۋدە. مۇندا ولار دەنە تاربيەسى جاتتىعۋلارىن جاساپ, اشىق الاڭدا وكوپتا جاتىپ, وزىنە قارسى كەلە جاتقان تانك پەن باسقا دا اۋىر تەحنيكالارمەن بەتپە-بەت كەزدەسىپ, جاۋ اسكەرىنە قايمىقپاي قارسى تۇرۋدى, قارۋ-جاراقتىڭ بارلىق تۇرىنەن اتۋدى, قارۋ-جاراقتاردى بولشەكتەپ, قايتا جيناۋدى, اۋىر تەحنيكالاردى جۇرگىزۋدى ۇيرەنۋدە. جاقىندا ءبىز قورعانىس ءمينيسترلى­گىنىڭ ماماندارىمەن بىرگە وقۋ ورتالى­عىندا بولىپ, جاس جاۋىنگەرلەر كۋرسى­مەن تانىستىق, كۋرسانتتاردىڭ ءبارى اسكە­ري دايىندىقتان ءوتىپ, قارۋ-جاراقتىڭ بار­لىق تۇرىنەن اتۋدى ۇيرەنىپ, وفي­تسەرلەردىڭ بەرگەن تاپسىرمالارىنىڭ ءبا­رىن مۇلتىكسىز ورىنداپ جاتقاندارىن كور­دىك. وسى جەردە كادەت كورپۋسىنىڭ باسشىسى, پودپولكوۆنيك ت.باۋدينوۆ بىزگە وقۋعا تۇسكەن كۋرسانتتاردىڭ دايىن­دىعى جونىندە ايتىپ بەردى. ونىڭ اي­تۋىنشا, بيىل كادەت كورپۋسىنا وقۋعا تۇسەمىن دەۋشىلەردىڭ سانى كوبەيگەن. بايقاۋ بويىنشا ورتا ەسەپپەن ءبىر ورىن­عا ءۇش ادامنان كەلگەن. قابىلداۋ كوميس­سياسىن­داعى كاسىبي ىرىكتەۋ كانديدات­تاردىڭ دەنساۋلىعىن, دەنە تاربيەسى دايىندى­عىن, پسيحولوگيالىق جانە جال­پى ءبىلىمىن كەشەندى تۇردە ءۇش كەزەڭ بو­يىنشا زەرتتەۋ ارقىلى ىسكە اسىرىلدى. ءبىرىنشى كەزەڭدە جاس جىگىتتەر مەديتسي­نالىق, دەنە تاربيەسى جانە پسيحولوگيا­لىق كورسەتكىشتەرى بو­يىنشا ىرىكتەلدى. ەكىنشى كەزەڭدە ولاردىڭ مەملەكەتتىك سەرتي­في­كاتتاعى بال­ل­دا­رى ەسكەرىلسە, ءۇشىن­شى كەزەڭدە وسى سىناق­تار­دان ءوت­كەن كانديداتتار قابىل­داندى. بۇگىنگە دەيىن 1680 سەرجانت ءتۇ­لەپ ۇش­سا, قا­زىر 416 كادەت ءبىلىم الۋدا. دەگەنمەن, تاياق­تىڭ ەكى ۇشى بار دەگەندەي, بي­ىل وقۋ­عا تۇسكەن كۋر­­سانت­تاردىڭ اراسىنان 3 ادام اسكەري دايىندىقتى مەڭگەرە الماي, ساباق ۇلگەرىمىنىڭ ناشارلىعىنا بايلانىس­تى وقۋدان شىعارىلدى. كادەت كورپۋسى – ورتا­لىق ازيا وڭىرىندەگى تەڭدەسى جوق وقۋ ورنى. ونىڭ باستى مىندەتى – ءبىلىمى مەن ءبى­لىگى جوعارى سەرجانتتار ازىرلەۋ. ال وقۋعا ءتۇسىپ, اسكەري سىناقتاردان وتە الماي, اسكەري تارتىپكە باعىنعىسى كەلمەي, ءوز ىسىنە ءجۇردىم-باردىم قاراعان ادامدار سەرجانت اتاعىنا لايىق ەمەس. سەرجانت ەرتەڭگى كۇنى ءبىر ۆزۆود جاۋىنگەرگە ۇلگى كورسەتەتىن, سولارعا ۇلگى بولاتىن اسكەري قىزمەتشى بولۋى كەرەك. سوندىقتان كادەت كورپۋسىنا سەرجانتتاردى دايىنداۋدا قاتاڭ تالاپ قويىلادى. وسىنداي تالاپ پەن ءتارتىپتىڭ ارقاسىندا وسىندا وقىپ, ءبىلىم العان جاستار ناعىز ازامات بولىپ شىعادى, جاۋىنگەرلىك دوستىقتىڭ نە ەكەنىن سەزىنەدى. ولار ناعىز كوماندير رەتىندە, ءوز قاراما­عىنداعىلارعا قامقورشى ءارى ءوز جەرىنىڭ ناعىز قورعاۋشىسى بولۋدى ۇيرەنەدى. ش.ءۋاليحانوۆ اتىنداعى كادەت كور­پۋسى 1996 جىلى قۇرىلعان بولاتىن. رەسەيدىڭ ءوزى سەرجانتتاردى دايىنداۋ ىسىنە ەندى عانا كىرىسىپ جاتقاندا, ءبىزدىڭ ەلىمىزدە سەرجانت­تاردى دايىنداۋ وسىدان 15 جىل بۇرىن باستالعانى كوڭىلىمىزدى وسىرەدى. قازىر كورپۋستا 772 ادام قىزمەت ەتۋدە. سونىڭ ىشىندە 400-دەن استامى كۋرسانتتار بولسا, ولارعا 67 وفيتسەر  ءبىلىم بەرۋدە. كادەت كورپۋسىنا «جاس ۇلان» رەسپۋب­ليكالىق مەكتەبىنىڭ تۇلەكتەرى, 21 جاسقا دەيىن اسكەري مەكتەپ-ينتەرناتتا وقىعان, 23 جاسقا دەيىن اسكەري بورىشىن وتەگەن جاۋىنگەرلەر وقۋعا تۇسە الادى. ونىڭ تۇلەكتەرى موتواتقىشتار اسكەرلەرىنىڭ كىشى كومانديرى, اۆتوموبيل جانە بروندى تانك تەحنيكاسىن جوندەيتىن سلەسار, كومپيۋتەر وپەراتورى, 3 ساناتتاعى جاياۋ اسكەر­لەردىڭ بروندى تانك ءماشي­نەسىنىڭ جۇرگىزۋشىسى (بمپ) ماماندىعىنا يە بولادى. اتالعان كورپۋس 2013 جىلى استانا­داعى ۇلتتىق قورعانىس ۋنيۆەرسيتەتىنە كوشۋدى ويلاستىرۋدا. سودان كەيىن سەرجانتتار اكادەمياسىن نەمەسە ينستيتۋ­تىن اشۋ ماقسات ەتىلىپ وتىر. داستان كەنجالين.