تاراۋ-تاراۋ تابىس تالداندى, كادر قادىرى قوزعالدى
ەڭ الدىمەن سىزدەرگە, سىزدەر ارقىلى قازاقستاننىڭ بارلىق ۇستازدار قاۋىمىنا ەلباسىمىز نۇرسۇلتان ءابىش ۇلى نازارباەۆتىڭ شىن ىقىلاستى سالەمى مەن قۇتتىقتاۋىن جەتكىزۋدى وزىمە پارىز سانايمىن, دەدى مەملەكەتتىك حاتشى. زاڭعار قالامگەرىمىز مۇحتار اۋەزوۆتىڭ «ۇستازدىق – ۇلى نارسە» دەگەن ءسوزى ارقاشان ءسىزدەردىڭ ەڭبەكتەرىڭىزگە بەرىلەر ءادىل دە ۇزدىك باعا بولىپ قالا بەرەدى. ويتكەنى, ۇستازدار, مۇعالىمدەر قاي كەزەڭدە دە جاس ۇرپاقتى جاقسىلىق پەن ىزگىلىككە تاربيەلەيتىن تۇلعالار. وتانىمىزدىڭ ادال دا ابزال ازاماتتارىن, شىنايى پاتريوتتارىن تاربيەلەيتىن قاۋىم. سوندىقتان دا ۇستاز ەڭبەگى يگىلىكتى ەڭبەك, يماندى ەڭبەك. تاۋەلسىز ەلىمىزدىڭ بۇگىنى مەن ەرتەڭىنە قىزمەت جاسايتىن, ءبۇگىنگى اعا ۇرپاق باستاعان ەرەن ىستەر مەن ەلەۋلى باستامالاردى جالعاستىراتىن, ەلىمىزدىڭ دامۋى مەن وركەندەۋىنە وزىندىك قولتاڭبالارىن سالاتىن جاس ۇرپاقتى ءتاربيەلەۋدىڭ ماڭىزى مەن ءمانى وتە جوعارى, وتە جاۋاپتى. سىزدەردىڭ جاس ۇرپاقتى تاربيەلەۋ سالاسىنداعى قولدارىڭىز قۋاتتى, جۇرەكتەرىڭىز شۋاقتى بولسىن, دەدى.
ول بۇدان كەيىن تۇڭعىش پرەزيدەنتىمىز نەگىزىن قالاپ, الداعى ماقساتى مەن مۇراتىن بەلگىلەپ بەرگەن ومىرشەڭ تاۋەلسىز مەملەكەتىمىزدىڭ ستراتەگيالىق جوسپارلارىن جۇزەگە اسىرۋدا, ەل ەكونوميكاسىن, رۋحانياتىن وركەندەتۋدە ۇستازداردىڭ قوسىپ وتىرعان ۇلەسىن ەرەكشە اتاپ ءوتتى. ءبىرىنشى پەداگوگيكالىق فورۋمنىڭ تاۋەلسىزدىكتىڭ 20 جىلدىعى قارساڭىندا جاڭا ەلوردامىزدا ءوتۋىنىڭ وزىندىك نىشاندىق ءمانى بار ەكەنىن, بۇل تۇرعىدان كەلگەندە كۇللى ۇستازدار قاۋىمى استاناعا كەلىپ وتىر دەۋگە بولاتىنىن العا تارتتى. سول سەكىلدى قانات ساۋداباەۆ 20 جىل ىشىندەگى تۇڭعىش پرەزيدەنتىمىزدىڭ كەمەڭگەر باسشىلىعىنىڭ ناتيجەسىندە جەتكەن جەتىستىكتەرىمىزگە, الداعى اسۋلارىمىزعا, الەمدىك دارەجەدەگى ابىروي, بەدەلىمىزگە توقتالىپ, نۇرسۇلتان ءابىش ۇلىنىڭ ءبىلىم سالاسىنا, سونىڭ ىشىندە مەكتەپكە جاساپ كەلە جاتقان ۇدايى قامقورلىعىن ءارتۇرلى اتاۋلارداعى ارنايى باعدارلامالاردان سىزدەر جاقسى بىلەسىزدەر. تاۋەلسىزدىكتىڭ الدىڭعى اۋىر جىلدارىندا دا مەكتەپ مەملەكەت قامقورلىعىنان تىس قالعان جوق. بۇل سالاعا جىل سايىن قارجىنىڭ كولەمى وسكەن ۇستىنە ءوسىپ كەلەدى. مۇعالىمدەردىڭ ءال-اۋقاتى مەن تۇرمىسىن جاقسارتۋدا جاسالىپ جاتقان قامقورلىقتار ەشقاشان تولاستامايدى. ال سىزدەر بۇعان جاس ۇرپاقتى جاقسىلىققا, ىزگىلىككە, وتانشىلدىققا, ەلشىلدىككە تاربيەلەۋدە ەڭ جوعارى كورسەتكىشتەرمەن جاۋاپ بەرەدى دەگەن سەنىم زور. ويتكەنى, ۇستاز – مەكتەپ جۇرەگى, مەكتەپ ءبىلىم – جۇرەگى, ءبىلىم – ءوسىپ-وركەندەۋدىڭ كەپىلى. ءبىز سىزدەرگە ەڭ قىمباتتىمىزدى – بولاشاقتىڭ باياندى نەگىزىن قالايتىن ۇرپاعىمىزدى سەنىپ تاپسىرىپ وتىرمىز. سول سەنىم بيىگىنەن سىزدەردى كورە بەرەمىز دەپ سەنەمىز, دەدى قانات بەكمىرزا ۇلى.
پرەزيدەنت اكىمشىلىگى, پرەمەر-مينيستر كەڭسەسىنىڭ قىزمەتكەرلەرى, پارلامەنت ءماجىلىسىنىڭ دەپۋتاتتارى, استانا, الماتى قالالارى مەن وبلىس وكىلدەرى, وزگە دە ازاماتتار قاتىسقان القالى جيىندا ءبىلىم جانە عىلىم ءمينيسترى باقىتجان جۇماعۇلوۆ وقۋ سالاسىن جان-جاقتى قامتىعان مازمۇندى بايانداما جاسادى. ول بۇل فورۋمنىڭ پەداگوگتار, اتا-انالار, كاسىپكەرلەر جانە ازاماتتىق قوعام وكىلدەرىنىڭ بايلانىسىن قامتاماسىز ەتۋ, وتانىمىزدا ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ, ازاماتتىق قوعامدىق ينستيتۋتتاردىڭ قاتىسۋىن كەڭەيتۋ ماقساتىندا وتكىزىپ وتىرعانىن تىلگە تيەك ەتتى. ەلباسىنىڭ باستاماسىمەن ءتاۋەلسىزدىكتىڭ العاشقى جىلدارىنان بەرى اتالمىش سالادا ايتۋلى جوبالاردىڭ جۇزەگە اسىپ جاتقانىن, سونىڭ ءبىر ادەمى كورىنىسى «بولاشاق» باعدارلاماسى, ءبىلىم نارىعىنىڭ قالىپتاسۋى ەكەنىنە ناقتى دالەل-دايەكتەر كەلتىردى. يۋنەسكو-نىڭ دەرەكتەرىنە ءسايكەس ءبىز ءبىلىم بەرۋدى دامىتۋ يندەكسى بويىنشا, الەمدەگى 129 ەلدىڭ ىشىندە 4-ءشى ورىندامىز. ال ساۋاتتىلىق دەڭگەيى بويىنشا 177 مەملەكەتتىڭ اراسىندا 14-ءشى ورىندى يەلەنىپ وتىرمىز. TIMSS وقۋ جەتىستىكتەرىنىڭ حالىقارالىق سالىستىرمالى زەرتتەۋلەرىندە 36 ەلدىڭ اراسىندا ءبىزدىڭ وقۋشىلار ماتەماتيكا بويىنشا – 5-ءشى, ال جاراتىلىستانۋدان 11-ءشى ورىندامىز. سوڭعى 10 جىلدا ءبىلىم بەرۋ جۇيەسىن قارجىلاندىرۋ 7,5 ەسەگە ارتتى, دەدى مينيستر. ول بۇدان كەيىن «نازارباەۆ زياتكەرلىك مەكتەپتەرىنىڭ» قۇرىلعانىن, بۇل پرەزيدەنت ايتقانداي, «قازاقستاننىڭ زياتكەرلىك ەليتاسىن تاربيەلەۋدىڭ ىرگەتاسى» بولاتىنىن جەتكىزدى. سونىمەن ءبىرگە, ەلباسىنىڭ باستاماسىمەن جانە قولداۋىمەن «نازارباەۆ ۋنيۆەرسيتەتىنىڭ» اشىلىپ, جۇمىس ىستەپ جاتقانىن, ءۇش تۇعىرلى ءتىلدى وقىتۋ جوباسى ەنگىزىلگەنىن اتاپ ءوتتى.
2011 جىلى ءبىلىم بەرۋدى دامىتۋدىڭ جاڭا كەزەڭى باستالدى. مەملەكەت باسشىسى قازاقستاندى الەمدىك دەڭگەيدەگى ءبىلىم ورتالىعىنا اينالدىرۋ تۋرالى بيىك ماقسات قويدى. ءبىلىم بەرۋدى دامىتۋدىڭ مەملەكەتتىك باعدارلاماسى قابىلداندى. بيىلعى وقۋ جىلىنىڭ جانە الداعى ونجىلدىقتىڭ باستى ەرەكشەلىگى – وقىتۋدىڭ تۇبەگەيلى جاڭا ساپاسىنا قول جەتكىزۋگە بارىنشا كوڭىل ءبولۋ, دەگەن مينيستر بۇل جۇمىس ەڭ الدىمەن مۇعالىمدەرگە قاتىستى ەكەنىن, ولار وقىتۋ بويىنشا باستى تۇلعا بولىپ ەسەپتەلەتىنىن العا تارتىپ, سوندىقتان دا مۇعالىم كاسىبى قوعامدا ەڭ بەدەلدى, قۇرمەتتى ماماندىققا اينالۋى ءتيىس, دەدى. ول مۇعالىمدەردىڭ ايلىعى 1 شىلدەدەن باستاپ 30 پايىزعا كوتەرىلگەنىن, 1 قىركۇيەكتەن جوعارى كاتەگوريالارى بار ۇستازدار بىلىكتىلىگى ءۇشىن لاۋازىمدىق جالاقىسىنا 100 پايىز كولەمدە اقى الاتىنىن دا اتاپ ءوتتى.
القالى باسقوسۋدا ايتىلعان تاعى ءبىر ماسەلە, جوعارى وقۋ ورىندارىندا مۇعالىمدەردى دايىنداۋ جۇيەسىن جاڭارتۋ, جۇمىس ىستەپ جاتقان ازاماتتاردى تالاپقا ساي قايتا دايارلاۋ, بىلىكتىلىگىن ارتتىرۋ بولدى. بۇل جونىندە باقىتجان جۇماعۇلوۆ, پەداگوگيكالىق ماماندىق بويىنشا مەملەكەتتىك گرانتقا ءوتۋ بالى – ەلىمىزدەگى ەڭ تومەنگى بالل بولىپ تۇر. زاڭگەر جانە ەكونوميست ماماندىعىن ايتپاعاننىڭ وزىندە, ۆەتەريناريادان دا تومەن, ياعني, قابىلداۋ ەڭ تومەنگى بالل بويىنشا جۇرگىزىلۋدە. شەتەلدىك ءتاجىريبەگە جۇگىنسەك, ولاردا مۇلدە باسقا. مىسالى, وڭتۇستىك كورەيادا ۇزدىك مەكتەپ بىتىرۋشىلەردىڭ 5 پايىزى, فينليانديادا – 10, سينگاپۋر مەن گونكونگتا 30 پايىزى مۇعالىمدىك ماماندىقتى تاڭدايدى ەكەن, دەي كەلىپ, الدا تۇرعان وزگە دە ماقسات-ءمىندەتتەرگە توقتالدى. سونىڭ ءبىرى «داڭقتى مۇعالىمدەر كىتابى» اتتى ينتەرنەت باسىلىمدى ۇيىمداستىرۋ, 12 جىلدىق وقىتۋعا كوشۋگە بايلانىستى مەكتەپتەر قۇرىلىسىنىڭ جاڭا باعدارلاماسىن ىسكە اسىرۋ قاجەتتىگىن بايانداپ, تاياۋ جىلدارى 522 جاڭا مەكتەپ سالۋ جوسپارلانىپ وتىرعانىن, بىزگە قاراعاندا تۇرعىن حالقى 10 ەسە كوپ رەسەيدە وسى كەزەڭدە 670 مەكتەپتىڭ قۇرىلىسى باستالاتىنىن جەتكىزدى. تەحنيكالىق جانە كاسىپتىك ءبىلىم بەرۋ, جوعارى وقۋ ورىندارى تۋرالى دا كەلەلى ءماسەلەلەردى قوزعاپ, قازىر ەلىمىزدە 148 جوعارى وقۋ ورنى بولسا, ونىڭ 95-ءى ۋنيۆەرسيتەت ەكەنىن, الداعى 20 جىلدا «ستۋدەنتتىك باسپانا» جۇزەگە اساتىنىن, ەلباسى تاپسىرماسىنا وراي, «جاس ۇلان» بىرىڭعاي بالالار مەن جاسوسپىرىمدەر ۇيىمى» قۇرىلاتىنىن, بۇل بالالاردى قازاقستاندىق پاتريوتيزم رۋحىندا تاربيەلەۋگە ەرەكشە ۇلەس قوساتىنىن تىلگە تيەك ەتتى. ەڭ باستىسى, ەلباسى ن.نازارباەۆتىڭ «رەسپۋبليكانىڭ بارلىق وقۋ ورىندارىندا ءبىلىم ساپاسىن جاقسارتۋ كەرەك» دەگەن تاپسىرماسىنا ءارقايسىمىز ءوز ۇلەسىمىزدى قوسۋىمىز كەرەك, دەپ ءسوز اياعىن ءتۇيدى مينيستر.
بۇدان كەيىن مۇعالىمدەر فورۋمىنا قاتىسۋشىلار ءوز وي-بايلامدارىن ورتاعا سالدى.
جامبىل وبلىسى مەركە اۋدانى №17 مەكتەپ-گيمنازياسىنىڭ ديرەكتورى گ.تىلەۋبەرديەۆا ءوز سوزىندە مۇعالىم, مەكتەپ, اتا-انا, كوللەدج, قوعام مۇشەلەرى بىرىگىپ ەڭبەك ەتكەن جاعدايدا عانا مەجەلەگەن ناتيجەگە يە بولا الاتىندىعىن ايتتى. سويلەۋشىلەر پەداگوگيكالىق ماماندىقتىڭ ءيميدجىن كوتەرىپ, ونىڭ قوعامداعى ورنىن بەلگىلەۋدى, قابىلەتكە قاراي ساپالى ءبىلىم بەرەتىن ۋنيۆەرسيتەتتەر اشىلۋ قاجەتتىگىن العا تارتتى. قابىلداۋ ەمتيحاندارىنا پەداگوگيكا, پسيحولوگيا مۇعالىمدەرىن قاتىستىرۋدى دا ماسەلە ەتىپ كوتەردى. ال «شىعارماشىلىق باستاماشىل ايەلدەر ليگاسى» قب باسقارماسىنىڭ ءتورايىمى ا.حايرۋللينا وتباسى, مەكتەپ جانە ۇكىمەتتىك ەمەس ۇيىمدار ىنتىماقتاستىعىنىڭ ءتيىمدى مودەلدەرى جونىندە ءسوز ەتتى.
فورۋمعا قاتىسۋشىلار ءبىلىم بەرۋ جۇيەسىندەگى بىرقاتار ماسەلەلەردى شەشۋ ءۇشىن ءبىلىم بەرۋ سالاسى مەن ازاماتتىق قوعام اراسىنداعى تۇراقتى ارىپتەستىكتى قالىپتاستىرۋعا ءوز ۇلەستەرىن قوسۋعا شاقىردى. سەكتسيا جۇمىستارىندا قوعامداعى پەداگوگتىڭ مارتەبەسىن كوتەرۋ ماسەلەلەرىنە دە ەرەكشە كوڭىل ءبولىنىپ, ءتۇرلى ۇسىنىستار ايتىپ, ءتاجىريبە الماستى.
پلەنارلىق وتىرىستى قورىتىندىلاۋ ساتىندە مينيستر ب.جۇماعۇلوۆ كوپ جىلعى ەڭبەگى مەن ءبىلىم بەرۋ جۇيەسىن دامىتۋداعى, ۇرپاق تاربيەلەۋگە قوسقان ۇلەستەرى ءۇشىن ءبىلىم بەرۋ ءىسىنىڭ قۇرمەتتى قىزمەتكەرى توسبەلگىسىمەن بىرقاتار وقۋ ورىندارى پەداگوگتارىن ماراپاتتادى.
ەلدىڭ ەرتەڭى, ۇلتتىڭ بولات قانات بولاشاعى سانالاتىن ۇل-قىزدىڭ, وتباسىنان كەيىنگى ءبىلىم بەرىپ, تاربيە ۇيرەتەتىن, بالاپانداي باۋلىپ, قىرانداي تۇلەتەتىن, ءوز ۋاقىتىن ايامايتىن, ءوزگەنىڭ باقىتىن ايالايتىن ۇستازدار قاۋىمىنىڭ جۇرت اراسىندا دا, قوعام ىشىندە دە ءجونى بولەك. سول ۇستازدار جاڭا وقۋ جىلىنىڭ قارساڭىندا وسىلايشا باس قوسىپ, تامىز ءماسليحاتىن فورۋمعا ۇلاستىردى. فورۋمدا ۇلت كوشباسشىسى – قازاقستان رەسپۋبليكاسىنىڭ پرەزيدەنتى ن.نازارباەۆتىڭ اتىنا ۇندەۋ قابىلداندى. سول سەكىلدى بەرەكە-ءبىرلىگى جاراسقان قازاقستاندىقتارعا دا قايىرىلىپ, «يگىلىكتى بولاشاق ءۇشىن بىرگە» قوعامدىق بىرلەستىگىن قۇراتىندارى تۋرالى مالىمدەدى. بۇل قوزعالىس جالپى حالىقتىق قوزعالىسقا اينالىپ, مەكتەپتى, وتباسىن جانە قوعامدى بىرىكتىرەتىن بولادى دەدى. ال فورۋم قارارىندا الدا تۇرعان اۋقىمدى ىستەردى جۇدىرىقتاي جۇمىلىپ, بىرگە اتقاراتىندىقتارىن ءبىراۋىزدان جەتكىزدى.
سۇلەيمەن مامەت, جۇلدىز ءبايدىلدا,
سۋرەتتەردى تۇسىرگەن ورىنباي بالمۇرات.
ءى رەسپۋبليكالىق پەداگوگيكالىق فورۋمعا قاتىسۋشىلاردىڭ ۇلت كوشباسشىسى – قازاقستان رەسپۋبليكاسىنىڭ پرەزيدەنتى ن.ءا.نازارباەۆقا ۇندەۋى
قۇرمەتتى نۇرسۇلتان ءابىش ۇلى! ءبىز, 2011 جىلعى 25 تامىزدا وتكەن «وتباسى, مەكتەپ, قوعام – بولاشاق ءۇشىن بىرگە!» اتتى ءبىرىنشى رەسپۋبليكالىق پەداگوگيكالىق فورۋمنىڭ قاتىسۋشىلارى, سىزگە جاڭا قازاقستاندى قالىپتاستىرۋ جولىنداعى جۇيەلى دە سالماقتى ساياساتىڭىز ءۇشىن شەكسىز قۇرمەت پەن زور العىس بىلدىرەمىز. ءسىزدىڭ كورەگەن باسشىلىعىڭىز بەن قاجىرلى ەڭبەگىڭىزدىڭ ارقاسىندا وزىندىك دامۋ ۇلگىسى بار, جاھاندىق قارجى داعدارىسى جاعدايىندا دا ومىرگە يكەمدىلىگىن دالەلدەگەن مۇلدەم جاڭا مەملەكەت قۇرىلدى. تاۋەلسىزدىكتىڭ 20 جىلىندا ءبىزدىڭ قوعامدىق قۇرىلىسىمىز, ەكونوميكامىز, ءومىر ءسۇرۋ سالتىمىز تۇبەگەيلى وزگەردى. ەڭ باستىسى, ءبىز ەل رەتىندە دە, قازاقستاندىق ۇلت رەتىندە دە جەتىلدىك. ەقىۇ مەن يسلام ىنتىماقتاستىعى ۇيىمىنا توراعالىق ەتۋ, استاناداعى سامميت, جەتىنشى قىسقى ازيا ويىندارى قازاقستاننىڭ مەرەيىن اسىرىپ, ەلىمىزدى دۇنيەجۇزى جۇرتشىلىعى مويىندادى. ءبىز از عانا ۋاقىت ىشىندە الەم استانالارىنىڭ اراسىندا لايىقتى ورىن الىپ ۇلگەرگەن استانامىزبەن ماقتانامىز. ازاماتتار قوعام ءومىرىنىڭ بارلىق ماڭىزدى سالالارىنا بەلسەندى قاتىسقان جاعدايدا عانا قوعام ىلگەرىلەيدى, دەموكراتيا دامىپ, ەكونوميكا ورلەيدى. قوعامدىق ومىردە مەملەكەت پەن ازاماتتار ءمۇددەلەرىن توعىستىراتىن دا ناق وسى ءبىلىم سالاسى. ءبىز ءبىلىم سالاسىنا كورسەتىپ وتىرعان قولداۋىڭىز ءۇشىن سىزگە ريزاشىلىعىمىزدى بىلدىرەمىز. ءسىزدىڭ وسى سالاداعى باستامالارىڭىز ۇلتتىق ءبىلىم جۇيەسىن قالىپتاستىرۋ مەن دامىتۋداعى اۋقىمدى مىندەتتەردى شەشەدى. مۇعالىمنىڭ مارتەبەسىن ارتتىرۋعا بايلانىستى شارالاردىڭ ماڭىزى وتە زور. ويتكەنى ۇلت كەلەشەگى – ۇستاز قولىندا. جاڭا ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى قازاقستاندىق ءبىلىم بەرۋ جۇيەسىنىڭ جاڭا عاسىردىڭ ءتيىستى تالاپتارىنا جاۋاپ بەرەتىن مازمۇندى جانە ساپالى دەڭگەيگە شىعۋىنىڭ ناقتى تەتىگى بولىپ تابىلادى. ءبىز ءسىزدىڭ قازاقستاندىق ءبىلىمدى جانە مەملەكەتىمىزدى دامىتۋ ءۇشىن العا قويعان ستراتەگيالىق مىندەتتەرىڭىزدى ىسكە اسىرۋعا جان-جاقتى قولداۋ كورسەتىپ, ازاماتتىق قوعامنىڭ بارلىق ينستيتۋتتارىن وسى ءىستى بىرلەسىپ اتقارۋعا شاقىرامىز. ءبىرىنشى رەسپۋبليكالىق پەداگوگيكالىق فورۋمنىڭ قاتىسۋشىلارى ءسىزدى, قۇرمەتتى نۇرسۇلتان ءابىش ۇلى, ءبىلىم سالاسىن ىلگەرى جانە سەرپىندى دامىتۋ جولىندا بارلىق كۇش-جىگەرىن, ءبىلىمى مەن تاجىريبەسىن جۇمسايتىنىنا سەندىرەدى. بۇگىن بىزگە جاڭارعان ءبىلىم ارقىلى قازاقستاندى قۋاتتى جانە گۇلدەنگەن مەملەكەتكە اينالدىرۋدىڭ تاريحي مۇمكىندىگى تۋىنداپ وتىر. العا, قازاقستان!فورۋمعا قاتىسۋشىلار لەبىزى
بەرىك مايباساروۆ,
قىزىلوردا وبلىسى, جالاعاش اۋدانى №123 ت.جۇرگەنوۆ اتىنداعى دارىندى بالالار مەكتەبى ديرەكتورىنىڭ تاربيە ءىسى جونىندەگى ورىنباسارى:
– ءبىلىم جانە عىلىم مينيسترلىگى ۇيىمداستىرىپ وتىرعان فورۋم – وتە قۇپتارلىق جوبا. ەگەمەندىگىمىزدى العان 20 جىل ىشىندە بۇل ءبىزدىڭ ەل بولىپ, بيىك بەلەستى باعىندىرىپ, جاڭاشا قىرىمىزدان تانىلۋىمىزدىڭ دايەگى ىسپەتتەس. فورۋمنىڭ ماقساتى – ءبىلىم مەن عىلىم سالاسىنا جاڭادان كەلىپ جاتقان تەوريالار مەن جاڭالىقتاردى, يننوۆاتسيالىق تەحنولوگيالاردى تاجىريبەگە ەنگىزىپ, ونى ودان ءارى دامىتۋ. فورۋمنىڭ تاربيەلىك ءمانى وتە زور. بۇل جيىنعا پەداگوگتارمەن قاتار, اتا-انالار كوميتەتىنىڭ مۇشەلەرى, ازاماتتىق قوعام ينستيتۋتتارى مەن ۇكىمەتتىك ەمەس ۇيىمدار وكىلدەرى, ءىرى كاسىپكەرلەردىڭ قاتىسۋىندا ءۇلكەن ءمان جاتىر. پەداگوگ رەتىندە استاناعا العاش كەلگەندىكتەن ماعان ءبارى ادەمى, اسەرلى كورىنەدى. ەلوردامىز بولاشاقتا عىلىم مەن ءبىلىمنىڭ ورداسىنا اينالاتىنىنا كوزىم جەتتى. تاريحشى بولعاندىقتان ل.ن.گۋميلەۆ اتىنداعى ەۇۋ-گە قويىلعان كۇلتەگىن ەسكەرتكىشىنىڭ كوشىرمەسى ۋنيۆەرسيتەت تۇلەكتەرىنىڭ پاتريوتتىق سەزىمىن وياتاتىنىنا, تالابىن شىڭداي تۇسەتىنىنە سەنىمدىمىن.
جۇماعازى ستامبەكوۆ,
سەمەي قالاسىنداعى №37 گيمنازياسى مەملەكەتتىك مەكەمەسىنىڭ ديرەكتورى:
– مەن 40 جىلدىق ەڭبەك ءوتىلىم بار پەداگوگپىن. سوڭعى ۋاقىتتا بالا تاربيەسىنە ءمان بەرۋشىلىك سالقىن تارتىپ بارا جاتقانداي كورىنەدى. اقپاراتتىق زامان ۇستەمدىك قۇرعان تۇستا ادامزات بالاسىنىڭ ءومىر ءسۇرۋ دەڭگەيى قيىنداپ بارا جاتقانى جاسىرىن ەمەس. وسى دا بالا تاربيەسىنە سالقىندىقتى تۋعىزىپ وتىرعان سياقتى. مىنە, وسى ولقىلىقتاردى كەڭ وتىرىپ كەڭەسۋ ءۇشىن ۇيىمداستىرىلعان بۇل جيىننىڭ ماڭىزى وتە زور دەپ ەسەپتەيمىن. وسى القالى باسقوسۋدا كوتەرىلگەن ماسەلەلەر بويىنشا ءبىلىم سالاسىندا جۇرگەن ماماندار مەن اتا-انالار, قاۋىمداستىقتار, بيزنەس سالاسىنداعى ىسكەرلەر ورتاق ماقساتتا جۇمىس جاسايدى دەگەن سەنىمدەمىن. فورۋم – بولاشاققا ىلگەرىلەۋدى قولداپ قانا قويماي, ءبىلىم ساپاسىن قاداعالايتىن تاعى ءبىر مەملەكەتتىك قۇرىلىم بولىپ جاتسا قۇبا-قۇپ. تاعى ءبىر ايتايىن دەگەنىم, «ءبىلىم تۋرالى» زاڭ قابىلدانعالى دا ءبىراز ۋاقىت ءوتتى. زامان وزگەرىسىنە قاراي ونى تاعى ەلەكتەن وتكىزەتىن مەزگىل جەتكەن ءتارىزدى.
شالقىما قۇرمانالينا,
ج.دوسمۇحامەدوۆ اتىنداعى ورال پەداگوگيكالىق كوللەدجىنىڭ ديرەكتورى, پەداگوگيكا عىلىمدارىنىڭ دوكتورى, پروفەسسور:
– ەلوردادا وتكەن مۇعالىمدەردىڭ تۇڭعىش فورۋمى مەنى ەرەكشە قاناتتاندىردى. ارىپتەستەرىممەن پىكىر الىسىپ, وي ءبولىستىم. پلەنارلىق ءماجىلىستە پەداگوگيكالىق كوللەدجدەردە مۇعالىم دايىنداۋ ماسەلەسىن كوتەردىم. كوللەدجدى بىتىرگەن باستاۋىش سىنىپ مۇعالىمدەرى كوپ جاعدايدا جۇمىسقا ورنالاسا الماي جاتاتىنىن, مەكتەپ باسشىلارىنىڭ ءبىلىم ۇياسىنىڭ ابىرويى دەپ, جوعارى بىلىمدىلەرگە ءجۇگىرەتىنىن, ولاردىڭ ءبارى بىردەي مىقتى مامان ەمەستىگىن ەسكەرە بەرمەيتىنىن ايتتىم. سول سەكىلدى كوللەدجدەردە باكالاۆرلاردى دايىنداۋ ماسەلەسىن قوزعاپ, «ۇزدىك كوللەدج وقىتۋشىسى» گرانتىن بەلگىلەۋدى ۇسىندىم.
