«حالىقتىڭ دەنساۋلىعىن جاقسارتۋ, مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ ۇكىمەتتىڭ ەڭ ماڭىزدى تاپسىرماسى بولىپ تابىلادى», – دەدى ا.مامين.
ونىڭ ايتۋىنشا, دەنساۋلىق ساقتاۋ جۇيەسىندە جۇرگىزىلىپ جاتقان رەفورمالار مەن 2017 جىلدىڭ 1 شىلدەسىنەن باستاپ مىندەتتى مەديتسينالىق ساقتاندىرۋ جۇيەسىن ەنگىزۋ قارجىلاندىرۋ كولەمىن ۇلعايتىپ, مەديتسينالىق قىزمەتتەردىڭ قولجەتىمدىلىگىن ارتتىرادى.
ەلباسىنىڭ جولداۋدا ايتقان تاپسىرمالارىن ورىنداۋ ماقساتىندا, قازىرگى ۋاقىتتا دارىلىك زاتتاردىڭ باعاسىن, ونىڭ ىشىندە نارىقتاعى باعاسىن زاڭنامالىق رەتتەۋ شارالارى جۇرگىزىلۋدە. بۇل ماسەلە پارلامەنتتە تالقىلاۋعا ەنگىزىلەدى.
پرەمەر-ءمينيستردىڭ ءبىرىنشى ورىنباسارى اتاپ وتكەندەي, ۇكىمەت دارىلىك زاتتاردى شىعاراتىن وتاندىق وندىرۋشىلەردى قولداۋ جۇمىستارىن جالعاستىرۋدا. 2016 جىلى قازاقستاندىق فارماتسەۆتيكالىق ءونىم كولەمى 42,4 ملرد تەڭگەنى قۇرادى, ول فارماتسەۆتيكالىق نارىقتىڭ جالپى كولەمىنىڭ 8-12% قۇرايدى. مەملەكەتتىك ساتىپ الۋ كولەمى 25,6 ملرد تەڭگە نەمەسە جالپى كولەمنىڭ 60%-ى. ا.مامين ايتقانداي, «يمپورتقا تاۋەلدىلىكتى تومەندەتۋ ماقساتىندا, الداعى 5 جىلدا دارىلىك زاتتاردىڭ وتاندىق ءوندىرىسىن 2 ەسەگە ۇلعايتۋ جوسپارلانۋدا».
ول سونداي-اق, ەۋرازيالىق ەكونوميكالىق وداق اياسىندا مەديتسينالىق زاتتار مەن ءدارى-دارمەكتىڭ بىرىڭعاي نارىعىن قالىپتاستىرۋ بويىنشا تۇراقتى تۇردە جۇمىستار جۇرگىزىلىپ جاتقاندىعىن اتاپ ءوتتى.
ا.مامين بۇگىندە قاۋىپسىز, ءتيىمدى جانە ساپالى ءدارى مەن دارىلىك زاتتاردىڭ قولجەتىمدىلىگىن جوعارىلاتۋعا, فارماتسەۆتيكالىق بيزنەستى دامىتۋعا باعىتتالعان 70 قۇجات بويىنشا جۇمىس جاسالىپ جاتقاندىعىن ايتتى.
