جۇلدەگەرلەردى ماراپاتتاۋ جيىنىندا ءسوز العان «قازاقستان» رترك» اق باسقارما توراعاسى ەرلان قارين بايقاۋدىڭ ماڭىزى مەن مانىنە توقتالدى. جۋرناليستيكا مەن ادەبيەتتىڭ دامۋ جولىندا جاڭاشىل دا تەرەڭ شىعارماشىلىق جاڭالىقتارىمەن سەرپىلىس اكەلگەن ساعات اشىمباەۆتىڭ كوزقاراس كەمەلدىگى تۋرالى ايتىپ ءوتتى.
– الاش كوسەمى ءاليحاننىڭ «ۇلتقا قىزمەت ەتۋ بىلىمنەن ەمەس, مىنەزدەن» دەگەنى بار. ساعات اشىمباەۆ – وزىندىك ستيلىمەن عانا ەمەس, ازاماتتىق پوزيتسياسىمەن ەرەكشەلەنەتىن تۇلعا. جەلتوقسان وقيعاسى كەزىندە دە قۇندى دەرەكتەردىڭ ساقتالۋىنا تۇرتكى بولدى. ۇلتتىق ارنا اشىمباەۆتار اۋلەتىنە قارىزدار. ساعات اشىمباەۆ اتىنداعى ستيپەندياعا يە بولۋ – ۇلكەن جاۋاپكەرشىلىك, – دەگەن باسقارما باسشىسى بايقاۋدىڭ ارى قاراي دا جالعاسا بەرەتىندىگىن جەتكىزدى.
ال جازۋشى الدان سمايىل ساعات اشىمباەۆتىڭ ازاماتتىق بولمىسى مەن قايراتكەرلىك ۇستانىمى تۋرالى ءسوز قوزعادى. – ساعاتتىڭ ۇلكەن ءبىر ەرلىگى – كەڭەس وداعى تۇسىندا «قاۋىشۋ» حابارىن ەفيرگە شىعاردى. قازاقستاننان جىراقتا تۇراتىن قانداستارىمىزدىڭ تاعدىرىنا ارنالعان العاشقى حابار بولاتىن. ول كەزدە «شەتتەگى قازاقتاردى ەلگە ورالتۋ كەرەك» دەگەن ءسوزدى ايتۋ – ەرلىكپەن پارا-پار دۇنيە. ايتىپ قانا قويماي, قازاقتار تىعىز ورنالاسقان ايماقتارعا بارىپ, ءارتۇرلى تەلەساپارلار ۇيىمداستىرا باستادى. العاشقى حابارى ومبىدا ءوتتى. ءانشى-كۇيشىلەردى, ونەر قايراتكەرلەرىن الىپ بارىپ, سول جاقتاعى قازاقتاردىڭ رۋحىن كوتەردى.
جالپى, ساعات اشىمباەۆ اتىنداعى بايقاۋعا رەسپۋبليكا بويىنشا 18 ۋنيۆەرسيتەتتىڭ 33 ستۋدەنتى جۇمىستارىن ۇسىنعان. سارالاۋ كوميسسياسى قاتارىنداعى «قازاقستان» رترك اق ەفيرلىك ساياسات ديرەكتسياسىنىڭ باس رەداكتورى قاينار ولجاەۆ, تەلەۆيزيا سالاسىنىڭ ارداگەرى نۇرتىلەۋ يمانعالي ۇلى, «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەق پرەزيدەنتى ەرلان بەكحوجين, «قازاقستان» رترك» اق ايماقتىق حابار تاراتۋدى دامىتۋ ديرەكتسياسىنىڭ ديرەكتورى ەرجانار اشەيحان, «كەلبەت», «جارقىن بەينە» باعدارلامالارىنىڭ پروديۋسەرى, اقىن جاڭىل اسىلبەكوۆالار ارنايى استانا-الماتى ۆيدەو كونفەرەنتسياسىن وتكىزىپ, جەڭىمپازدى انىقتاۋ ءۇشىن ستۋدەنتتەردىڭ جۇمىستارىن ساراپقا سالعان بولاتىن. ناتيجەسىندە, ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ 1 كۋرس ستۋدەنتى داستان قاستايدىڭ جۇمىسى ۇزدىك دەپ تانىلدى.
شارانىڭ قۇرمەتتى قوناعى, پارلامەنت ءماجىلىسى حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ جۇلدەگەر ستۋدەنتكە س.اشىمباەۆ اتىنداعى ستيپەنديانى سالتاناتتى تۇردە تابىستاپ, قۇتتىقتادى. بايقاۋدى ۇيىمداستىرۋعا باستاماشى بولعان كورپوراتسيا باسشىسى ەرلان قارين مىرزاعا العىس ءبىلدىرىپ, اكەسى تۋرالى جىلى ەستەلىگىمەن ءبولىستى.
«اكەمىز ومىردەن وزعاندا نەبارى 44 جاستا بولدى. ءتىرى بولعاندا بۇگىن 70 جاسقا تولار ەدى. 44 جاس دەگەن ءومىردىڭ بەت الىسىن ەندى ءتۇسىنىپ, شارۋانى جاڭا باستاعان ازاماتتىڭ جاسى عوي. دەسە دە اكەمىز سانالى عۇمىرىن ەلگە, حالىققا, ۇلتقا قىزمەت ەتۋگە ارنادى. سەكسەنىنشى جىلداردىڭ باسىندا «جۇرەكتەن قوزعايىق» اتتى بىرنەشە جىلعا سوزىلعان سەريالىق باعدارلاما جۇرگىزدى. ءوزى تەلەديدارعا قىزمەتكە كەلگەن سوڭ, وسى حابارلاردىڭ وزەكتەس زاڭدى جالعاسى رەتىندە «پارىز بەن قارىز» اتتى اۆتورلىق باعدارلاما ەنگىزىپ, ونى بىرنەشە جىل تۇراقتى تۇردە جۇرگىزىپ وتىردى. مۇنىڭ بارلىعى ءوز كەزىندە حالىق تاراپىنان قوشامەتكە يە بولىپ, جوعارى باعالاندى. جاستار بولاشاعىنا جول اشار وسىنداي جوبانى جۇزەگە اسىرىپ وتىرعان «قازاقستان» رترك اق ۇجىمىنا ەرەكشە العىس بىلدىرەمىن», دەدى ماۋلەن اشىمباەۆ.
ايا ءومىرتاي, «ەگەمەن قازاقستان»
سۋرەتكە تۇسىرگەن ەرلان وماروۆ
