اۋىلداعى جاس ۇرپاق جەڭىستى جاقىنداتۋعا ۇلەس قوسقان اقەسپەلىك مايدانگەرلەردى بىلە مە ەكەن دەگەن وي مازالايدى. ءوزىمىز كوزدەرىن كورگەن ايمان يگىلىكوۆ, تويمان ساتانوۆ, باقتيار كارىباەۆ, جاڭاباي قوداشەۆ, ىسقاق كەنجاليەۆ, قاپاش قاراقۇلوۆ, ءومىر نۇرپەيىسوۆ, ماناۋ نۇرپەيىسوۆ, كەنجەعارا دەمەسىنوۆ, ورالباي دوسجانوۆ, جايلاۋباي دوسجانوۆ, ت.ب. مايدانگەرلەر ەسكە ءتۇسىپ وتىر.
ولاردىڭ ىشىندە قاپاش قاراقۇلوۆ اعانىڭ ورنى بولەك بولاتىن. ول قالانىڭ ادامى سەكىلدى كوستيۋم-شالبار, اق كويلەك كيىپ, موينىندا قارا گالستۋكپەن, ساقال-مۇرتىن قىرىنىپ, تازا, ۇقىپتى جۇرەتىن. ەسەپتەپ وتىرسام, 1923 جىلى تۋعان قاپاش اعا 1970-جىلدارى ەلۋدىڭ ىشىندە ەكەن عوي. اۋىلدىڭ ايتقىشبەكتەرى سوعىس تۋرالى نەبىر قىزىقتى اڭگىمەلەردى ايتىپ وتىراتىن. بىراق قاپاش اعا وعان ارالاسپايتىن. ءبىر جاعىنان اۋىل باسشىسى رەتىندە بوس اڭگىمەدەن بويىن اۋلاق ۇستاسا, ەكىنشى جاعىنان بالىق شارۋاشىلىعى سالاسىنىڭ بىلىكتى مامانى رەتىندە جۇمىستان قولى دا تيمەيتىن.
قاپاش اعا سوعىس جىلدارى ءىىى دارەجەلى «داڭق» وردەنىن, «ەرلىگى ءۇشىن», «لەنينگرادتى قورعاعانى ءۇشىن», «1941-1945 جج. فاشيستىك گەرمانيانى جەڭگەنى ءۇشىن» مەدالدارىن كەۋدەسىنە تاققان. ول مايدان تۋرالى ەشتەڭە ايتپاسا دا, ەرلىكتەرى تۋرالى دەرەكتەر رەسەي قورعانىس مينيسترلىگىنىڭ ارحيۆىندە ساقتاۋلى تۇر.
قاپاش قاراقۇلوۆ 1940 جىلى 7 جىلدىق مەكتەپتى ءبىتىرىپ, كولحوزدا ەسەپشى بولىپ جۇمىس ىستەيدى. مايدانعا 1942 جىلى مامىر ايىندا ارال اۋداندىق اسكەري كوميسسارياتىنىڭ شاقىرتۋىمەن اتتانادى.
اسكەري دايىندىقتى چكالوۆ قالاسىنداعى 242-قوسالقى اتقىشتار پولكىندە وتەدى. ودان كەيىن 379-اتقىشتار ديۆيزياسىنىڭ 1253-اتقىشتار پولكىندەگى 120 مم مينومەتتىك باتارەيانىڭ كوزدەۋشىسى بولىپ اسكەري قىزمەتىن جالعاستىرادى. تابيعي مەرگەندىگى ارقاسىندا قارسىلاس جاقتىڭ دوت, دزوتتارىن, وق اتۋ نۇكتەلەرىن تالاي رەت جالعىز سناريادپەن جويادى.
قاپاش اعا قىزمەت اتقارعان اسكەري ءبولىم 1942 جىلدىڭ 19 قازانىنان باتىس مايدانىنىڭ قۇرامىنا بەرىلىپ, 1,5-2 ملن كەڭەس جاۋىنگەرى قازا تاپقان رجەۆ قىرعىنىنىڭ قاق ورتاسىندا بولادى. 1943 جىلدىڭ 1 قاڭتارىنان الگى ءبولىم ۆولحوۆ مايدانىنىڭ قۇرامىندا لەنينگراد قالاسىن قورعاۋ ءۇشىن قيان-كەسكى كۇرەستەر جۇرگىزەدى. ال سول جىلدىڭ قاراشا ايىنان باستاپ 379-ديۆيزيا 2-ءشى پريبالتيكا مايدانىنىڭ قاراماعىنا بەرىلەدى. لەنينگراد قالاسى 870 كۇنگە سوزىلعان بلوكادادان 1944 جىلى 27 قاڭتار كۇنى تولىعىمەن بوساتىلادى. قاپاش اعا قىزمەت اتقارعان مينومەتتى باتارەيا شابۋىل بارىسىندا قويىلعان اسكەري تاپسىرمالارىن بۇلجىتپاي ورىندايدى.
1944 جىلدىڭ جەلتوقسانىندا اتالعان باتارەيا 245-اتقىشتار ديۆيزياسىنىڭ 904-اتقىشتار پولكىنە بەرىلەدى دە, ءبىرىنشى ۋكراينا مايدانىنىڭ قۇرامىندا جولىن جالعاستىرىپ, جەڭىس كۇنىن گەرمانيانىڭ درەزدەن قالاسىندا قارسى الادى. بۇل كەزدە قاپاش اعامىزدىڭ جاسى 22-دە ەدى.
سوعىستان كەيىن ونىڭ اسكەري ءبولىمى بەلورۋسسيا اۋماعىنا تۇراقتاپ, تەك 1947 جىلدىڭ
ناۋرىزىندا عانا ول تۋعان اۋىلىنا امان-ساۋ ورالادى.
ەلگە جەتىسىمەن ەڭبەك مايدانىنا ارالاسادى. ەسەپشى, قويما مەڭگەرۋشىسى, نۇسقاۋشى سەكىلدى جۇمىستاردى اتقارىپ, 1953 جىلى دونداعى روستوۆ قالاسىنداعى بالىق شارۋاشىلىعى تەحنيكۋمىنىڭ كۋرسىن بىتىرەدى. 1954-1976 جىلدارى ۇيالى بالىق زاۋىتىندا, قامىستىباس بالىق وڭدەۋ زاۋىتىندا, ۇشكول, اۆان, اقەسپە بالىق زاۋىت-
تارى مەن بالىق وڭدەۋ مەكەمەلەرىندە باسشىلىق قىزمەتتەردە ىستەدى. 1976-1988 جىلدارى قىزىلوردا بالىق زاۋىتىندا ينجەنەر-تەحنولوگ بولدى. بۇل جىلدار ارال وڭىرىندە بالىق شارۋاشىلىعىنىڭ قارقىنداپ دامىعان كەزى-ءتىن. بۇل تابىسقا قاپاش اعانىڭ قوسقان وزىندىك ۇلەسى بولدى. ول ەكى رەت قازاق كسر جوعارعى كەڭەسىنىڭ قۇرمەت گراموتاسىمەن, «ەرەن ەڭبەگى ءۇشىن», «سوتسياليستىك جارىستىڭ جەڭىمپازى», «ەڭبەك ارداگەرى», ت.ب. مەدالدارمەن ناگرادتالدى.
قاپاش اعا 1988 جىلى 65 جاسىندا دۇنيەدەن وزدى. ول قۇداي بەرگەن جەتى بالانىڭ اكەسى ەدى. XIX عاسىرداعى بۇلانباي, بيسەنبى اتالارىنىڭ بويىنداعى ىزگى قاسيەتتەر ۇرپاقتان-ۇرپاققا جالعاسىپ, قاراقۇل اتاعا, ودان قاپاش اعانىڭ وزىنە, ودان جەتكەرگەن, جەتەس, ەلدەس, المات, قايرات (اۋعان سوعىسىنا قاتىسقان) باۋىرلارىمىزعا جانە ايساۋلە, قارلىعاش قىزدارىنا دارىعان. ولار اۋلەتتىڭ ءداستۇرىن ابىرويلى جالعاستىرىپ وتىر.
بەرەكەت كارىباەۆ,
قر ۇعا كوررەسپوندەنت-مۇشەسى, تاريح عىلىمدارىنىڭ دوكتورى
