وتان الدىنداعى بورىشىن وتەۋگە اتتانعان ساربازداردىڭ بۇل سالتاناتى قازاقستان قارۋلى كۇشتەرىنىنىڭ قۇرىلۋىنا 25 جىل تولۋىنا ورايلاستىرىلدى. ءىس-شاراعا جاستار ساياساتى ماسەلەلەرى جونىندەگى باسقارما مەن قاراعاندى وبلىسىنىڭ قورعانىس ىستەرى جونىندەگى دەپارتامەنتى ۇيىتقى بولدى.
ەر ازامات ءۇشىن وتان الدىنداعى اسكەري بورىشىن وتەۋ – ۇلكەن ابىروي ءارى مارتەبە. ال ورەندەرىمىزدى بولاتتاي بەرىك, تەمىردەي ءتوزىمدى ەتىپ تاربيەلەۋ – اسكەري ءومىردىڭ ەنشىسىندە. مۇنى كوزدەرىندە وت ويناعان بولاشاق ساربازداردىڭ جۇزىنەن-اق اڭعارۋعا بولادى.
سونىمەن, شارا قاراعاندى گارنيزونىنداعى اسكەري بولىمدەردىڭ جاۋىنگەرلەرى ساپقا تۇرعىزىلىپ, اسكەرگە شاقىرىلۋشىلار ۇلى وتان سوعىسىندا شەيىت بولعان ارداگەرلەرگە تاعزىم رەتىندە «ماڭگىلىك الاۋ» داڭق مەوريالىنا گۇل دەستەسىن قويۋ راسىمىنەن باستالدى. جاستاردىڭ جىگەرىن جانىپ, رۋحىن وياتۋدى ماقسات ەتكەن ۇيىمداستىرۋشىلار اسكەرگە شاقىرىلۋشىلارعا لايىقتى قۇرمەتتەرىن كورسەتتى.
– بيىل قارۋلى كۇشتەردىڭ قۇرىلعانىنا 25 جىل تولىپ وتىر. ارينە, بۇل – ءار قازاقستاندىق ءۇشىن ايتۋلى وقيعا, زور ماقتانىش. اسكەرى ايبىندى ەلدىڭ كەلەشەگى كەمەل بولاتىنى دا ءسوزسىز. وسىعان وراي, ەلباسىمىز, قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ «XXI عاسىرداعى قازاقستاندىق جاۋىنگەر كەلبەتى – پاتريوتيزم, ينتەللەكتۋالدى دامۋ جانە سالاماتتى ءومىر ءداستۇرى بولۋى شارت» دەگەن بولاتىن. بۇگىن ءبىز قالىپتاسقان ءداستۇر بويىنشا اسكەر قاتارىنا جاستاردى شىعارىپ سالىپ تۇرمىز. ءاربىر جاس ازامات ءۇشىن ەلىن, جەرىن قورعاۋ – ەڭ قاسيەتتى دە كيەلى مىندەت, – دەدى جاندوس ابىشەۆ.
وتان-انانىڭ تىنىشتىعىن اماناتتاعان وبلىس اكىمى ورىنباسارىنىڭ تىلەگىن قورعانىس ىستەرى جونىندەگى دەپارتامەنتتىڭ باسشىسى جالعادى.
پولكوۆنيك ارداق كۋكاتوۆ ايت-
قانداي, ەلىمىزدىڭ قورعانىس قابىلەتىن جەتىلدىرۋدىڭ باستى ولشەمى – قارۋلى كۇشتەردى دەنە تاربيەسى, ينتەللەكتۋالى تۇرعىسىندا داعدىلى دايىندىقتان وتكەن جاۋىنگەرلەرمەن قامتاماسىز ەتۋ.
– بيىلعى كوكتەمدە وبلىسىمىزدىڭ 1500 جاس ازاماتى اسكەر قاتارىنا شاقىرىلدى. بۇگىن سالتاناتتى تۇردە قاراعاندى وبلىسىنىڭ ازاماتتارىن قارۋلى كۇشتەر قاتارىنا شىعارىپ سالۋعا جينالىپ وتىرمىز. جالپى, وسى كۇنى قارۋلى كۇشتەر قاتارىندا 40 جاس ازامات اتتاناتىن بولادى, – دەدى ارداق كۋكاتوۆ.
ميراس اسان,
«ەگەمەن قازاقستان»
قاراعاندى
