ۇلى جەڭىستىڭ 72 جىلدىعىن اتاپ وتۋگە ارنالعان جيىنعا پرەزيدەنت اكىمشىلىگىنىڭ, ەل ۇكىمەتىنىڭ, پارلامەنت پەن مەملەكەتتىك ورگانداردىڭ, ديپلوماتيالىق كورپۋستىڭ وكىلدەرى مەن استانا قالاسىندا تۇراتىن مايدانگەرلەر جانە قالا جۇرتشىلىعى قاتىستى.
ۇلى جەڭىستىڭ 72 جىلدىعىن اتاپ وتۋگە ارنالعان جيىنعا پرەزيدەنت اكىمشىلىگىنىڭ, ەل ۇكىمەتىنىڭ, پارلامەنت پەن مەملەكەتتىك ورگانداردىڭ, ديپلوماتيالىق كورپۋستىڭ وكىلدەرى مەن استانا قالاسىندا تۇراتىن مايدانگەرلەر جانە قالا جۇرتشىلىعى قاتىستى.
رەسمي ءراسىم اياسىندا جالعاسىن تاپقان سالتاناتتى شارا بارىسىندا مەملەكەتتىك كۇزەت قىزمەتىنىڭ پرەزيدەنتتىك وركەسترى ەلىمىزدىڭ ءانۇرانىن ورىنداپ, قۇرمەت قاراۋىل روتاسى جوعارعى باس قولباسشىنىڭ جانە ۇلى وتان سوعىسى ارداگەرلەرىنىڭ الدىندا سالتاناتپەن ساپ تۇزەپ, ءجۇرىپ ءوتتى.
«سوعىس ارداگەرلەرى ءبىزدىڭ باقىتتى ومىرىمىزگە, تاۋەلسىزدىگىمىزگە جانە اسپانىمىزدىڭ اشىق بولۋىنا جول اشتى. ءبىز بۇگىن «وتان قورعاۋشىلار» مونۋمەنتىنە گۇل شوعىن قويىپ, حالقىمىزدىڭ مايدانداعى جانە تىلداعى قاھارماندىعى مەن ەڭبەگىنە دەگەن زور قۇرمەتىمىزدى بىلدىرەمىز», – دەدى قازاقستان پرەزيدەنتى.
مەملەكەت باسشىسى ەكىنشى دۇنيەجۇزىلىك سوعىس ادامزات تاريحىندا ونداعان ميلليون ادامنىڭ ءومىرى قيىلعان ەڭ قانقۇيلى سوعىس بولعانىن اتاپ ءوتتى.
«قازا تاپقانداردىڭ قاتارىندا قازاقستاندىقتار دا بولدى. رەسپۋبليكامىزدىڭ 6 ميلليون حالقىنىڭ 20 پايىزى مايدانعا اتتاندى. ولاردىڭ جارتىسى قايتا ورالعان جوق», – دەدى نۇرسۇلتان نازارباەۆ.
ەلباسى جەڭىستىڭ قازاقستان تاۋەلسىزدىگى تاريحىنداعى تاعدىرشەشتى رولىنە توقتالىپ, وعان ەل حالقىنىڭ بىرلىگى ارقاسىندا قول جەتكىزىلگەنىن دە اتاپ ايتتى.
ء«بىزدىڭ ارداگەرلەرگە دەگەن قۇرمەتىمىز ولاردىڭ ەرلىگىنەن كەم تۇسپەۋگە ءتيىس. جەڭىسكە ەڭ الدىمەن ەلىمىزدەگى بارلىق حالىقتىڭ بىرلىگىنىڭ, باۋىرمالدىعىنىڭ جانە دوستىعىنىڭ ناتيجەسىندە قول جەتتى. ءبىز قازىر دە وسى ۇرانمەن ءومىر ءسۇرىپ كەلەمىز», – دەدى پرەزيدەنت.
سوعىس ارداگەرلەرىنە العىس ايتىپ, ولاردىڭ جاۋعا قارسى كۇرەستە كورسەتكەن ەرلىگى مەن جانقيارلىعىن اتاپ وتكەن مەملەكەت باسشىسى بارشا قازاقستاندىقتى جەڭىس كۇنىمەن قۇتتىقتاپ, زور دەنساۋلىق جانە باق-بەرەكە تىلەدى.
سالتاناتتى شارا سوڭىندا ەلباسى «ستۋدەنتتەر» ساياباعىنداعى شاتىرلار قالاشىعىنا بارىپ, قارت مايدانگەرلەرمەن ەمەن-جارقىن اڭگىمە قۇردى. جىلداعى داستۇرگە ساي مۇندا 11 اسكەري شاتىر ورناتىلىپ, ارداگەرلەر مەن تىل ەڭبەككەرلەرىنە ارنالعان داستارقان جايىلعان بولاتىن. ايتا كەتەيىك, بۇگىنگى تاڭدا ەلوردامىز – استانا قالاسىندا ۇلى وتان سوعىسىنىڭ 121 ارداگەرى تۇرادى.
نۇرلىبەك دوسىباي,
«ەگەمەن قازاقستان»
