ۇستىمىزدەگى جىلدىڭ قاڭتارىندا كاتونقاراعاي اۋىلىندا ەل ەسىندە قالارلىقتاي ەلەۋلى وقيعا بولدى. بۇرىنعى اۋدان ورتالىعى سوناۋ 1997 جىلعى ىقشامداۋ ساياساتىنان كەيىن توز-توزى شىعىپ, تالاي الەۋمەتتىك عيماراتتار يەسىز قالدى. قۇرىلىس نەگىزىنەن العاندا اۋدان ورتالىعى بولعان ۇلكەن نارىن اۋىلىندا سالىنا باستاعاندىقتان ەلەۋسىز قالعان كاتونقاراعاي اۋىلى ءجۇدەپ-جاداپ, ونداعى تۇرعىنداردىڭ باسقا ەلدى مەكەندەرگە كوشە باستاعانى دا شىندىق. شەكارالاس اۋدانداردى قايتادان اشىپ, ولارعا اۋدان ورتالىعى مارتەبەسىن بەرۋ جونىندەگى سوزدەر دە شىندىققا جاناسپادى. نە ىستەۋ كەرەك؟ 2007 جىلدىڭ ساۋىرىندە اۋدانعا جاڭا اكىم كەلدى. سول كەزدەگى وبلىس اكىمى جانىبەك كارىبجانوۆ جاڭا اكىم سەرىك ءزاينۋلديندى دەپۋتاتتار الدىندا تانىستىرىپ تۇرىپ, ىسكەر, جاس جىگىتتەن ءۇمىت كۇتەتىنىن, وعان جان-جاقتى قولعابىس جاساۋ قاجەتتىگىن شەگەلەپ تۇرىپ تاپسىرعان. ءوڭىر باسشىسى امانشىلىق بولسا, كەلەسى جىلى بۇرىنعى اۋدان ورتالىعىندا «100 مەكتەپ, 100 اۋرۋحانا» باعدارلاماسى بويىنشا ەكى ميلليارد تەڭگەگە 75 توسەكتىك, زامان تالابىنا ساي اۋرۋحانا قۇرىلىسى سالىناتىنىن ايتقان ەدى.
اۋدان اكىمى س.زاينۋلدين ىسكە قىزۋ كىرىستى. كاتونقاراعاي اۋىلىنداعى يەسىز قالعان عيماراتتاردى اۋداننىڭ بەدەلدى ازاماتتارى قايتادان جوندەپ, «ەكىنشى تىنىسىن» اشتى. ماسەلەن, وبلىستىق ءماسليحاتتىڭ دەپۋتاتى, «قۇرمەت» وردەندى تەمىربەك يساباەۆ بۇرىنعى ەكى قاباتتى عيماراتتى كۇردەلى جوندەۋدەن وتكىزىپ, وندا «بايان» شيپاجايىن اشتى. ءوز اۋلىنداعى ءبىر جارىم شاقىرىم جولعا اسفالت توسەدى. اۋدان اكىمى سەرىك زاينۋلدين اۋداننىڭ ەكونوميكاسىن كوتەرىپ, جاڭا اۋرۋحانانىڭ مەرزىمىندە پايدالانۋعا بەرىلۋىنە كوپ كۇش جۇمسادى. اۋرۋحانا قۇرىلىسى قىزۋ ءجۇرىپ جاتقان كەزدە, ءىسساپاردا بولعانىمىزدا, اۋىل تۇرعىندارىنىڭ سەنبىلىككە قاتىسىپ, جاڭا عيماراتتىڭ قۇرىلىسىن تەزدەتۋگە اتسالىسقاندارىنا كۋا بولعانبىز.
سونىمەن جەتى ايدان بەرى جاڭا اۋرۋحانا جۇمىس ىستەپ تۇر. ونىڭ سالتاناتتى اشىلۋىنا وبلىس اكىمى ب.ساپارباەۆ قاتىستى. شالعايدا جاتقان اۋىل تۇرعىندارى ەندى وبلىس ورتالىعىنا نەمەسە اۋدانعا قاتىنامايتىن بولدى. سەبەبى بەلگىلى, جاڭا اۋرۋحانادا نە كەرەكتىڭ ءبارى بار. № 2 مەديتسينالىق بىرلەستىكتىڭ باس دارىگەرى ارقاباي قادىرباەۆپەن تىلدەسكەنىمىزدە, ول اققاينار, اقسۋ, ورەل اۋىلدارىندا وزدەرىنىڭ بولىمشەلەرى بار ەكەنىن تىلگە تيەك ەتتى. قازىرگى كۇنى مەديتسينالىق بىرلەستىكتە 36 دارىگەر قىزمەت ەتەدى. بارلىعىنىڭ بىلىكتىلىگى جوعارى, ءوز ماماندىعىنىڭ شەبەرلەرى.
– ىشكى اعزالار, حيرۋرگيا, گينەكولوگيا, ينفەكتسيا, رەانيماتسيا, باسقا دا بولىمدەر زاماناۋي جابدىقتارمەن, قوندىرعىلارمەن قامتاماسىز ەتىلگەن. شەتەلدەردىڭ, رەسەيدىڭ دارىگەرلىك جابدىقتارى ساپالى, سىرقاتپەن تۇسكەندەرگە دەر كەزىندە ءتۇرلى تەكسەرۋلەردى جۇرگىزەمىز. قان قۇرامىن انىقتايتىن زەرتحانادا ىسكەر قىزمەتكەرلەر تالاپقا ساي جۇمىس ىستەيدى. قىسقاسى, شالعايداعى جاڭا اۋرۋحانا ەل تاۋەلسىزدىگىنىڭ 20 جىلدىعىنا لايىقتى تارتۋ بولدى, – دەيدى باس ءدارىگەردىڭ ورىنباسارى گۇلميرا قابىلعازىقىزى.
گۇلميرا قابىلعازىقىزىمەن بىرگە ءۇش قاباتتى ەڭسەلى اۋرۋحانانى ارالاپ ءجۇرمىز. سىرقاتتار ەمدەلەتىن بولمەلەر ايناداي تازا, جارىق ەكەن. جوعارى ساناتتى دارىگەرلەر گ.اليپينوۆا, ج.جانپەيىسوۆا, س.بولاەۆ, ق.شەريازدانوۆ جانە تاعى باسقالار ءوز مىندەتتەرىنە ۇنەمى جاۋاپكەرشىلىكپەن قارايدى. جوعارىدا اتى اتالعان اۋىلدارداعى مەديتسينالىق بولىمدەرگە دە قاجەتتى كومەكتىڭ بارلىعى جاسالادى. كاتونقاراعاي اۋدانىنىڭ قازىرگى اكىمى ارمان بەكبوسىنوۆ جاڭا ۇجىمنىڭ قىزمەتىنە كوڭىلى تولاتىنىن ايتا كەلىپ, الداعى ۋاقىتتا تۇرعىندارعا مەديتسينالىق قىزمەت كورسەتۋدىڭ ساپاسى ارتا تۇسەتىنىنە سەنىمى نىق.
ءيا, «100 مەكتەپ, 100 اۋرۋحانا» باعدارلاماسى بويىنشا پايدالانۋعا بەرىلگەن جاڭا اۋرۋحانا ۇجىمى حالىققا ءمىنسىز دە ساپالى قىزمەت كورسەتۋدى باستى پارىز سانايدى.
ونداسىن ەلۋباي.
شىعىس قازاقستان وبلىسى, كاتونقاراعاي اۋدانى.
––––––––––––––––
سۋرەتتەردە: جاڭا اۋرۋحانا; مەديتسينالىق بىرلەستىكتىڭ ءدارىگەرلەرى.
