گرانت يەلەرى جاقىندا انىقتالادى

كەشە  ءبىلىم بەرۋ گرانتتارىن تاعايىنداۋ جونىندەگى رەسپۋبليكالىق كونكۋرستىق كوميسسيا ءوز جۇمىسىن باستادى. كونكۋرستىق كوميسسيانىڭ توراعاسى – ءبىلىم جانە عىلىم ءمينيسترى باقىتجان جۇماعۇلوۆ. كوميسسياعا ءبىلىم جانە عىلىم, دەنساۋلىق ساقتاۋ مينيسترلىك­تەرىنىڭ, جوعارى وقۋ ورىندارىنىڭ رەكتورلارى كىردى. 2011-2012 وقۋ جىلىندا مەملەكەتتىك ءبىلىم تاپسىرىسىنىڭ كولەمى 36 046 گرانتتى قۇ­راي­­دى. ونىڭ 35 046-ى كۇندىزگى وقۋ نىسانىنا, 1000-ى سىرتتاي وقۋ نىسانىنا قاراستىرىلدى. ءبىلىم بەرۋ گرانتتارىن تاعايىنداۋ كونكۋر­سىنا 91 018 تالاپكەر قاتىسسا, ونىڭ ىشىندە قازاق تىلىندە – 66 912, ورىس تىلىندە – 24 106 تالاپ­كەر قاتىستى. سونداي-اق ءبىلىم بەرۋ گرانت­تارىن تاعايىنداۋ كونكۋرسىنا 3070 «التىن بەلگى» يەگەرلەرى, 1240 حالىقارالىق وليمپيادالار مەن عىلىمي جارىستاردىڭ, ورىنداۋشىلاردىڭ رەس­پۋب­ليكالىق جانە حا­لىق­ارالىق كونكۋرستارى مەن سپورتتىق جارىس­تاردىڭ جەڭىمپازدارى قاتىستى. ءبىلىم بەرۋ گرانتتارىن تاعايىنداۋ كونكۋرسىن وتكىزۋ كەزىندە ولارعا باسىمدىق بەرىلەدى. سونىمەن قاتار, مەملەكەت تاراپىنان اۋىل­دىڭ جاستارىنا, ءى, ءىى توپتاعى مۇگەدەك بالالار­عا, سوعىس ارداگەرلەرىنە جانە سوعىس مۇگەدەك­تەرىنە جەڭىل­دىكتەر مەن كەپىلدىكتەر بويىنشا تەڭەستىرىلگەن تۇلعالارعا, قازاق دياسپوراسى وكىلدەرىنە, جەتىم بالالار جانە اتا-اناسىنىڭ قامقورلىعىنسىز قالعان بالالارعا وقۋعا ءتۇسۋ كەزىندە بەكىتىلگەن مەملەكەتتىك ءبىلىم بەرۋ تاپسىرىسىنىڭ كولەمىنەن قابىلداۋ كۆوتاسى قاراستىرىلعان. ءبىلىم بەرۋ گرانتتارى ناقتى ماماندىق­تارعا, ءتىل بولىمدەرىنە جانە وقىتۋ نىساندارى بويىنشا سەرتيفيكاتتاعى بالدارىنا سايكەس تاعايىندالدى. ءبىلىم بەرۋ گرانتىنا يە بولعان جەڭىمپازداردىڭ ءتىزىمى 10 تامىزدان كەيىن رەسپۋبليكالىق «ەگەمەن قازاقستان», «كازاحستانسكايا پراۆدا» گازەتتەرىندە جاريالانادى. – بۇگىن ءبىز جوعارى وقۋ ورىندارىنا قابىل­داۋ بويىنشا جۇرگىزىلگەن ۇلكەن جۇمىستىڭ قورى­تىندىسىن شىعارعالى وتىرمىز, – دەدى ءبىلىم جانە عىلىم ءمينيسترى باقىتجان جۇما­عۇلوۆ كوميس­سيانىڭ وتىرىسىندا سويلەگەن سوزىندە. – نۇرسۇلتان ءابىش ۇلى نازارباەۆ ءوزىنىڭ قازاقستان حالقىنا «بولاشاقتىڭ ىرگەسىن بىرگە قالايمىز!» جولداۋىندا بىزگە ءبىلىم­نىڭ قول جەتىمدىلىگى مەن ونىڭ ساپاسىن ارتتىرۋدىڭ جاڭا تەتىكتەرىن ەنگىزۋدى تاپسىر­عان بولاتىن. سوندىقتان ءبىز لايىقتى تالاپكەرلەردى قولداپ, ولارعا ءبىلىم الۋ ءۇشىن گرانتتى تاعايىن­داۋى­مىز كەرەك. ءمينيستردىڭ حاباردار ەتۋىنشە, بيىلعى جىلى مەملەكەتتىك ءبىلىم بەرۋ تاپسىرىسى 36046 گرانتتى قۇرادى. بۇل وتكەن جىلعىمەن سالىستىرعاندا 621-گە كوپ. نازارباەۆ ۋنيۆەرسيتەتىنە 500 گرانت بولىنگەن. مەملەكەتتىك ءبىلىم بەرۋ تاپسىرىسىنىڭ قۇ­رىلى­مىن ەكونوميكانىڭ دامۋ باسىمدىقتا­رىنا قاراي قايتا قاراعان. ال 350 گرانتقا مەملەكەتتىك تاپسىرىس جاراتىلىستانۋ مامان­دىق­تارىنا كوبەيتىلگەن. سونداي-اق تەحنيكا­لىق جانە تەحنولوگيالىق ماماندىقتارعا بولىنگەن گرانت 362-گە, اۋىل شارۋاشىلىعى جانە ۆەتەري­نار­لىق ماماندىقتارعا قاراستى­رىلعان گرانت 280-گە ارتىپ وتىر. – بيىلعى جىلى جوعارى وقۋ ورىندارىنا مەملەكەتتىك تاپسىرىستى كونكۋرستىق نەگىزدە ورنالاستىرۋ مەحانيزمى ەنگىزىلدى, – دەدى مينيستر ءارى قاراي. – گرانت بويىنشا وقىتۋ قۇقى­­عىنا قاتاڭ تالاپتارعا سايكەس كەلەتىن 85 جوعارى وقۋ ورنى يەلەندى. بيىل ۇبت-عا 126 109 ءبىتىرۋشى قاتىستى. بۇل وتكەن جىلمەن سالىستىرعاندا 18 564-كە ارتىق. وتىرىستا باقىتجان جۇماعۇلوۆ قانداي ما­ماندىقتارعا كونكۋرس جوعارى ەكەنىنە دە توقتالدى. ءمينيستردىڭ ايتۋىنشا, ءبىر ورىنعا كونكۋرس 2,8 ادامدى قۇراپ وتىر. ماسەلەن, قارجى ماماندى­عىنا ءبىر ورىنعا 28,8 ادامنان, حالىقارالىق قا­تىناس – 19,3, گەوگرافيا – 19,4, يۋريسپرۋدەنتسيا – 17,8 ادامنان كەلەدى, ال راديوتەحنيكا, ەلەكترونيكا ءجا­نە تەلەكوممۋنيكاتسيا – 5,91 گەودەزيا جانە كارتوگرافيا ماماندىقتارىنا 4,7 ادامنان كەلىپ وتىر. ءاليسۇلتان قۇلانباي.