قر قارۋلى كۇشتەرىنىڭ 25 جىلدىعىنىڭ قۇرمەتىنە مارافون ۇيىمداستىرىلدى. وعان ەكى مىڭنان استام جەلاياق قاتىستى.
«بۇقارالىق سپورتتى دامىتۋعا باعىتتالعان مۇنداي شارا ەندى جىل سايىن وتكىزىلەدى» - دەيدى قالا اكىمى سەرىك شاپكەنوۆ.
10 كم, 21 كم قاشىقتىققا جۇگىرىپ, وزا شاپقاندار ارنايى ماراپاتتارعا يە بولدى. ال 7 مامىردا مۇنايلى ايماق تۇرعىندارى يساتاي-ماحامبەت اتىنداعى ورتالىق الاڭعا جينالىپ, استاناداعى اسكەري پارادتى تىكەلەي كورسەتىلىم ارقىلى تاماشالادى. «مەن قازاقتىڭ ساربازىمىن» اتتى اتىراۋ گارنيزونى بولىمدەرى اسكەري قىزمەتكەرلەرىنىڭ كونتسەرتى دە وسى كۇنگە ورايلاستىرىلدى. 8 مامىردا ەكىنشى دۇنيەجۇزىلىك سوعىسقا قاتىسقاندارعا جانە 1921 جىلى گۋرەۆ قالاسىندا كەڭەس ۇكىمەتىن ورناتۋ جولىندا كۇرەسىپ قازا تاپقاندارعا ارنالعان ەسكەرتكىشكە گۇل قويۋ ءراسىمى بولدى. «قاھارمان ۇلت – ماڭگىلىك پولك» جالپىرەسپۋبليكالىق اكتسياسىنا اتىراۋلىق مايدانگەرلەردىڭ ۇرپاقتارى ءۇن قوستى. اسكەري وركەستردىڭ اۋەنىمەن سوعىسقا قاتىسقان تۋىستارىنىڭ سۋرەتتەرىن الىپ جۇرگەن 700-دەن استام قالا تۇرعىنى جەڭىس ساياباعىنداعى ماڭگىلىك الاۋعا گۇل شوقتارىن قويدى. قالالىق جاستار رەسۋرستىق ورتالىعىنىڭ ۇيىمداستىرۋىمەن سالتاناتتى شارا ءوتىپ, بەيبىت كۇندى بەينەلەيتىن اق كوگەرشىندەر كوككە ۇشىرىلدى.
جەڭىس كۇنى مەرەكەسىندە سوعىستا قازا تاپقان جەرلەس جاۋىنگەرلەرگە ارنالعان ماڭگىلىك الاۋعا گۇل شوقتارىن قويۋ ءراسىمى ۇيىمداستىرىلدى. وعان وبلىس اكىمى نۇرلان نوعاەۆ قاتىسىپ, مەرەكەلىك لەبىز جولدادى. وتتى جىلداردا اتىراۋ وبلىسىنان قان مايدانعا اتتانعان 42 509 جاۋىنگەردىڭ 29 222-ءسى عانا تۋعان جەرگە امان ورالدى. قازىر سونىڭ 42-ءسى ورتامىزدا. جەڭىستىڭ 72-ءنشى جىلىن قارسىلاعان سوعىس ارداگەرى الىبەك تۇسىپاليەۆ: «ەل بولاشاعى ءۇشىن جاندارىن قيعان بوزداقتاردىڭ ەڭبەكتەرى اقتالدى. ۇرپاعىمىز تاۋەلسىز, بەيبىت ەلدە ءومىر سۇرىپ جاتىر. وسى تىنىشتىق ماڭگىلىك بولسىن» - دەيدى.
