باس جۇلدە بىزدە قالدى

استانادا تەننيستەن ەرلەر جانە ايەلدەر ارا­سىندا پرەزيدەنت كۋبوگى جولىنداعى حالىق­ارا­لىق تۋرنير ءوتتى. الەمنىڭ 30-دان استام ەلىنەن تانىمال تەننيسشىلەر قاتىسقان تۋرنيرگە ءبىزدىڭ ەلىمىزدەن قازاق­ستاننىڭ ءبىرىنشى راكەتكالارى اندرەي گولۋبەۆ (اتر رەيتينگىندە 46-ورىن), ميحايل كۋكۋشكين (67), زارينا دياس (WTA رەيتينگىندە 173-ورىن), گالينا ۆوسكوبوەۆا (164) جانە باسقالارى قاتىسىپ, كۇش سىناستى. بۇل سىندا ءبىزدىڭ تەننيسشىلەر العاشقى كۇنگى كەزدەسۋلەرىن الا-قۇلا باستاعانىمەن ءتۋرنيردىڭ سوڭىندا جاقسى ونەر كورسەتىپ, جۇلدەلى ورىندارعا يە بولدى. ءسويتىپ,  225 مىڭ اقش دوللارى تۇرا­تىن جۇلدە قورىن ءوزارا ءبولىسىپ الدى. تۋرنيردە سەسيل كاراتەنچەۆا العاشقى كەزدەسۋىندە قىتايلىق سايساي چەنگتى قينالماي ۇتتى. قازاقستان جاستار قۇراماسىنىڭ مۇشەسى اناستاسيا ەپيشەۆا, كەرىسىنشە, رەسەيلىك ەكاتەرينا ياشينادان جەڭىلىپ قالدى. وسى كۇندەرى كوبىنە شەتەلدە ەلىمىزدىڭ اتىنان سىنعا ءتۇسىپ جۇرگەن ميحايل كۋكۋشكين مەن اندرەي گولۋبەۆ بولسا, قارسىلاستارىنان باسىم ءتۇستى. العاشقىسى, رەسەيلىك ۆاي ۋزاكوۆتى وڭاي جەڭسە, سوڭعىسى ەرۆاند گاسپارياندى ارەڭ دەگەندە ۇتتى. وسىلاردان باسقا گالينا ۆوسكوبوەۆا, زارينا دياس, دەنيس ەۆسەەۆ, سەرجان ەسەنبەكوۆ, اسەل ارعىنباەۆا, الەكسەي كەدريۋك, دميتري ماكەەۆ, اپالى-ءسىڭلىلى داريا جانە ناتاليا بەرەجنايالار ونەر كورسەتتى. وليمپيالىق جۇيە بويىنشا ءبىر اپتا بويى وتكەن ءتۋرنيردىڭ جارتىلاي فينالىنا ەرلەر اراسىندا ميحايل كۋكۋشكين مەن اندرەي گولۋبەۆ شىقتى. سوڭعىسى ۋكراين سەرگەي بۋبكادان وتە الماسا, كۋكۋشكين كەرىسىنشە, تۋنيستىك مالەك ءجازيريدى وڭاي ۇتتى. ال فينالدا كۋكۋشكين قارسى­لاسىنا دەس بەرمەدى. ايەلدەر اراسىنداعى جۇپتىق سىندا گالينا ۆوسكوبوەۆا, رەسەيلىك ۆيتاليا دياچەنكو ەكەۋى وزبەك قىزى اكگۇل امانمۋرادوۆا مەن رەسەيلىك الەكساندرا پانوۆادان باسىم ءتۇستى. ۆوسكوبوەۆا بيىل وسىمەن جۇپتىق سىندا ءتورتىنشى رەت جەڭىسكە جەتىپ وتىر. وتكەن اپتادا تۋريزم جانە سپورت ءمينيسترى تالعات ەرمەگياەۆ اندرەي گولۋبەۆ پەن ميحايل كۋكۋشكينگە قازاقستاننىڭ ەڭبەك سىڭىرگەن قايراتكەرى اتاعىن سالتاناتتى تۇردە تابىس ەتتى.