كونگوداعى تشۋاپا وزەنىندە 220 جولاۋشى مىنگەن ەكى كەمە سوقتىعىسىپ, ناتيجەسىندە 105 ادام جاعالاۋعا ءجۇزىپ جەتكەن. قالعانى سۋعا باتىپ كەتكەنى بەلگىلى بولىپ وتىر.
بۇل ەلدە جولداردىڭ ناشار بولعانى سونشالىق, جولاۋشىلار كوبىنەسە سۋ كولىگىن تاڭدايدى ەكەن. ال وزەن قايىقتارىنىڭ ابدەن توزىعى جەتكەن. وتكەن جىلى دا كەمە ءتوڭكەرىلىپ, 140 ادام سۋعا كەتكەن-ءدى. ونىڭ ۇستىنە بۇل ەلدە تىرىسقاق اۋرۋى ءورشىپ تۇر. سوڭعى ءتورت اي ىشىندە 279 ادام وسى اۋرۋدان كوز جۇمعان.
ليۆيادا اسكەرباسى ءولتىرىلدى
ليۆيادا وسى كەزگە دەيىن كوتەرىلىسشىلەردى باسقارىپ كەلگەن ابدەل فاتتاح يۋنەس اجال قۇشتى. بۇرىن كاددافيدە مينيستر بولىپ قىزمەت اتقارعان ول ولەرىنەن ءۇش ساعات بۇرىن تريپوليمەن بايلانىسى بار دەگەن كۇدىكپەن تەرگەلگەن كورىنەدى.
يۋنەستى تاسادا جاسىرىنعان قارۋلى ادامدار اتىپ ءولتىرگەن. ونى ۇلتتىق وتپەلى كەڭەس سوعىسىپ جۇرگەن جەرىنەن شاقىرتىپ الىپ, وسى كەزگە دەيىن كوتەرىلىسشىلەر قولىنا ءتيىپ كەلگەن قارۋ-جاراقتىڭ تريپوليگە جونەلتىلۋىن سۇراپ بىلگەن. كەزىندە ىشكى ىستەر ءمينيسترى بولعان يۋنەس اسكەردى حالىق جاعىنا شىعۋعا شاقىرعان جوعارى لاۋازىم يەسى دە. ءوزى اسكەري جاساقتارعا باسشىلىق جاساۋعا كىرىسكەن ەدى.
ۋكراينادا شاحتا جارىلدى
ۋكراينانىڭ لۋگانسك وبلىسىنا قاراستى «سۋحودولسكايا-ۆوستوچنايا» شاحتاسىندا ورىن العان جارىلىستان 16 كەنشى قازا تاۋىپ, تاعى ەكەۋى اۋرۋحاناعا جەتكىزىلگەن. جارىلىس سالدارى ازىرگە بەلگىسىز كۇيىندە قالىپ وتىر.
جارىلىس 915 مەتر تەرەڭدىكتە ورىن العان. توتەنشە جاعدايلار مينيسترلىگىنىڭ مالىمەتىنە قاراعاندا, جارىلىس كەزىندە شاحتادا 28 ادام بولعان. ال 10 شاحتەردىڭ تاعدىرى بەلگىسىز. ىزدەستىرۋ-قۇتقارۋ جۇمىستارىنا كەن-قۇتقارۋ قىزمەتىنىڭ 11 بولىمشەسى كىرىسىپ كەتكەن.
اقش يراندى تاعى ايىپتادى
باراك وباما اكىمشىلىگى يراندى «ءال-كايدامەن» بايلانىسى بار دەپ ايىپتادى. اقش وكىمەتىنىڭ ءمالىمەتىنە قاراعاندا, يران اۋعانستان مەن پاكستاندا سودىرلاردى دايىنداۋ ءۇشىن قارجىلاندىرىپ وتىرعان تەررورشىلدىق جەلى بولىمشەسىمەن «قۇپيا كەلىسىم» جاساسقان.
اتالعان بولىمشەنىڭ التى مۇشەسى اقش قارجى مينيسترلىگى تاراپىنان تەررورشى دەپ تانىلدى. الايدا ولاردىڭ اراسىندا بىردە-ءبىر يراندىق جوق بولىپ شىققان. سويتسە دە قارجى مينيسترلىگى اراب ەلدەرىنەن جيناقتالعان قارجىنى يراندا «ءال-كايدا» ارقىلى پاكستانعا قارجى جونەلتىپ وتىرعان ەزەدين ابدەل-ازيز حاليل توبىنىڭ بولعانىن ايتادى.
مينسك ارەكەتسىزدىكتى زاڭمەن اۋىزدىقتايدى
بەلورۋسسيادا سوڭعى كەزدە ءار ءتۇرلى قارسىلىق اكتسيالارىنىڭ ورىن الۋىنا بايلانىستى وسى ەلدىڭ پارلامەنتى جاپپاي ۇيىمداسقان ارەكەتسىزدىك ءۇشىن جاۋاپكەرشىلىككە تارتاتىن زاڭ جوباسىن قابىلدادى.
اتالعان زاڭدىق قۇجاتقا سايكەس ەندى الدىن-الا بەلگىلەنگەن قوعامدىق ورىنداردا ازاماتتاردىڭ جاپپاي قاتىسۋى ەرەۋىلگە تەڭەستىرىلمەك. وسىعان بايلانىستى مۇنداي اكتسيالاردى وتكىزۋ ءۇشىن بيلىكتىڭ رۇقساتى قاجەت بولادى.
توكيودا قولدان ءتىس ءوسىرىلدى
توكيو عىلىمي-زەرتتەۋ ۋنيۆەرسيتەتىنىڭ عالىمدارى دىڭگەكتى جاسۋشادان ءتىس ءوسىرۋدى ۇيرەنگەن. قولدان ءوسىرىلگەن «تىستە» كادىمگى تىستەگىدەي ەمال, نەرۆ جانە قان تامىرلارى بار.
ءتىس ءوسىندىسى كەمىرگىش بۇيرەگىندەگى قاپتامادا جەتىلدىرىلىپتى. ءتىس ءوسىندىسى ەكىنشى كەمىرگىشتىڭ جاق سۇيەگىنە قوندىرىلعان. قولدان قويىلعان ءتىس كەمىرگىشتىڭ ءوز تىسىندەي بولىپ كەتتى, دەيدى دوكتور تاكاسي تسۋدزي. الايدا عالىمدار ترانسپلانتانتتى ادامدار ءۇشىن قاشان وسىرۋگە بولارىن ايتۋعا قينالۋدا. جيىرما جىل جەتكىلىكتى دەسە دە عالىمدار ماسەلەنىڭ ەتيكالىق جاعىن دا ۇمىت قالدىرعىسى جوق.
قىسقا قايىرىپ ايتقاندا:
*يراك تارابى ۋكرايناعا اۋدارىلۋى ءتيىس 21 ميلليون دوللار قارجىدان قارۋ-جاراقتى دەر كەزىندە جەتكىزىپ بەرمەگەنى ءۇشىن 3 ميلليونىن ۇستاپ قالدى. ەكى ەل اراسىنداعى كەلىسىم-شارت 457,5 ميلليون دوللارعا جاسالعان كورىنەدى. *بەرناند مەددوف قارجىلىق پيراميداسىنىڭ وكىلى الدانىپ قالعان Tremont Group Holdings سالىمشى-كومپانياسىنا 1 ميلليارد دوللاردى قايتارۋ تۋرالى كەلىسىم جاسادى. سالىمشىلار جاپا شەككەن سوما 60 ميلليارد دوللاردان اسىپ جىعىلادى. بوليۆيادا وسى ەلدەگى بۇقارالىق اقپارات قۇرالدارىنىڭ 90 پايىزى مەملەكەتتىك بولادى. كونگرەسس ەلدەگى تەلە جانە راديو ارنالارعا جەكە بيزنەستىڭ ىقپالىن ازايتاتىن زاڭدى باسىم داۋىسپەن قابىلدادى. وپپوزيتسيا ەل پرەزيدەنتى ەۆو مورالەستى بۇقارالىق اقپارات قۇرالدارىن ءوز قولىنا الماقشى دەپ كىنالاسا, قارسى جاق اقپارات تاراتۋ ساپاسى ارتادى دەپ وتىر. *2012 جىلى كەترين بيگەلوۋ تۇسىرىلىمىندەگى Sony كومپانياسىنىڭ «ءال-كايدا» ليدەرى ۋساما بەن لادەننىڭ كوزىن جويۋ جونىندەگى ءفيلمدى پروكاتقا شىعارۋ ۇيعارىلىپ وتىر. ءفيلمدى ءتۇسىرۋدى امەريكالىق اسكەردىڭ يراكتاعى سوعىسىنا ارنالعان «داۋىل ءامىرشىسى» ءفيلمى ءۇشىن 2010 جىلى التى «وسكاردى» جەڭىپ العان توپ قولعا الماقشى.ينتەرنەت ماتەريالدارى نەگىزىندە ازىرلەندى.
