باپ پەن باق

الەم چەمپيوناتىنىڭ شيرەك فينالى دا كەلىپ جەتتى. وعان قازاقستان قۇراماسىنان ىرىكتەۋ جەكپە-جەكتەرىنەن سۇرىنبەي وتكەن 9 بوكسشى جولداما الدى. وكىنىشكە قاراي, 4 بوكسشىمىزدىڭ كەلەسى اينالىمعا شىعۋعا شاماسى جەتپەدى. وسى سىندا جاڭاعى جەڭىلگەن ءتورت بالامىز جامان ونەر كورسەتتى دەپ ايتا المايمىز. ولجاس قا­لاۋ­بەك (46 كگ.), الىبەك باساپا (48 كگ.) راۋان زاتۋللا (52 كگ.), ەربولات ەرمەكوۆ (57 كگ.) شيرەك فينالعا شىعۋعا بارىن سالدى. ءتىپتى سوڭعىسى ءبىرىنشى كەزدەسۋدە قارسىلاسىن ۇتىپ, ءبىراز ۋاقىت ءۇمىتىن ارقالاپ ءجۇردى. بىراق, بوكستىڭ اتى بوكس. سپورتتا جەڭىس پەن جەڭىلىس, ءسۇيىنىش پەن كۇيىنىش قاتار جۇرەتىنى بەلگىلى. بۇل باسەكەدە ەڭ بولماسا تورتەۋىنىڭ ەكەۋىنىڭ جارىستى جالعاس­تىرۋعا ءجونى بار ەدى. مىسالى, 16 جاس­تاعى ولجاس قالاۋبەك سپورت شەبەرلىگىنە ءۇمى­تكەر, وسى كەزگە دەيىن 28 كەزدەسۋ وتكىزىپ, سونىڭ ەكەۋىندە عانا جەڭىل­گەن. قالعان جەكپە-جەكتەرىندە قار­سى­لاستارىن وڭدىرماي ساباعان بوكسشى. الىبەك باساپا دا سول سياقتى. 29 رەت رينگكە شىعىپ, سونىڭ التاۋىندا عا­نا جەڭىلىس تاپقان. وسىنى ويلاپ ءتو­رە­­شىلەر تاراپىنان ءبىر قىساستىق, قۇرباندىق ەتۋ سياق­تى نارسەلەردىڭ بولۋى ابدەن مۇمكىن دەگەن وي­لار دا كەلەتىنى جاسىرىن ەمەس. دەگەنمەن قارسى­لا­ستارىمىزدىڭ جو­لى بولسا, سوڭىنان ءسوز ەرىتىپ, تورە­شىلەرگە سىن ايتاتىن ءبىز ەمەس. ءبىزدىڭ جەڭىلگەن با­لالارعا ەندى وسىدان ساباق الىپ, ءتا­جى­ريبە جيناق­تاي بەرۋ عانا قالادى. ال شيرەك فينالعا شىققان بوكسشى­لارى­مىزدىڭ ءبارى قازىر جاراپ تۇر. سەيسەنبى كۇنى ولار كەلەسى اينا­لىمعا جولداما الۋ ءۇشىن قولدان كەل­گەننىڭ ءبارىن جاسادى. بەكجان كىبىت­قاليەۆ (54 كگ.) پەن ايان قاليبەكوۆ (60 كگ.) ازەربايجان مەن نەمىس بوكسشى­لارىنىڭ ەكى اياعىن ءبىر ەتىككە تىقتى دەسە بولادى. ال اۋىر سالماقتاعى ديدار تولەگەننىڭ جەڭىسكە دەگەن جىگەرلىگى بىردەن كوزگە ۇرادى ەكەن. كەشەگى ايقاستا قارسىلاسىن جەڭ­گەن ول «مەن الەم چەمپيونى بولامىن» دەپ بىردەن كەسىپ ايتتى. اۋزىن اشسا, ار جاعىنان جۇرەگى كورى­نە­تىن بۇل بالا­نىڭ وسى سوزىنە قالاي ريزا بولماي­سىڭ. ول ءوزى 18 رەت رينگكە شىعىپ, سو­نىڭ ەكەۋىندە عانا جەڭىلگەن ەكەن. وسى جولدان تايماسا, ونىڭ 2016 جىل­عى وليمپيا­داعا با­رۋى ءاب­دەن ءمۇم­كىن. ءتىل-كوزدەن ساق بولسا, ديداردىڭ الار اسۋى ءالى الدا. قا­زىر بىزدە اۋىر سالماقتاعى بوكس­شى­لار از, ولار­دىڭ اراسىندا باسە­كە­لەس­تىك جوق دەپ ءجيى ايتاتىن ادەتىمىز بار عوي. سونى ەسكەرىپ, باپكەرلەرىمىز وسىن­داي بالالاردى  اۋىل اۋىلدان جاعالاپ ءجۇرىپ الىپ, ءتار­بيەلەپ, بوكسشى ەتىپ وسىرسە دەيمىز. بۇل  ءما­سەلە بۇگىنگى قازاق سپورتىنىڭ باس اۋىرتىپ تۇر­عان باستى ماسەلەسى. ال ونى شەشۋ ىنتا مەن جىگەرگە باي­لا­نىستى. ەگەر ءبارىمىز بولاشاعى­مىز­دى وي­لاپ, بالالارعا جول كورسەتىپ وتىر­ساق, ەرتەڭ ولار­دىڭ ەل نامىسىن قور­عاپ, مەرەيىمىزدى وسىرە­تىنى ءسوزسىز. وسى رەتتە ءبىزدىڭ ءجاسوس­پىرىمدەر قۇرا­ما­­سى­نىڭ باسىم بولىگىن تاربيەلەپ, ءوسىر­گەن بىلىكتى باپكەر زاڭعار قاس­قاەۆ پەن قۇرامانىڭ اعا باپكەرى سۇلتان كوستوەۆتىڭ الدىن­دا ۇلكەن مىندەت تۇرعانىن اتاپ وتكەن ءجون. قا­زىر وسى باپكەر­لەرى­مىزدىڭ ءبىر ەڭ­بەگى, ول ەلىمىزدە تۇڭعىش رەت ءوتىپ جات­قان الەم چەمپيوناتىنا 13 بالامەن بارىپ, سونىڭ 9-ىن شيرەك فينالعا شىعار­عانى دەۋگە بولادى. سولاردىڭ قاتا­رىندا سەيسەنبى كۇنى ادەمى ونەر كور­سەتكەن زاڭعار تەمىرحان, داۋىتبەك قايىرگەلدى, اقىلبەك ادىلعاليەۆ, داۋلەت بايعاباتوۆ, اسقار ءدۇيسالى مەن تىلەك قوزباقوۆ­تىڭ الداعى اي­قاس­تاردا باپكەر­لەر­دىڭ ءۇمىتىن اقتاپ, جۇلدەلى ورىندارعا كۇرەسەتىنىنە سەنىم مول. داستان كەنجالين.