*قىتايدىڭ «سينحۋا» اگەنتتىگى نيۋ-يوركتىڭ تايمس-سكۆەرىندەگى ەڭ ءبىر جاقسى دەگەن جارنامالىق ورىنداردى ساتىپ الدى. ەندى بۇل الاڭداردا اۋماعى 60, ال بيىكتىگى 40 فۋتتىق «سينحۋا» جازۋى جارقىراپ تۇراتىن بولادى. قىتاي تارابى وسى ءۇشىن ايىنا 300-400 مىڭ دوللار تولەمەك.
*اقش پرەزيدەنتى باراك وباما ۇلتتىق تەلەارنادان ءسوز سويلەپ, وسى ەلدىڭ ءوز قارىزدارىن تولەي الماۋى قاۋپى تۋعاندىعىن جاريا ەتتى. سوندىقتان كونگرەسكە شەشىم قابىلداۋ ءۇشىن ءبىر اپتا ۋاقىت قالىپ وتىر دەگەن ەسكەرتۋىن دە جاسادى. ارتىنشا تەلەەفيردەن كورىنگەن كونگرەسس وكىلدەر پالاتاسىنىڭ سپيكەرى دجون بەينەر مەملەكەتتىك قارىزدىڭ دەڭگەيىن كوتەرمەيتىندىكتەرىن, ەكونوميكانىڭ جاي-كۇيىنە وباما جاۋاپ بەرەتىنىن قاداپ ايتتى.
*نيگەردە وسى ەلدىڭ پرەزيدەنتى ماحامادۋ يسۋفۋدى ءولتىرىپ, توڭكەرىس جاساماق بولدى دەگەن ايىپپەن ءبىر توپ اسكەري تۇتقىندالدى. كۇدىكتىلەردىڭ اراسىندا مايور, لەيتەنانت شەنىندەگىلەر دە بار كورىنەدى. بۇنىڭ الدىنداعى پرەزيدەنت تە اسكەري توڭكەرىس سالدارىنان تاعىنان كەتكەن.
*شۆەيتساريا ۇلتتىق ۆاليۋتاسى 30 پايىزعا كوتەرىلدى. بۇل اقش پەن ەۋروپاداعى ەكونوميكالىق تۇراقسىزدىقتاردىڭ بولۋى ءمۇمكىندىگىمەن بايلانىستى بولىپ وتىر. ينۆەستورلار قارجىلىق تولقۋلاردان قاشىپ, ءوز قارجىلارىن تۇراقتى سانالاتىن شۆەيتساريالىق فرانكتە ساقتاۋعا نيەتتى ەكەندىكتەرىن بايقاتىپ وتىر.
*مينسكىدە «الەۋمەتتىك جەلى ارقىلى رەۆوليۋتسياعا» اكتسياسىنا قاتىسۋشىلارىنىڭ ۆەلوسيپەدپەن ءجۇرىپ وتۋشىلەرگە قوسىلىپ كەتۋى قاۋپىنەن ونى وتكىزبەۋ ۇيعارىلعان. ۇنسىزدىك اكتسياسىنا قاتىسۋشىلار شوس («شوب ون سەل», «شوب ون سدوح») دەگەن جازۋى بار مايكىلەردى كيىپ ۆەلوشاباندوزداردىڭ اراسىنان تابىلماق بولىپتى.
*كوسوۆونىڭ سولتۇستىگىندە بىرنەشە جۇزدەگەن سەرب جولدى جۇك كولىكتەرىمەن بوگەپ, جەرگىلىكتى پوليتسيانىڭ ول جاقتا باقىلاۋ ورناتۋى جونىندەگى وپەراتسياسىنا قارسىلىق كورسەتىپ باعۋدا. وسى ەلدىڭ پرەمەر-ءمينيسترى حاشيم تاچي سولتۇستىك اۋماقتاردى تولىق باقىلاۋعا الۋ تۋرالى پوليتسيا قىزمەتىنە بۇيرىق بەرگەن كورىنەدى. مۇنداعى جاعداي ۋشىعىپ كەتۋى دە مۇمكىن دەلىنۋدە.
*بۇۇ-نىڭ ليۆيا تۋرالى بايانداماسىندا كاددافي باسقاراتىن اۋماقتا وتىن تاۋسىلىپ, ازىق-ت ۇلىك پەن قارجى تاپشىلىعى سەزىلگەندىگى اشىپ ايتىلادى. ال ليۆيا بيلىگى اۋە سوققىسىنان زليتان قالاسىنداعى اۋرۋحانادا جەتى ءدارىگەر مەن مەدبيكەلەردىڭ قازا تاپقانىنا ناتو تارابىن ايىپتاۋدا.
*رەسەيدە جانارمايعا دەگەن باعا جارتى جىلدا 11 پايىزعا ءوسكەنى بەلگىلى بولدى. كوكتەمدە بۇل ەلدە «جانارماي پروبلەماسى» ورىن الىپ, ماي قۇيۋ بەكەتتەرىندە ءبىراز ابىگەرلىك ورىن العان-دى. وكىمەت ءوز كەزەگىندە مۇنايعا قويىلاتىن سالىقتى 60-تان 90 پايىزعا دەيىن كوتەرۋگە ءماجبۇر بولدى. قازىر دە جاعداي اناۋ ايتقانداي قالىپتى ەمەس.
*لوندوندا مۇناي فيۋچەرسىنە دەگەن باعا باررەلىنە 117,94 دوللارعا كەلىپ تۇراقتادى. وسىلايشا Brent ماركالى ءسولتۇستىكتەڭىزدىك مۇنايعا دەگەن باعا 0,73 دوللارعا تومەندەگەن. ال نيۋ-يوركتەگى باعا 99,20 دوللاردى قۇراپ, 0,67 دوللارعا ارزاندادى.
*بريتانيالىق ءانشى ەمي ۋاينحاۋستىڭ دەنەسى ونىڭ وتباسىنىڭ تالابىمەن جەرلەنەتىن ورنى مەن ۋاقىتى كوپشىلىككە جاسىرىن ءوتكىزىلمەكشى. ءانشىنىڭ ءولى دەنەسى ونىڭ لوندونداعى ۇيىنەن تابىلعان بولاتىن. بىراق ءالى كۇنگە ءولىمنىڭ نەدەن بولعانىن انىقتاۋ مۇمكىن بولماي وتىر. تولىق ساراپتاۋ قورىتىندىسى ءبىر ايدان كەيىن بەلگىلى بولماق.
ينتەرنەت ماتەريالدارى نەگىزىندە ازىرلەندى.
