«ەلىم!» دەگەن ەلباسى ەلىنەنبىز

ەلباسىنىڭ جيىرما جىلدان بەرگى كوكسەگەن ارمانى مەن كوزدەگەن ماقساتى – قازاقستان حالقىنىڭ ءال-اۋقاتىن نىعايتۋ ەكەنى بەلگىلى. قۋانىشتىسى سول, ەلدەگى بىرلىك پەن بەرەكەنىڭ ارقاسىندا ەلباسى دا, ەل دە, مىنە, وسى ارمان مەن ماقساتقا بىرتىندەپ قول جەتكىزىپ كەلەدى. ارينە, «داعدارىس», «ينفلياتسيا» دەگەن جەگى قۇرتتىڭ قاي ەلدە, قاي جەردە بولماسىن ەڭ ءبىرىنشى بيۋدجەتتىك مەكەمە قىزمەتكەرلەرىنىڭ قالتاسىنا اۋىز سالاتىنى وتىرىك ەمەس. دەي تۇرساق تا, دۇنيە ءجۇزىن قالتىراتقان ەكونوميكالىق داعدارىستىڭ سالدارىنا ۇڭىلسەك (مىسالعا, ءبىر عانا گرەكيانى الايىق), قازاقستان حالقىنىڭ الەۋمەتتىك جاعدايىنىڭ اناعۇرلىم جاقسى ەكەنىنە كوز جەتكىزە تۇسەمىز. ونىڭ ۇستىنە ءبىزدىڭ ەلدە ونەركاسىپ پەن ەكونوميكا جىلدان-جىلعا دامىپ, سونىڭ تاماشا دالەلىندەي جالاقى, زەينەتاقى, الەۋمەتتىك جاردەماقىلار دا ءوسىپ وتىر. ال بۇل ءوسىپ-وركەندەۋگە ەشقانداي قيىندىق, توسقاۋىل بولعان جوق. ناقتى مىسالدى الىستان ىزدەمەي, ءوزىم باسشىلىق ەتەتىن شاعىن ۇجىم ومىرىنەن الايىن. كەڭسە قىزمەتىنىڭ قاعازباستى تىرلىگىنە ەرتە كەلىپ, كەش قايتاتىن باس مامان, مىسالى, بۇعان دەيىن 54 207 تەڭگە كولەمىندە ايلىق الىپ كەلسە, ەندى 1 شىلدەدەن باستاپ 70 469 تەڭگە الاتىن بولدى. ال ءبولىم باستىعى 101 مىڭ تەڭگە كولەمىندە ايلىق السا, ەندى 130 مىڭ تەڭگە الادى. دەمەك, بۇل بيۋدجەتتىك مەكەمە قىزمەت­كەرلەرىنىڭ ايلىعى 200 اقش دوللارىنا جۋىق كوبەيىپ وتىر دەگەن ءسوز. ەندەشە, ەلباسىنا, داعدارىسقا قارسى تۇرا بىلگەن ونىڭ دارابوز ساياساتىنا بيۋدجەتتىك مەكەمەدە ەڭبەك ەتەتىن بارشا قىزمەتكەرلەر شىن جۇرەكتەن ريزا دەر ەدىم. ارينە, «ەڭبەك ەتپەگەن ءىشىپ-جەمەيدى» دەگەندەي, ەلباسىنىڭ قامقورلىعىن ارقالانىپ, قول قۋسىرىپ وتىرۋعا بولمايدى. «ەڭبەك ەتسەڭ ەرىنبەي, تويادى قارنىڭ تىلەنبەي» دەگەن ءسوز دە وسى ويدى شەگەلەي تۇسەدى. سوندىقتان ەلىمىزدىڭ وركەنيەتتى, باقۋاتتى جانە بەيبىت بولاشاعى ءۇشىن ەلباسى سەنىمىنىڭ ۇدەسىنەن شىعىپ, الداعى ۋاقىتتا تەك قانا بار كۇش-جىگەرىمىزدى جۇمساپ ەڭبەك ەتە بەرەيىك. ويتكەنى, ءبىز «ەلىم!» دەگەن ەلباسى بار ەلدەن بولامىز! قىرعىزالى تىلەۋوۆ, جامبىل وبلىستىق تىلدەردى دامىتۋ باسقارماسىنىڭ باستىعى.