«استانا سامالى»

ەلوردا كۇنى اياسىنداعى مەرەكەلىك شارالاردىڭ ءبىر شوعىرى ۇرمەلى اسپاپتار وركەسترلەرىنىڭ «استانا سامالى» حالىقارالىق فەستيۆالى شەڭبەرىندە ءوتتى. ونىڭ اشىلۋ سالتاناتى جاستار سارايىنىڭ جازعى الاڭقايى الدىندا وتسە, كەشە ونەر ۇجىمدارى استانا اكىمدىگىنىڭ الدىندا جۇرتشىلىق نازا­رىنا پلاتس-كونتسەرت ۇسىندى. «استانا سامالى» – بۇل قايتالان­باس مۋزىكالىق شوۋ. الەمنىڭ كوپتەگەن ەلدەرىندەگى ۇرمەلى اسپاپتار شەبەر­لەرىنىڭ باسىن ءبىر ساحنا اياسىنا جيا­تىن جىل سايىنعى ءداستۇرلى شارا. ءداستۇرلى بولاتىن سەبەبى, بۇل فەستيۆال وسىمەن 3-ءشى مارتە ۇيىم­داس­تىرىلىپ وتىر. شاھار تۇرعىندارى مەن قالا قوناقتارىنا تاماشا مەرەي­تويلىق كوڭىل-كۇي سىيلاۋدى كوزدەگەن بۇل فەستيۆالگە ۇيىتقى بولعان استانا قالالىق مەملەكەتتىك فيلار­مونياسى. بيىلعى جىلعى حالىقارالىق شاراعا قاتىسۋعا جەر-جەردەن بىرنەشە ۇرمەلى اسپاپتار وركەسترلەرىنىڭ ۇجىمدارى كەلىپتى. ولار: مەملەكەتتىك فيلارمونيانىڭ ۇرمەلى اسپاپتار وركەسترى (استانا), قۇرلىق اسكەرى اسكەري ينستيتۋتىنىڭ ۇرمەلى اسپاپتار وركەسترى (الماتى), «وڭتۇستىك» اسكەري وكرۋگىنىڭ ۇرمەلى اسپاپتار وركەسترى (تاراز), رەسپۋبليكالىق گۆارديانىڭ پرەزيدەنتتىك وركەسترى (استانا), سون­داي-اق, رەسەيدىڭ ەكى قالاسى – ماسكەۋ جانە ءنوۆوسىبىر قالالارىنان ارنايى ات ارىتىپ كەلگەن ۇرمەلى اسپاپتار وركەسترلەرىنىڭ ۇجىمدارى. وزىنە ءتان قالىبى مەن ەرەكشەلىگى بار اسپاپتاردا شەبەر وينايتىن ونەر ۇجىمدارىنىڭ كونتسەرتىنە جينالعان قاۋىم قاراسى ەداۋىر كورىندى. استانا­نىڭ مادەني ءومىرىن ايشىقتاعان فەستيۆال باعدارلاماسى وزگەشە ورنەك­پەن ءورىلدى. فەستيۆالگە جينالعان جۇرت­شى­لىق ۇرمەلى اسپاپتاردىڭ سان الۋان سيقىرلى سازىنا ەلىتۋگە ءمۇم­كىندىك ال­دى. ونىڭ سىرى – مۇندا كەلگەن ءاربىر جان ونەر ۇجىمدارىنىڭ ورىنداۋىن­داعى مۋزىكالىق تۋىندى­لاردىڭ ىشىنەن ءوز جانىنا جاقىن اۋەندەردى كوڭىل ەلەگىنەن وتكىزۋگە تىرىستى. ياعني, شارا – كەز كەلگەن تىڭداۋشىنىڭ جۇرەك قالاۋىن تاپ باسىپ تانۋدى كوزدەپتى. ماسەلەن, ءنوۆوسىبىر قالاسىنان كەلگەن ۇرمەلى اسپاپتار وركەسترى ءوزىنىڭ باعدارلا­ماسىن گۋسارلىق تاقىرىپقا بەيىمدەگەن ەكەن. ولاردىڭ «و بەدنوم گۋسارە زامولۆيتە سلوۆو» كينوفيلمىندەگى اندرەي پەتروۆتىڭ مۋزىكاسىن ورىنداۋلارى, سونداي-اق گۋسارلىق كيىمدەرى – سونىڭ ءبىر دالەلىندەي كورىندى. ءبىر اتاپ وتەرلىگى, بۇل ونەر ۇجىمى قازاقتىڭ «سارجايلاۋ» ءانىن دە ناقىشىنا كەلتىرە ورىنداۋعا تىرىس­تى. الماتى قالاسىنان كەلگەن قۇرلىق اسكەرى اسكەري ينستيتۋتىنىڭ ۇرمەلى اسپاپتار وركەسترى «قۇداشا», «الاتاۋ» سەكىلدى قازاق اۋەندەرىنىڭ جاڭا زامانعا ساي ارلەنگەن ۇلگىسىن جۇرتشىلىق نازارىنا ۇسىندى. تارازدان كەلگەن وركەستر ۇجىمىنىڭ ءبىر ەرەكشەلىگى – ولار ۇرمەلى اسپاپتاردا شەبەر ويناپ قانا قويماي, ءتۇرلى مۋزىكالىق شىعار­مالاردى ءوز دەڭگەيىندە ورىنداپ بەردى. ال ماسكەۋدەن كەلگەن ۇجىم كاسىبي ەمەس, اۋەسقوي ونەر ۇجىمى بولعانى­مەن, ولار ءوز ورىنداۋلارىندا ءداستۇرلى شوتلاندىق اۋەز بەن اۋەن ءيىرىمىنىڭ بۇلكىلىن ءدوپ باسقانداي بولدى. «استانا سامالى» حالىقارالىق فەستيۆالى وسىمەن 3-ءشى مارتە وتكىزىلىپ وتىرعاندىقتان, جىل سايىن وعان ءار ءتۇرلى ەلدەر مەن قالالاردان ونەر ۇجىمدارى قاتىسادى. وزدەرىنىڭ قاي­تالانباس قىزىقتى باعدارلاما­لارىن ۇسىنادى. ياعني, فەستيۆال ماقساتى – حالىقتىڭ مەرەكەلىك كوڭىل-كۇيىن كوتەرۋ», دەيدى قازاقستان رەسپۋب­ليكاسى قارۋلى كۇشتەرىنىڭ باس اسكەري ديريجەرى الەكساندر بەلياكوۆ. بۇگىن «بايتەرەك» مونۋمەنتى ماڭا­يىندا ۇرمەلى اسپاپتار وركەسترلەرىنىڭ قاتىسۋىمەن بەند-مارافون ۇيىمداس­تىرىلماق. ءلايلا ەدىلقىزى.