مەرەكە اياسىندا ەلورداداعى اباي ەسكەرتكىشى الدىندا «استانا – وتانىمىزدىڭ جۇرەگى, تاۋەلسىزدىگىمىزدىڭ تىرەگى» اتتى كىتاپ جانە پوەزيا مەرەكەسى بولىپ ءوتتى.
كۇمبىرلەگەن «سارىارقا» كۇيىنىڭ اۋەنىمەن ىلەسە:
«ارمىسىزدار, استانانىڭ ساڭلاقتارى!
تولىسقانداي ەلىمنىڭ جان-جاقتارى,
توعىسقانداي وسىندا الاشىمنىڭ,
حاس جۇيرىك باعىلانى, ارداقتارى» – دەپ باستالعان جىر جولدارى وقىلىپ, ءسوز الۋشىلار تاراپىنان: «بيىل ەلىمىز ءۇشىن ايتۋلى جىل. تاۋەلسىزدىكتىڭ مەرەيلى 20 جىلدىعى, استانامىزعا 13 جىل. ەڭسەلى ەلوردا الاشتىڭ ايبىنىن اسىردى. ادامزاتقا قازاقتىڭ اقپەيىل, اق جۇرەگىندەي ايقارا قۇشاعىن اشتى. اقمولانىڭ قۇدىرەتتى رۋحى ۇلى دالا مۇراگەرلەرىنىڭ جۇرەگى مەن وي-قيالىن تەربەپ, اسقاقتاتا بەرمەك. حاكىم اباي تۋرالى مۇحتار اۋەزوۆ: «اباي – مۇحيت, مۇحيتتى تاۋىسۋعا بولا ما؟» دەگەن ەكەن. سول مۇحيتتاي ابايدىڭ سوڭىندا قالعان مۇراسىنان حالقىمىز رۋحاني بايلىق الىپ, اسىلعا بەرگىسىز ءاربىر ءسوزىن جادىندا ۇستاعان. حالقىنا وشپەس مۇرا قالدىرىپ, قازاق ادەبيەتىن الەمدىك دەڭگەيدە مويىنداتقان مايتالمان كلاسسيگىمىز ابايعا تاعزىم ەتۋ – ءبىز ءۇشىن زور مارتەبە» دەلىنىپ, ارنايى كىتاپ جارمەڭكەسىمەن كومكەرىلگەن ساحنانىڭ ەكى شەتىنەن ۇلتتىق كيىمدە اجەلەر كورەرمەندەرگە شاشۋ شاشتى.
مەملەكەتتىك سىيلىقتىڭ لاۋرەاتى, اقىن مارفۋعا ايتقوجينا مەن قالالىق تىلدەردى دامىتۋ باسقارماسىنىڭ باستىعى ورازگۇل اسانعازى بۇگىنگى مەرەكەنىڭ ءمان-ماڭىزىن ايتا كەلىپ, بۇگىنگى باس قوسۋدىڭ باسالقاسى – «تاۋەلسىزدىك تاڭىم اتتى ارايلى!» جىر ءمۇشايراسى مەن «مۇقاعالي وقۋلارى» كوركەمسوز وقۋ شەبەرلەرىنىڭ بايقاۋى ەكەنىن اتاپ ءوتتى.
ءسويتىپ, مەرەكە بارىسىندا الدىن الا ىرىكتەۋدەن وتكەن 17 جاس اقىن «تاۋەلسىزدىك تاڭىم اتتى ارايلى!» جىر دوداسىندا باقتارىن سىنادى. باس جۇلدەنى – قاراعاندىدان كەلگەن اقەركە اسان جەڭىپ السا, «اتاۋلى ديپلوم» قاجىبەك باتىلعا بۇيىردى. ال ءى-ءشى بايگەنى – سالتانات سماعۇلوۆا يەلەنسە, ءىى-ءشى جانە ءىىى-ءشى جۇلدەلەردى – گۇلسارا شالقار, نازگۇل بەردىقوجا, نۇرگۇل وقاشەۆا, سالتانات ءجۇسىپوۆا, دينارا مالىك پەن ءمولدىر ايتباي قانجىعالارىنا بايلادى.
ال «مۇقاعالي وقۋلارى» كوركەمسوز وقۋ شەبەرلەرىنىڭ بايقاۋ جەڭىمپازدارىن – الماتىدان ارنايى كەلگەن جۇلدىز ماقاتاەۆ پەن «مۇقاعالي ماقاتاەۆ» اتىنداعى قوردىڭ ءتورايىمى باقىتكۇل ايداروۆا ماراپاتتاپ, ارنايى سىيلىقتارىن تابىس ەتتى.
بەرىك سادىر.
