• 05 شىلدە، 2011

قولونەرشىلەر كورمەسى

ۇلتتىق ونەرىمىزدىڭ التىن ارقاۋىنىڭ ءبىرى سانالاتىن قولونەرشىلەر كورمەسى وتكەن اپتادا ەلوردا كۇنىنە وراي، پرەزيدەنتتىك مادەنيەت ورتالىعىندا «شەبەرلەر-2011» دەگەن اتپەن ءوتتى. بۇعان «قازاقستانداعى قولونەر مەن ءداستۇرلى كاسىپشىلىكتى قايتا جاڭعىرتۋ» باعدارلاماسىنىڭ اياسىندا، «شەۆرون» كومپانياسى جانە ورتا ازيانىڭ ەۋرازيا قورىنىڭ باستاماسىمەن «Our Heritage» قوعامدىق قورى ۇيىتقى بولدى. سونىمەن قاتار، بۇل يگى شاراعا وتانىمىزدىڭ مادەنيەت مينيسترلىگى مەن يۋنەسكو دا قولداۋ كورسەتكەنىن ايتا كەتسەك دەيمىز. كورمەگە ەلىمىزدىڭ ايماقتارىندا تۇراتىن شەبەرلەردىڭ 92 تۋىندىسى ءتۇسىپ، ىرىكتەۋ بارىسىندا استاناداعى سايىسقا 20 قاتىسۋشىنىڭ شىعارمالارى «اسىل ۇستاز»، «دارىندى باستاۋ»، «وزات ىسكەر»، «جوعارى ساپا»، «جاڭاشىلدىق»، «ءتولتۋما»، «جوعارى شەبەرلىك» دەپ اتالاتىن جەتى نوميناتسيا بويىنشا جىبەرىلگەن ەكەن. قولونەر كاسىبىن دامىتۋدى ماقسات ەتكەن ونەر سايىسى ەڭ الدىمەن ەل ىشىندەگى دارىندىلاردى تاۋىپ، ولاردىڭ شەبەر قولىنان شىققان دۇنيەلەردى كورمەدە كورسەتىپ، ودان كەيىن يگىلىككە جاراتۋدى نيەت ەتكەن ەكەن. بۇل ءىس وسىدان ەكى جىل بۇرىن باستالعانىن نازارعا سالا كەتسەك دەيمىز. «ءبىزدىڭ كومپانيا 18 جىل بويى مۇناي مەن گازدى ءوندىرىپ قانا قويماي، ادامي جانە ينستيتۋتسيونالدى الەۋەتتى دامىتۋعا باعىتتالعان كوپتەگەن الەۋمەتتىك جوبالاردى جۇزەگە اسىرۋ ارقىلى ەل ەكونوميكاسىنا، رۋحاني ومىرگە ءوز ۇلەسىن قوسىپ كەلەدى»، – دەيدى قازاقستانداعى «شەۆرون» كومپانياسىنىڭ ۇكىمەتپەن جانە جۇرتشىلىقپەن بايلانىس ءجونىندەگى ديرەكتورى ەركىن زىكىباەۆ. كورمەگە قويىلعان كونكۋرستىق جۇمىستارعا ونەرتانۋشىلار، سۋرەتشىلەر، مادەنيەت مينيسترلىگىنىڭ، يۋنەسكو جانە «شەۆرون» كومپانياسىنىڭ وكىلدەرىنەن، سول سەكىلدى مالايزيادان قولونەر بۇيىمدارىنىڭ ساپاسى بويىنشا حالىقارالىق ساراپشى ەدريك ونگ باستاعان بەدەلدى ساراپتاۋ كوميسسياسى قازىلىق جاسادى. ولاردىڭ شەشىمى بويىنشا جوعارى باعالانعان رۋحاني قۇندىلىقتار جەڭىمپاز دەپ تانىلىپ، اۆتورلارىنا باعالى سىيلىقتار تاپسىرىلدى. سۇلەيمەن مامەت. سۋرەتتەردى تۇسىرگەن ورىنباي بالمۇرات.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز