بالالارعا بازارلىق

جىلداعى ءداستۇر بويىنشا  استانا­نىڭ تۋعان كۇنى ءتۇرلى مادەني شارالارمەن جالعاسىپ جاتاتىنى بەلگىلى. «توي­دىڭ بولعانىنان بولادىسى قىزىق» دەگەن حالىق ناقىلىنىڭ  اينا-قاتەسىز كەلەتىنىن وسى ءبىر شاتتىققا تولى مەرەكە كۇنىنە دەيىنگى وتەتىن ءىس-شارالار لەگى تاعى ءبىر ەسكە تۇسىرەدى. سونىڭ ءبىرى كەشە  «كەرۋەن» ويىن-ساۋىق ورتالىعىنىڭ  «Kinopark 7» كينوتەاترىندا  بالعىن­دار­عا ار­نالعان  «بايتەرەك» اتتى مۋل­تي­پ­ليكاتسيالىق ءفيلمنىڭ تۇساۋكە­سەرى­نىڭ ءوتۋى دەر ەدىك. اتالمىش انيماتسيالىق فيلم –  جوبا اۆتورلارىنىڭ ەل تاۋەلسىزدىگىنىڭ  20 جىلدىعى مەن  استانا كۇنىنە جاسا­عان تارتۋى. مۋلتفيلم ەكرانعا قازاق تىلىندە جارىققا شىقسا, ورىس تىلىندە سۋبتيترمەن بەرىلگەن. جوبانىڭ جارىق­قا شىعۋىنا  استانا قالاسى اكىمدىگى مەن مادەنيەت باسقارماسى مۇرىندىق بولىپتى. «بايتەرەك» – بۇل جاس كورەرمەن­دەر­گە باعىتتالعان شىتىرمان وقيعاعا تولى انيماتسيالىق فيلم. سيۋجەت جەلىسى بويىنشا فانتاستيكالىق تەرىس كۇشتەر  تاۋەلسىزدىك كۇنى مەرەكەسىنە بالتا شاپ­پاق بولادى. دۇشپاندار بەيبىتشىلىك پەن مولشىلىقتىڭ بەلگىسى بولعان  «ءباي­تەرەك» ءومىر اعاشىنىڭ ۇشار بيىگىندەگى الىپ  سامۇرىق قۇستىڭ  كۇن ءتا­رىزدى  التىن تۇستەس جۇمىرتقاسىن ۇر­لاپ, سول ارقىلى الەمگە  الاساپىران مەن  استان-كەستەن ورناتپاق بولادى. سونداي-اق فيلمدە قازاق ەرتەگىلەرىندەگى كەيىپكەرلەر دە جاڭا قىرىنان كورىنەدى. ال قالاداعى  بەيبىتشىلىك جانە كەلىسىم سارايى, تسيرك عيماراتى,  حان  شاتىر سىندى عاجايىپ قۇرىلىس نىساندارى فيلمدەگى  استانا كەلبەتىن اشا تۇسەدى. انيماتسيالىق ءفيلمدى تۇسىرگەن ستسەناري اۆتورى ءارى باس پروديۋسەرى  ابدىقادىر  سابىر: «بۇل   ون ەكى جاسقا دەيىنگى  وسكەلەڭ ۇرپاققا ارنالعان تۋ­ىن­دى بولعاندىقتان, بۇلارعا العاشقى كەزەكتە پاتريوتتىق تاربيە بەرۋ مەن  بايتەرەكتىڭ قاسيەتىن ءتۇسىندىرۋدى باستى ماقسات ەتىپ الدىق. كوپ جەتكىنشەكتەرىمىز ونى  سۋرەتتەردەن تاماشالاپ,   استانا دەپ قانا ءتۇسىنىپ ءجۇر. ال مۋلت­فيلمدى كورگەننەن كەيىن ونىڭ قانداي قاسيەتى بولعانىن, ونى نە ءۇشىن ساقتاۋ, قورعاۋ كەرەك ەكەنىن ءجىتى تۇسىنەر دەگەن نيەتتەمىز. ءبىز وسىنى تۇسىندىرۋگە تى­رىس­تىق. شىعارماداعى وقيعا  تاۋەل­سىز­دىك­تىڭ  20 جىلدىعى ەمەس, 200 جىلدىعى كەزەڭىندە بولىپ جاتقان وقيعا بولىپ تا­بىلادى. ياعني, بۇل الداعى بولاشاق ءتو­ڭىرەگىندەگى وقيعا بولىپ ءوربيدى», –  دەيدى. مۋلتفيلم  «استانا-كومپلەكس»  كور­پوراتسياسى»  جشس جانىنداعى  «ءباي­تەرەك» كينوستۋدياسىندا جاسالعان. ونىڭ ۇزاقتىعى ون ءمينوتتى قامتيدى. كەيىپكەرلەردى دىبىستاۋ كەزىندە ەكى داۋىس پاي­دالانىلىپتى. قازاق تىلىندەگى دۋبلياجدى  ەرجان  ەمەلحان مەن  جان­قال­دىبەك  ءتو­لەن­باەۆ جاساپتى. وتان­دىق انيماتور­لاردىڭ  جاڭا بۇل ءمۋلتفيلمىن  1-6 شىلدە ارالىعىندا  «كينوپارك» كينوتەاتر­لار جەلىسىنەن تاما­شالاۋعا بولادى. «بايتەرەك» تۋىندىسىنىڭ اۆتور­لارى الداعى ۋاقىتتا ءفيلمنىڭ كەلەسى سەرياسىن ءتۇسىرۋدى جوسپارلاۋدا. ءابدىراحمان  قىدىربەك.