مۇستافا شوقاي تۋرالى جاڭا تۋىندى كورەرمەنگە جول تارتتى

الماتى قالاسى اكىمدىگىنىڭ ۇيىمداستىرۋىمەن تاۋەلسىزدىكتىڭ 20 جىلدىعىنا وراي بەلگىلى اقىن قاسىمحان بەگمانوۆتىڭ كورنەكتى قايراتكەر, قازاقتان شىققان تۇڭعىش ەميگرانت مۇستافا شوقاي تۋرالى تۇسىرىلگەن «مۇستافا شوقاي جولىمەن» دەرەكتى ءفيلمى كوپشىلىك نازارىنا ۇسىنىلدى. ق.بەگمانوۆ ۇيىمداستىرعان «مۇستافا شوقاي جولىمەن» ەكس­پە­­ديتسياسى ۇلتشىل ازاماتتىڭ تۋىپ-وسكەن جەرى – قىزىلوردا وبلىسى­نىڭ شيەلى اۋدانىنداعى نارشوقى قىستاۋىن, ءبىلىم العان, سان ءتۇرلى ساياسي وقيعالارعا قا­تىس­قان تاشكەنت, فەرعانا, قوقان, سامارقان قا­لالا­رىن, جوعارى ءبىلىم العان, ساياسي قوز­عا­­لىستارعا ارا­لاسقان سانكت-پەتەر­بۋرگ, ەجەل­گى كاۆكاز بويىن­داعى باكۋ, تبيليسي, كۋتايسي, باتۋمي قالا­لارىن, العاشقى ەميگرا­تسيالىق ءومى­رى باس­تالعان ىستامبۇل, جيىرما جىل­دان اسا عۇمىر كەشكەن فران­تسيانىڭ پاريج, نوجان-سيۋر-مارن, فونتەنبلو, سونداي-اق مۇس­تافا­نىڭ جارى ءماريام شوقاي جەرلەنگەن شەل جانە مۇستا­فانىڭ باقيلىق ساپارعا اتتانعان جەرى گەرمانيانىڭ بەرلين قالا­لارىن ءجۇرىپ ءوتتى. رەسپۋبليكالىق باق وكىل­دەرى­مەن بىرگە مۇستافا شوقاي­دىڭ ءومىرىن زەرتتەپ جۇرگەن بەلگىلى عالىمداردان جاساقتالعان ەكسپە­دي­تسيا مۇشەلەرىنىڭ ءاربىر تاريحي ورىنداردا وتكىزگەن سان الۋان كەزدەسۋلەرى, دوڭگەلەك ۇستەل با­سىن­داعى اڭگىمەلەرى مەن ساپار بارىسىندا بارعان مەملەكەتتەردەگى قازاقستاننىڭ توتەنشە جانە وكىلەتتى ەلشىلەرىمەن وتكەن رەسمي جۇزدەسۋلەر, مۇستافانىڭ ءومىر سۇرگەن, ەڭبەك ەتكەن مەملەكەتتەرىندە تۇراتىن شەتەل عالىم­دارىمەن جۇرگىزىلگەن سۇحباتتار وسى دەرەكتى ءفيلمنىڭ باستى ار­قاۋىنا اينالعان. دەرەكتى فيلمدە ناقتى ءمالى­مەتتەر, ساتىمەن تۇسىرىلگەن بەينە­كو­رىنىستەر, جاسالعان عىلىمي تۇجىرىمدار شىنايى جەتكىزىلگەن. ەكسپەديتسيا قۇرامىندا بول­عان ءاربىر جۋرناليست پەن تاريح­شى عالىمنىڭ ساپار ماقساتىنا ءوز ۇلەستەرىن قوسا بىلگەندىگى بايقالادى. سونىمەن قاتار, وسى فيلم ءۇشىن ارنايى جازىلعان سىرلى اۋەن دە جۇرەكتى قوزعاپ, ۇلكەن اسەرگە بولەيدى. سەگىز مەملەكەتتى ءسۇزىپ ءوتىپ, مۇستافا شوقايعا قاتىستى جيناقتالعان مول مالىمەت وتە ءتيىمدى قامتىل­عاندىقتان, بۇل ەڭبەك حالىقارا­لىق دارەجەدە تۇسىرىلگەن دەرەكتى فيلم دەپ اتاۋعا تۇرارلىق. ستسەناريى مەن رەجيسسۋراسىن قاسىمحان بەگمانوۆ, ال مۋزى­كاسىن جاس كومپوزيتور ارمان بەكسۇلتان جازعان, تاريح عىلىم­دارىنىڭ دوكتورى, پروفەسسور ءمام­بەت قويگەلدى باس كەڭەسشى بولعان بۇل تۋىندى جاس ۇرپاقتى وتانسۇيگىشتىككە باۋلىپ, تاۋەل­سىزدىكتىڭ ءمانىن تەرەڭ تۇسىنۋگە جەتەلەيتىن تاپتىرماس قۇرال رەتىندە ەلىمىزدەگى ورتا جانە جوعارى وقۋ ورىندارىنىڭ تۇلەكتەرىنە, جال­پى, جاستارى­مىزعا كورسەتۋگە ابدەن لايىق. قانات ەسكەندىر, الماتى.