كەشە «ەگەمەن قازاقستاننىڭ» قاراشاڭىراعىندا ءبىر ايتۋلى وقيعا بولدى. ول جۋىردا ومىرگە كەلگەن «سالتانات» اتتى كىتاپتىڭ تۇساۋكەسەر ءراسىمى ەدى.
ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعا بولۋى جانە ونى جوعارى دەڭگەيدەگى ساتتىلىكپەن اتقارىپ, ۇيىمنىڭ 11 جىل بويى ءوتپەگەن ءسامميتىن ۇيىمداستىرۋى – ەلباسىمىز نۇرسۇلتان نازارباەۆتىڭ سارابدال ساياساتىنىڭ جەڭىستى سالتاناتى (تريۋمف) ەكەنى داۋسىز. الەمنىڭ بارلىق ىزگى نيەتتى جاندارى جاس قازاقستاننىڭ وسىنداي تابىسىنا تاڭىرقاي قاراپ, تامسانا ءسۇيسىندى.
«ەگەمەن قازاقستان» ەلىمىزدىڭ توراعالىققا وتكەن ساتىنەن باستاپ, ءوزىنىڭ بەتىندە ونىڭ بارلىق قادامدارىن
ايشىقتى جولدارمەن, اقجولتاي تىلەكتەرمەن, جىلى نيەتپەن حالىققا جەتكىزىپ وتىردى. گازەت بەتىنە تۇسكەن سول جولدار ارحيۆتەردە سارعايعان قاعاز كۇيىندە قالىپ قويماس ءۇشىن جيناقتالىپ, «سالتانات» اتتى ۇلكەن كىتاپقا اينالدىرىلدى. ءسويتىپ, قازاقستاننىڭ ەقىۇ-عا توراعالىعىنىڭ قالاي بولعاندىعىن, قالاي وتكەندىگىن, وعان وتاندىق, شەتەلدىك ساياسي قايراتكەرلەر مەن ساراپشىلاردىڭ قانداي باعا بەرگەندىگىن ىزدەگەن جان – جاس زەرتتەۋشى, ساياساتتانۋشى, تاريحشى, ديپلومات, جۋرناليست, ستۋدەنت ءبىر جەردەن تاباتىن بولادى.
بىلتىر پرەزيدەنت نۇرسۇلتان نازارباەۆ تۋرالى جازىلعان ماقالا, سۇحبات, پىكىرلەردىڭ ءبارىن جيناقتاپ, «ەلباسى» اتتى جيناق شىعارىلسا, بيىل ءدال سونداي ءۇلگىمەن «سالتانات» ومىرگە كەلدى. «بۇگىن سونىڭ قۋانىشىنا جينالىپ وتىرسىزدار, قوش كەلدىڭىزدەر, قۇرمەتتى قاۋىم, – دەدى ءوزىنىڭ سوزىندە باسىلىم باسشىسى ساۋىتبەك ابدراحمانوۆ». ودان ءارى ساۋىتبەك ابدراحمان ۇلى ەگەمەنقازاقستاندىقتاردىڭ قازاقستاندىق توراعالىقتىڭ قادامدارىن حالىققا ساپالى, بىلىكتى ءارى سىندارلى ەتىپ جەتكىزۋگە كومەك بەرگەن, سۇحباتتاردى ۇيىمداستىرۋعا جاردەمشى بولعان ازاماتتارعا ريزاشىلىعىن ءبىلدىردى. «مىسالى, مەن ءوزىم ەقىۇ باس حاتشىسى مارك پەررەن دە بريشامبومەن, ۇلتتىق ازشىلىق ىستەرى ءجونىندەگى جوعارعى كوميسسار كنۋت ۆوللەبەكپەن, ەقىۇ پارلامەنتتىك اسسامبلەياسىنىڭ پرەزيدەنتى پەتروس ەفتيميۋمەن, ەقىۇ/دياقب باسشىسى يانەز لەنارچيچپەن سىرتقى ىستەر مينيسترلىگى قىزمەتكەرلەرىنىڭ كومەگىنسىز سۇحبات الا الماس ەدىم», – دەدى گازەت باسشىسى.
تۇساۋكەسەر راسىمىنە سەنات توراعاسىنىڭ ورىنباسارى مۇحامبەت كوپەەۆ, ءماجىلىس ءتوراعاسىنىڭ ورىنباسارى جانىبەك كارىبجانوۆ, سىرتقى ىستەر مينيسترىنىڭ ورىنباسارى قايرات سارىباي, پرەزيدەنت اكىمشىلىگىنىڭ جاۋاپتى قىزمەتكەرلەرى الىبەك اسقاروۆ پەن قۋات بوراش, ءماجىلىس دەپۋتاتتارى زەينوللا الشىمباەۆ, توقتارباي قادامباەۆ, بەرىك بەكجانوۆ, جازۋشى اكىم تارازي, «كازاحستانسكايا پراۆدا» گازەتىنىڭ باسشىسى الەكساندر تاراكوۆ, باق وكىلدەرى جانە باسقالار قاتىستى.
قوناقتار اراسىنداعى ەرەكشە اتاپ ءوتۋدى قاجەت ەتەتىن ازامات – كىتاپتىڭ جارىققا شىعۋىنا دەمەۋشىلىك كورسەتكەن «جەتى جارعى جانە قوجابەرگەن جىراۋ» قورىنىڭ توراعاسى, سولتۇستىكقازاقستاندىق بەكەت تۇرعاراەۆ. ول وبلىس اكىمى سەرىك ءبىلالوۆ ەكەۋى «سالتاناتتىڭ» ومىرگە كەلۋىن قارجىلىق تۇرعىدان قامتاماسىز ەتتى.
تۇساۋكەسەردە ءورىستى ويلار, ايشىقتى پىكىرلەر, جاراستى تىلەكتەر ايتىلدى. سونىڭ ىشىندە ءجانىبەك كارىبجانوۆ كىتاپ توراعالىققا وتەر الدىنداعى «جۇرەك كۇپتى, ءۇمىت العا تارتادى» دەگەن بارلىعىمىزدىڭ تولقۋىمىزدى بىلدىرگەن ماقالادان باستالىپ, ەڭ سوڭعىسى «جاۋاپتى ميسسيانىڭ ابىرويلى مارەسى» دەگەن كوڭىلدى ماقالامەن اياقتالعانى جۇيەلى جاراسىم تاپقان ەكەن, دەدى. سونىمەن بىرگە, ول ەلباسى ن.نازارباەۆتىڭ سىرتقى ساياساتتاعى كورەگەندىگى تۋرالى بىرقاتار فاكتىلەردى اۋىزعا الدى. سونىڭ ىشىندە قىرعىزستاننىڭ بيلىكتەن تايدىرىلعان پرەزيدەنتى ق.باكيەۆتى نۇرسۇلتان ءابىش ۇلىنىڭ باستاماسىمەن ەل اۋماعىنان الىپ شىعۋدىڭ قانشالىقتى ماڭىزدى بولعانىن سولتۇستىك افريكاداعى ەلدەردە تولاسسىز بولىپ جاتقان قانتوگىستەرگە قاراپ, ەندى ءبىلىپ جاتىرمىز, دەدى ول. ەگەر باكيەۆ ءالى كۇنگە ەلدە وتىراتىن بولسا, باۋىرلاس قىرعىز ەلى ءالى كۇنگە ءوزارا قانتوگىستە بولۋى مۇمكىن ەدى.
مۇحامبەت كوپەەۆ استانا سامميتىنىڭ ەشقاشان اتى وشپەيتىنىن, ونى تالاي عاسىرلار بويى ۇرپاقتار اۋىزدان تاستاماسىن ايتتى. سوندا بۇل كىتاپ باعا جەتپەس قۇندى دۇنيەگە اينالىپ, قولدان قولعا وتەتىن بولادى, دەدى ول.
قايرات سارىباي 2007 جىلدىڭ 30 قاراشاسىندا مادريدتە بولعان قازاقستاننىڭ توراعالىققا ءوتۋ ءساتىن ەسكە الدى. سول ساتتە بىزبەن – قازاقستاندىق ديپلوماتتارمەن بىرگە تولقىپ, بىرگە قوبالجىپ «ەگەمەن قازاقستاننىڭ» ءجۋرناليسى دە جۇرگەن ەدى. ول ءوز ماقالاسىندا سول ءساتتىڭ سۋرەتىن بەرە الدى. ماقالالار سونداي جاندىلىعىمەن قۇندى, ال وندايلار كىتاپتا كوپ ەكەنى كورىنىپ تۇر, دەدى ول. ءسوزىنىڭ سوڭىندا «ەگەمەننىڭ» مۋزەيىنە ءسىم تاپسىرىسىمەن قازاقستاننىڭ يسلام كونفەرەنتسياسى ۇيىمىنا ارنالىپ ۇلتتىق بانك شىعارعان ساناۋلى بانكنوتتاردىڭ ءبىرىن سىيعا تارتتى.
جازۋشى ءا.تارازي, ب.تۇرعاراەۆ, ا.تاراكوۆ, ءا.اسقاروۆ, ز.الشىمباەۆ جانە ت.ب. سوزدەرىندە پرەزيدەنت ن.نازارباەۆتىڭ سارابدال ساياساتىنىڭ ارقاسىندا قول جەتكىزىلگەن ەقىۇ توراعالىعى جانە ونىڭ ءسامميتىن وتكىزۋ سياقتى ۇلى جەڭىستىڭ ەشقاشان دا ءمانى ورتايمايتىندىعىن جانە جىلدار وتكەن سايىن ونىڭ ماڭىزى ارتا بەرەتىندىگىن اتاپ كورسەتتى. ءبارىنىڭ دە ويى: سول كەزدەردە بۇل كىتاپ ىزدەسەڭ تاپتىرمايتىن اسىل قازىنا بولارى داۋسىز دەگەنگە سايدى.
«سالتاناتتىڭ» كولەمى 786 بەت, تارالىمى 1 مىڭ دانا.
جاقسىباي سامرات.
