جىلى شىرايلى جۇزدەسۋلەر

كەشە مەملەكەت باسشىسى نۇرسۇلتان نازارباەۆ يسلام ىنتىماقتاستىعى ۇيىمى سىرتقى ىستەر مينيسترلەرى كەڭەسى­نىڭ 38-ءشى سەسسياسى اياسىندا بىرقاتار ەكىجاقتى كەزدەسۋلەر وتكىزدى. پرەزيدەنت يكۇ باس حا­ت­شى­سى ەكمەلەددين يحسانوعلىمەن كەزدەستى. تاراپتار ەكىجاقتى ىنتى­ماق­تاستىقتى ودان ءارى دامىتۋ جانە نىعايتۋ ماسەلەلەرىن, سونداي-اق يكۇ سىمك 38-ءشى سەسسياسىنىڭ كۇن ءتارتىبىن تالقىلادى. – ءبىز پرەزيدەنت مىرزامەن يس­لام كونفەرەنتسياسى ۇيىمى­نىڭ بولاشاق قىزمەتىن تالقى­لا­دىق. بيىلعى جىلى قازاقستان ۇيىمنىڭ توراعاسى بولدى. ءبىز جەمىستى ءوزارا ءىس-قيمىلعا سەنىم ارتامىز. وسى تاريحي كەزدەسۋگە دايىندىقتىڭ جوعارى دەڭگەيى ءبىز­دىڭ قانشالىقتى تابىستى ىن­تى­ماقتاستىقتا ەكەنىمىزدى كور­سەتتى. ەندى بىزدە جاڭا يدەيالار, جاڭا جوبالار, ءتىپتى جاڭا ەم­بلە­ما پايدا بولدى. ءبىز قازىر يكۇ جانىنان ادام قۇقىقتارى ءجو­نىن­دەگى كوميسسيانىڭ قۇرىلۋى ءۇشىن جۇمىس ىستەۋدەمىز جانە بۇل اس­تا­نا­داعى كەزدەسۋدىڭ تاعى ءبىر نەگىزگى جەتىستىگىنىڭ ءبىرى بولماق, – دەدى ە.يحسانوعلى. *  *  * مەملەكەت باسشىسى حالىق­ارالىق الەم ينستيتۋتىنىڭ پرە­زيدەنتى تەرە رەد-لار­سەن­مەن كەزدەستى. كەزدەسۋ بارىسىندا ەكىجاقتى ىنتىماقتاستىق ماسەلەلەرى, سون­داي-اق يكۇ سىمك 38-ءشى سەس­سيا­سىنىڭ كۇن ءتارتىبى تالقىلاندى. – جوعارى مارتەبەلىمەن كەزدەسۋىمىز كەزىندە مەن پرەزيدەنتكە جاقىندا عانا ءوزىمنىڭ سينگا­پۋر­دىڭ نەگىزىن قالاۋشى لي كۋان يۋ-مەن كەزدەسكەنىمدى ايتتىم. سينگاپۋر – بۇل ناعىز عالامات ەل. جانە لي كۋان يۋ, وسى ەلدىڭ ليدەرى – سينگاپۋرلىق كەرەمەتتىڭ نەگىزىن قالاۋشى. مەن مەملەكەت باسشىسىنا, قازاقستان سوڭعى 20 جىل ىشىندە دامۋدىڭ تاڭ­عا­لار­لىق قارقىنىن كورسەتكەن عاجاپ ەل بولىپ تابىلاتىنىن ايتتىم. قازاقستان ليدەرى – قازاقستاندىق كەرەمەتتىڭ قۇرۋشىسى. استانا­نىڭ كوشەلەرىمەن ءجۇرىپ ءوتىپ, سوڭعى 20 جىل ىشىندە پايدا بول­عان تاڭدانارلىقتاي ءارى ادام نان­عىسىز وزگەرىستەردى ءوز كوزىڭمەن كورۋگە بولادى, – دەپ اتاپ ءوتتى ت.رەد-لارسەن. *  *  * مەملەكەت باسشىسى ءبىلىم,   عىلىم جانە  مادەنيەت ماسە­لە­لەرى  جونىندەگى  يسلام  ۇيى­مى­نىڭ (يسەسكو) باس ديرەكتورى  ابدەل-ءازيز  بەن وسمان  ءال-تۋەيدجريدى قابىلدادى. ءا.ءال-تۋەيدجري مەملەكەت باس­شىسىنا وسى ۇيىمنىڭ جوعا­رى ناگراداسى – «LSESCO Shield» التىن بەلگىسىن يسلام ىنتى­ماق­تاستىعىن نىعايتۋعا, يسلام الە­مىن دامىتۋعا جانە جاھاندىق دەڭ­گەيدە گۋمانيتارلىق قۇندى­لىق­تاردى العا جىلجىتۋعا قوس­قان اسا ۇزدىك ۇلەسى ءۇشىن تاپسىردى.