انالاردى ارداقتايىق

مەنىڭ قولىما قالام الۋىما وڭتۇستىك قازاقستان وبلىستىق ءماسليحاتىنىڭ دەپۋتاتى قۇدايبەرگەن ەرجاننىڭ ءوتىنىش-حاتى سەبەپ بولىپ وتىر. حاتتا ءوتىنىش يەسى ەلباسىمىز ن.ءا.نازارباەۆتىڭ اسا زور ماق­سات­كەرلىكپەن جۇرگىزىپ كەلە جات­قان بەلسەندى الەۋمەتتىك ساياسا­تى­نىڭ ارقاسىندا انالاردىڭ قوعام­داعى احۋالىنىڭ جاقسارا تۇسكە­نىن, سونىڭ ايعاعى رەتىندە «قا­زاقستان رەسپۋبليكاسىنىڭ مەملەكەتتىك ناگرادالارى تۋرالى» زا­ڭىنا وزگەرىستەر ەنگىزىلىپ, التى جانە جەتى بالا تۋىپ, وسىرگەن انا­لارعا 2010 جىلدىڭ 1 قاڭتارىنان باستاپ تيىسىنشە «كۇمىس القا» جانە «التىن القا» القالارى بەرىلىپ جاتقانىن, بۇل شارانىڭ ەلىمىزدەگى دەموگرافيالىق احۋال­دى جاقسارتا تۇسەتىنىن ايتا كەلە, كوپ بالالى انالارىمىزدى وسى ناگرادالارعا ۇسىنۋ بارىسىندا تۋىنداپ وتىرعان كەيبىر كەمشى­لىك­تەردىڭ بار ەكەندىگىنە دە نازار اۋدارادى. اتاپ ايتقاندا, «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭىنا سايكەس, «التىن القا» القاسى­مەن ناگرادتاۋ وسى انانىڭ جەتىنشى بالاسى بiر جاسقا جەتكەن جانە باسقا بالالارى تiرi بولعان رەتتە, «كۇمiس القا» القاسىمەن التى بالا تۋعان جانە تاربيەلەپ وسiرگەن انالار التىنشى بالاسى بiر جاس­قا جەتكەن جانە باسقا بالالارى تiرi بولعان رەتتە ناگرادتالادى دەپ كورسەتىلگەن. ال, وسى ۋاقىتقا دەيىن التى نە­مەسە جەتى بالا تۋىپ, وسىرگەن­مەن, سول بالالاردىڭ بىرەۋى نەمەسە ەكەۋى ءبىر جاسقا جانە ودان ءۇل­كەن جاسقا تولعاننان كەيىن, ءتىپتى وزدەرى وتاۋ قۇرىپ, بالا-شاعا­لا­لى بولعاننان كەيىن قايتىس بول­عان وتباسىنداعى انالار اتالعان ناگرادالارمەن ماراپاتتالۋ قۇ­قى­عىنان ايىرىلىپ وتىر. وسىن­داي انالاردىڭ سانى وڭتۇستىك قازاقستان وبلىسى, شاردارا اۋدا­نىنىڭ وزىندە 200-دەن استام ەكەنىن ەسكەرسەك, اتالعان جاعداي ەلى­مىزدىڭ كەز كەلگەن وڭىرلەرىندە قا­لىپتاسىپ وتىر دەۋگە بولادى. انا ءۇشىن بالا تۋىپ, تاربيە­لەۋ قانشالىقتى قيىن ءارى جاۋاپ­تى ءىس بولسا, كوپ بالالى انا اتانۋ ۇلكەن باقىت, ال تاعدىر تاۋقىمەتى سول بالالارىنىڭ بىرەۋىنەن نەمەسە ەكەۋىنەن ايىرسا, بۇل انا ءۇشىن ورىن تولماس اۋىرتپاشىلىق اكە­لە­تىنى انىق. ال, التى نەمەسە جەتى بالا تۋعان انا سول بالالارىنىڭ بىرەۋىنەن نەمەسە ەكەۋىنەن ايى­رىلىپ قالسا دا, انالىق بورى­شىن بارىنشا اتقارعانىن ەسكەرسەك, ول انانىڭ جۇرەك جاراسىن ءسال دە بولسا جەڭىلدەتەر ەدى. جوعارىدا ايتىلعانداردىڭ نە­گىزىندە ەل ۇكىمەتى وتانى­مىز­داعى دەموگرافيالىق جاعدايدى جاقسارتۋ جانە كوپ بالالى انا­لاردى الەۋمەتتىك قولداۋ ماقسا­تىن­دا اتالعان ساناتتاعى انالار­دىڭ قايتىس بولعان بالالارىن قوسقاندا التى نەمەسە جەتى بالا تۋىپ, وسىرگەنىن راستايتىن قۇجات­تارى بولسا, ولارعا دا باسقا انالارمەن قاتار كوپ بالالى انا مارتەبەسىن بەرىپ, «كۇمىس القا» جانە «التىن القا» القالارىمەن ماراپاتتاۋدى كوزدەيتىن ءتيىستى وزگەرىستەردى «قازاقستان رەس­پۋب­ليكاسىنىڭ مەملەكەتتىك ناگرا­دا­لارى تۋرالى» زاڭىنا ەنگىزۋگە ىقپال ەتسە, ساۋاپتى ءىس اتقارعانى بولار ەدى. قۋانىش ايتاحانوۆ, سەنات دەپۋتاتى.