باسقارۋشىلار رەزەرۆى تولىعا ءتۇستى

كەشە پرەزيدەنت جانىنداعى مەملەكەتتىك باسقارۋ اكادە­ميا­­سىن­دا مەملەكەتتىك ساياسات­تىڭ ۇلت­تىق مەكتەبىن (مسۇم) بىتىرۋشىلەرگە ديپلوم تاپسىرۋ سالتاناتى بولدى. اكادەميانىڭ قۇرامىنداعى مسۇم پرەزيدەنت ن.نازار­باەۆ­تىڭ 2009 جىل­عى جارلىعىمەن اشىلعان ەدى. ونىڭ مىندەتى – ساياسي مەملەكەتتىك قىزمەتكەر­لەردىڭ رەزەرۆىن دايىنداۋ. وندا وقيتىن­دار­دىڭ قىزمەتى مينيسترلىكتەر دە­پار­تامەنتتەرىنىڭ ديرەكتورى نەمەسە ديرەكتوردىڭ ورىنباسارى قىزمە­تى­نەن تومەن بولمايدى. وقۋ ورنىن بيىل بىتىرگەندەر اقش-تىڭ ديۋك ۋنيۆەرسيتەتىندە ءۇش ايلىق ءتا­لىمدەمەدەن ءوتتى. اتالعان ۋنيۆەرسيتەت الەمدىك جوو-لار رەيتينگى بويىنشا 13-ءشى ورىندا. قا­زاق­ستان­دىق قىزمەتكەرلەر وسى ۋني­ۆەر­سيتەتتىڭ ديپلومدارىن الدى. ايتا كەتەتىن ءجايت, وقۋ باعدار­لاما­سى قازاقستاندىق جەرگىلىكتى باسقارۋ ورگاندارىندا وندىرىستىك تاجىريبەدەن ءوتۋدى دە قاراستىرعان. ءسويتىپ, بولاشاق باسقارۋشىلار الەمدىك جانە وتاندىق تاجىريبە­لەردى سالىستىرا وتىرىپ, ەكەۋىن دە بىردەن قامتيدى. اكادەميا مەكتەبىنىڭ الەمدىك ال­دىڭعى قاتارلى ۋنيۆەرسيتەتتەرمەن ىن­تى­ماقتاستىق ورناتۋى ەل­باسى ن.نازارباەۆتىڭ تاپسىرما­سى­نا سايكەس ىسكە اسىرىلعان. ول وقۋ ۇدەرىستەرىن تو­لىق اۋقىمدا ينتەرناتسيونالداندىرىپ, حالىق­ارالىق اككرەديتاتسيا الۋدى ءجۇ­زەگە اسىرادى. ديپلوم تاپسىرۋ سالتاناتىنا پرەزيدەنت اكىمشىلىگى باسشى­سى­نىڭ ورىن­باسارى ب.بايبەك, اقش-تىڭ قازاقستان­داعى ديپلوما­تيا­لىق ميسسياسىنىڭ باسشىسى دج.وردۆەي, اقش ستەنفورد اتىن­داعى ۋنيۆەرسيتەتى مەملەكەتتىك سايا­سات مەكتەبىنىڭ دەكانى ديۋك بريۋس, وسى ۋنيۆەرسيتەتتىڭ حالىق­ارالىق دامۋ ورتالىعىنىڭ اتقارۋ­شى ديرەكتورى ديۋك دجوناتان ابەلس جانە باسقالار قاتىستى. جاقسىباي سامرات.