تۇلەپ ۇشقان تۇلەكتەر

ەڭسەلى ەلوردامىزدىڭ مەكتەپتەرىن بيىل 3650 تۇلەك ءبىتىرىپ شىقتى. ولاردىڭ اراسىنان 99 وقۋشى «التىن بەلگىگە» لايىق­تىعىن دالەلدەسە, 64 تۇلەك ەرەكشە اتتەستاتقا يە بولدى. ال 125 تۇلەك حالىقارالىق جانە رەس­پۋب­ليكالىق بايقاۋلاردىڭ جە­ڭىمپازى رەتىندە تانىلىپ, ولار قا­زىر­دىڭ وزىندە مەملەكەتتىك گرانت­قا قول جەتكىزىپ وتىر. وسىنداي بيىك بەلەستەن كورىنگەن ەلوردالىق وقۋشىلاردىڭ اراسىنان شىققان جۇزدەن جۇيرىكتەرگە ارنالعان سال­تاناتتى ءراسىم «قازاقستان» ورتا­لىق كونتسەرت زالىندا ءوتىپ, قالا اكىمى يمانعالي تاسماعامبەتوۆ مەكتەپ ءبىتىرۋشى ۇل-قىزعا ءسات ساپار تىلەدى. ون ءبىر جىل بويى ءبىلىم ءنارى­مەن سۋسىنداتقان التىن ۇيالارى­مەن قوشتاسۋ وڭاي ەمەس. دەسە دە, الدارىڭىزدا ءومىردىڭ داڭعىل دا, دارا جولى جاتىر. بۇگىن جاس استانالىقتاردىڭ جاڭا تولقىنى وزدەرىنىڭ العاشقى ەڭ ماڭىزدى ءبىلىم تۋرالى قۇجاتتارىن الىپ وتىر. وسى وقيعامەن سىزدەردى شىن جۇرەكتەن قۇتتىقتايمىن! ەلىمىز تاۋەلسىزدىگىنىڭ 20 جىل­دىعى قارساڭىندا بۇل ەرەكشە مازمۇنعا يە, دەگەن يمانعالي نۇرعالي ۇلى نەلسون ماندە­لانىڭ «مەن – ءوز تاعدىرىمنىڭ ءامىرشىسىمىن. مەن – ءوز ارمانىم­نىڭ كاپيتانىمىن» دەگەن ءسوزىن دايەككە كەلتىردى. «ول كىسى كوزى تىرىسىندە ۇلى تۇلعاعا اينالدى. ويتكەنى, ول ءوز ارمانىن تاۋىپ, ونى گۋمانيستىك جولمەن جۇزەگە اسىردى. ارمانىنا ءار ادامعا ءتۇسى­نىكتى يدەاليستىك قۇرالداردىڭ كومەگىمەن قول جەتكىزدى. سوندىق­تان سىزدەرگە ەشقاشان ارماندارى­ڭىزدان باس تارتپاڭىزدار دەگىم كەلەدى. اركىمنىڭ ءوز ارمانى بار. تەك ارمان عانا سىزدەردى تابىسقا جەتەلەيدى», – دەدى ول. بۇدان كەيىن  بيىل ۇزدىك كور­سەت­كىشكە جەتكەندەردى ماراپاتتاۋ راسىمدەرى جالعاسىن تاپتى. «انا ءتىلى جۇلدىزى» نوميناتسياسى بو­يىنشا ەر بالالارعا ارنالعان قازاق-تۇرىك ليتسەيىنىڭ تۇلەگى ابىكەن امىرە, «شابىت جۇل­دى­زى» نوميناتسياسى بويىنشا №60 مەكتەپ-ليتسەيدىڭ تۇلەگى ايگەرىم وسپانوۆا, «كوشباسشى جۇلدى­زى» نوميناتسياسى بويىنشا №38 مەكتەپ-ليتسەيدىڭ تۇلەگى ىسقاق اسەت, تاعى باسقالار باعالى سىيلىقتارعا يە بولدى. مەكتەپ تۇلەكتەرىنىڭ اتىنان ايدىن احانوۆ جاۋاپتى ءسوز الىپ, وزدەرىنە جاسالىپ وتىرعان ءىلتي­پات­قا ريزاشىلىعىن بىلدىرسە, قا­زاق­تىڭ ايتۋلى ءانشى قىزى, قازاق­ستاننىڭ حالىق ءارتىسى روزا رىم­باەۆا «مەكتەپ ءۆالسىن» ورىندادى. سۇلەيمەن مامەت