370 ادامعا جۇمىس تاۋىپ بەرگەن كاسىپكەر

قازىرگى نارىق زامانىندا ءجيى ەستىلەتىن ءسوزدىڭ ءبىرى – شاعىن جانە ورتا كاسىپكەرلىك. ونى دامىتۋ جايىندا دا از ايتىلىپ جاتقان جوق. مەملەكەت قول­دان كەلگەنشە قولداۋ بىلدىرۋدە. الاي­دا بۇل تۇرعىدا ءار كاسىپكەر ءوزىن­دىك جولمەن شاما-شارقىنشا ەڭبەك ەتىپ,  العا قويعان ماقساتتارىنا جەتۋگە تالپىنۋ ۇستىندە. شاعىن جانە ورتا كاسىپكەرلىكتى دوڭگەلەتىپ اكەتۋدەگى ءۇل­كەن تابىستىڭ ءبىرى, ءبىر ادام بولسا دا جۇمىسپەن قامتىلاتىندىعىندا دەسەك, جاڭىلىسپاسپىز. تاباندىلىق پەن ءتو­زىمدىلىكتى تالاپ ەتەتىن بۇل سالادا ەرىنبەي ەڭبەك ەتىپ, ۇقساتىپ جۇرگەن جاندار دا ارامىزدا از ەمەس. سولاردىڭ ءبىرى وڭتۇستىك قازاقستان وبلىسى, ءتۇر­كىستان قالاسىنداعى «ياسسى» كونسور­تسيۋ­مىنىڭ توراعاسى ۇمبەت جۇسىپباەۆ. توراعا دەپ وڭاي عانا اۋىز تولتى­رىپ ايتقانىمىزبەن, سالاداعى جۇمى­سىن ينە-جىبىنەن باستاعان ۇمبەت ءابىل­دا ۇلىنىڭ وتكەنىنە كوز جۇگىرتسەك, ونىڭ بالا جاستان-اق العىر, زەرەك بو­لىپ وسكەنىن بايقايسىز. وڭتۇستىك قا­زاقستان وبلىسىنىڭ وتىرار اۋدانىندا دۇنيەگە كەلىپ, ەرجەتكەن ول اۋدانداعى بۇرىنعى ۆ.ي.لەنين اتىنداعى ورتا مەكتەپتى 1972 جىلى التىن مەدالمەن بىتىرەدى. ارمان قۋعان  جاس مۇنان كەيىن الماتىعا كەلىپ پوليتەحنيكالىق ينس­تي­تۋتتىڭ مەتاللۋرگيا فاكۋلتەتىنە ءتۇسىپ, ونى 1977 جىلى ينجەنەر-تەحنولوگ  ماماندىعى بويىنشا ۇزدىك ءبىتىرىپ شىعادى. وسىدان 1996 جىلعا دەيىن ءوز سالاسىندا  ءتۇرلى قىزمەتتەر اتقارعان ول 1999 جىلدان باستاپ جەكە كاسىپ­كەرلىككە كەلەدى. تەك ەڭبەكتى عانا ەمەس, ۇيىمداس­تىرۋشىلىق قابىلەتتى قاتار تىلەيتىن سالا باسشىلىعىن قولعا الۋ ۇمبەت ءابىل­دا ۇلىنا جەڭىل بولماعان. بۇعان ارينە, بىرنەشە كاسىپكەرلىكتىڭ باسىن بىرىكتىرىپ, ۇيىستىرا جۇمىس ىستەتۋدى قوسىڭىز. سايىپ كەلگەندە, مۇنىڭ بار­لىعى دا ماڭداي تەرمەن تىكەلەي بايلانىستى بولسا كەرەك. ەندى ەل يگىلىگى ءۇشىن قىزمەت جاساپ جاتقان «ياسسى» كونسورتسيۋمىنا  كەلسەك, بۇل رەتتە قالالىق ورتالىق اۆتوۆوكزال مەن «ياسسى-ترانزيت» جشس مەملەكەتارالىق جۇك جانە جولاۋشى­لار تاسىمالى قىزمەتىن ايتۋعا بولادى. سونداي-اق «مارجان» جشس قالالىق ءتىس ەمحاناسى, «تۇركىستان» اۋىلشارۋا­شىلىق تۇتىنۋشىلار كووپەراتيۆى سىن­دى وزگە دە قىزمەت كورسەتۋ مەن بىرقاتار شارۋا قوجالىقتارى بار. جالپى سانى كونسورتسيۋم بۇگىنگى كۇنى 370 ادامدى جۇمىسپەن قامتىپ وتىر. – ارينە, قاي كاسىپتى باستاعاندا ونىڭ وزىندىك قيىندىقتارىن كەز-كەل­گەن كاسىپكەر سەزىنەدى. دەسەك تە, سولار­دىڭ تاباندىلىقپەن جەل قايىققا وتىرعاندارى عانا ىلگەرى جۇرەدى. ءوزىڭىز كورىپ وتىرعانداي ءبىر سالامەن عانا شەكتەلمەي, حالىققا قىزمەت كورسە­تۋدىڭ ءتيىمدى جولدارىن تابا بىلۋدە بارىمىزدى سالىپ كەلەمىز. جۇمىسىم قارقىندى ءجۇرىپ جاتسا, بۇل مەنىڭ ەگەمەندى ەلىمىزدىڭ ءوسىپ-وركەندەۋىنە قو­سىپ وتىرعان از دا بولسا  ۇلەسىم دەپ قۋانامىن. وسى جۇيەلى جۇمىستارىم مەن ەڭبەككەرلەردىڭ جۇمىلا جۇك كو­تەرۋلەرىنىڭ ارقاسىندا ەلىمىزدىڭ الەۋ­مەتتىك-ەكونوميكالىق دامۋىنا الدىڭ­عى جىلى 10 ملن. تەڭگەدەن استام سالىق تۇسىرسەك, بىلتىر 15 ملن. تەڭگەمەن ءوز ۇلەسىمدى قوستىم. بيىل بۇل كورسەتكىش بۇيىرتسا, 17 ملن. تەڭگەنى قۇرايدى دەپ وتىرمىز, – دەيدى «ياسسى» كونسورتسيۋمىنىڭ توراعاسى ۇمبەت جۇسىپباەۆ. جوعارىدا كونسورتسيۋمنىڭ قۇرا­مىن­دا بىرنەشە قىزمەت كورسەتۋ سا­لالارى بار ەكەنىن ايتىپ وتتىك. ەندى ولاردىڭ كەيبىرىنىڭ اتقارار جۇمىس­تارىنا توقتالساق. تۇركىستان قالاسى جالپى ەلىمىزدەگى تۋريستىك قالا بولىپ سانالادى. بۇعان كۇن قۇرعاتپاي الىس-جاقىن جەرلەردەن ادامدار كەلىپ تۇ­رادى. ارينە, ءبىرىنشى كەزەكتە كەلگەن ادام قوجا احمەت ياساۋي بابا كەسەنەسىنە اتباسىن تىرەپ, زيارات ەتەدى. ولارعا وسى تۇس ءتۇرلى قىزمەتتەر كورسەتىلۋ كەرەكتىگى ايتپاسا دا تۇسىنىكتى. كەسەنە جانىندا ورنالاسقان قالا قوناقتارى مەن تۇرعىندارىنا «ياسسى» كەشەنى قىزمەت كورسەتۋدە. سونداي-اق اۋىل شارۋاشىلىعى دا ەرەكشە ورىن الادى. بۇگىنگى كۇنى 7000 گەكتار جايىلىم جەر مەن 300 گەكتار سۋارمالى جەردى يگەرىپ وتىرعان كاسىپكەرلىك, اۋىل شارۋاشى­لى­عىنداعى قاجەتتى تەحنيكالاردىڭ بارلىق اۋىسىمدا پايدالاناتىن ءتۇر­لەرىمەن قامتاماسىز ەتىلگەن. بىلتىر 70 گەكتار جەرگە باۋ-باقشا ەگىلگەن. 2009 جىلدان «تۇركىستان» اۋىلشا­رۋاشىلىق تۇتىنۋ كووپەراتيۆىندە مال بورداقىلاۋ الاڭى, مال سويۋ تسەحى مەن «حالال» ستاندارتىنا ساي اۋىسىمىنا 1 توننا شۇجىق دايىندايتىن تسەح جۇ­مىسىن باستاعان. مال ونىمدەرىن ءوڭ­دەي­تىن كىشى كلاستەر كەشەننىڭ اشى­لۋىنا «اگرارلىق نەسيە كورپوراتسيا­سى» 33,6 ملن.  تەڭگە, «ماكسيمۋم» اي­ماقتىق ينۆەستيتسيالىق ورتالىعى 6,5 ملن. تەڭگە قارجىلاي قولداۋ كورسە­تىپتى. قازىرگى كەزدە ءتۇرلى ەت ونىمدەرى شىعارىلىپ, قالاداعى دۇكەن سورەلە­رىنەن قالا حالقىنا جەتكىزىلىپ بەرىلۋدە. بۇل تسەحتا 25 ادام جۇمىسپەن قام­تىلعان. ۋاق مالدان اسىل تۇقىمدى شارۋاشىلىق ستاتۋسىن الىپ, مەملەكەتتەن قارجىلاي كومەك تە كورىپ وتىر ەكەن. كاسىپكەر تەك قارقىندى جۇمىس جا­ساۋدى وزىنە قاناعات تۇتپاي, ەلىمىزدىڭ رۋحاني, الەۋمەتتىك سالاسىنىڭ دامۋى­نا دا ەرەكشە ءمان بەرەتىندىگىنىڭ دە كۋاسى بولدىق. الدىڭعى جىلى وتىرار اۋدانىنىڭ 5000 تۇرعىنى بار وتىرار ەلدى مەكەنىندە ەكى قاباتتى مەشىت قۇرىلىسىن بىتىرگەنى جانە ءوز ۇجى­مىنداعى الەۋمەتتىك جاعدايى تومەن 5 وتباسىعا 5 تۇرعىن ءۇي سالدىرىپ بەرگەنى وسىنىڭ ايقىن دالەلى ىسپەتتى. سونداي-اق اسىراۋشىسى جوق جەتىم-جەسىر 7 وتباسى مەن 15 جەتىم بالالاردى ءوز قامقورلىعىنا العان. جان-جاعىنا شۋاعىن شاشىپ جۇرە­تىن ابزال جاننىڭ نازارىنان قالاداعى سپورتتىڭ وركەندەۋى دە تىس قالماعان. بىرنەشە جىل قالالىق «شالقار» فۋتبول كومانداسىنا قارجىلاي كومەك تە كورسەتكەن. قالالىق تاەكۆوندو جانە ۇستەل تەننيسى فەدەراتسياسىنىڭ پرەزيدەنتتىگىن قوسا اتقارىپ جۇرگەن كاسىپ­كەر ونىڭ دامۋىنا ۇيىتقى بولۋدان ءبىر ساتكە دە جالىققان ەمەس. سونىمەن قاتار 2009 جىلى دزيۋدودان بولگاريادا وتكەن الەم چەمپيوناتىندا توپ جارعان وتىرار اۋدانىنىڭ ازاماتى ەرداۋلەت قۇرمانوۆقا دا قوماقتى سىي­لىق جاساعان. بۇل ەلىمىز سپورتىنىڭ دامۋىنا قارلىعاشتىڭ قاناتىمەن سۋ سەپكەندەي قۇراق ۇشا كومەكتەسۋى ەلىن سۇيگەن ۇلدىڭ ونەگەسى ەكەنى ايقىن. توككەن تەر مەن ەتكەن ادال ەڭبەك ەشقاشان دا زايا كەتپەيتىنى بەلگىلى. 2008 جىلى وڭتۇستىك قازاقستان وبلى­سىنداعى ەڭ ۇزدىك كاسىپكەر  نومينا­تسيا­سىنىڭ يەسى اتانسا, «التىن ساپا» ءوڭىر­لىك كورمە كونكۋرسىنىڭ العىس حا­تىن الدى. سونداي-اق وتكەن جىلعى جەل­­توقساندا ەل پرەزيدەنتى ن.ءا.نا­­­زار­­­باەۆ­- تىڭ جارلىعىمەن بەرىلگەن «ەرەن ەڭبەگى ءۇشىن» مەدالىن ومىراۋىنا تاقتى. بىرنەشە رەت قالانىڭ جىل ادامى اتاندى. تۇركىستان قالاسى مەن وتىرار اۋدانىنىڭ قۇرمەتتى ازاماتى بولدى. ۇمبەت ءابدىلدا ۇلىنىڭ ەندىگى تىلەگى ەلىمىزدىڭ اماندىعى مەن ۇجىم قىز­مەتكەرلەرىنىڭ تاتۋلىعى. ءوز ۇجىمى مەن كاسىبىن العاشقى ورىندارعا قويا بىلگەن وتاعاسىنىڭ بۇل پەيىلى كەيىنگى تولقىنعا ۇلگى بولارلىق ءۇردىس. ۇجىم باسشىسىمەن بولعان اڭگىمەدە ءبىز وسىعان كوز جەتكىزدىك. ءابدىراحمان قىدىربەك, وڭتۇستىك قازاقستان وبلىسى.