ىنتىماقتاستىق باستامالارى

قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتى كورەيا رەسپۋبليكاسىنىڭ ەلىمىزدەگى ەلشىلىگىمەن بىرلەسىپ, «قازاقستان-كورەيا ساراپتامالىق سەمينارى» شاراسىن وتكىزدى. وندا ەكى ەل ىنتىماقتاستىعىنىڭ بارىسى, ءوزارا قارىم-قاتىناستاردى دامىتۋدىڭ پەرسپەكتيۆالارى تالقى­لاندى. قازاقستان مەن كورەيا اراسىنداعى قارىم-قاتىناستاردى تەرەڭ زەردەلەپ جۇرگەن ساراپ­شى­لاردىڭ باسقوسۋى يگى داستۇرگە اينالىپ وتىر. مەملەكەت جانە ۇكىمەت باسشىلارى دەڭگەيىندە, سونداي-اق, ءتۇرلى سالا بويىنشا دا ەكى ەل اراسىندا ۇنقاتىسۋ ورناعان. قا­زاق­ستان پرەزيدەنتى نۇرسۇلتان نازارباەۆ ءتورت رەت وڭتۇستىك كورەيادا بولعان. تيىسىنشە كورەيا باسشىسىنىڭ دا قازاق­ستاندا بەس رەت بولعانى اتالدى. كورەيا پرەزيدەنتى ەلىمىزگە سوڭعى ساپارىندا ەۋرازيا ەلدەرىن بىرىكتىرەر «ەۋرازياشىلىق» باستاماسىن كوتەرگەن-ءدى. بۇل قىتايدىڭ «نازارباەۆ ۋنيۆەرسيتەت» قابىرعاسىندا جاريا ەتىلگەن «جىبەك جولى ەكونوميكالىق بەلدەۋىمەن» ۇشتاسىپ جاتىر, دەپ اتاپ كەتتى قسزي ديرەكتورىنىڭ ورىنباسارى سانات كوشكىمباەۆ. ونىڭ ايتۋىنشا, قازاقستان بۇل ۇسىنىسقا ۇلكەن قىزىعۋشىلىق تانىتادى جانە كولىكتىك, ەنەرگەتيكالىق باعدارلامالار مەن جوبالارعا قاتىسۋعا دايىندىعىن جاسىرمايدى. بۇل رەتتە, وڭتۇستىك كورەيانىڭ قازاقستان باستاماسىمەن قۇرىلعان اسشوك-ءنىڭ (ازياداعى ءوزارا ءىس-قيمىل جانە سەنىم شارالارى جونىندەگى كەڭەس) بەلسەندى مۇشەسى ەكەندىگىن ايتا كەتۋ كەرەك. سونىمەن قاتار, وڭتۇستىك كورەيا – قازاق­ستاننىڭ بۇۇ قك-ءنىڭ 2017-2018 جىلدارعى تۇراقتى ەمەس مۇشەلىگىنە كانديداتۋراسىن قولداعان ەلدەردىڭ ءبىرى. بۇدان باسقا, بۇل ەل كەزىندە استانادا ەكسپو-2017 حالىقارالىق كورمەسىن وتكىزۋگە دە قولداۋ بىلدىرگەن ەدى. جالپى, وڭتۇستىك كورەيانىڭ قازاقستانعا 9 ميل­ليارد دوللارداي ينۆەستيتسيا قۇيىپ, نەگىزگى ينۆەستورلار قاتارىنان تابىلىپ وتىرعانىن دا اتاپ كورسەتكەن ءجون. سونداي-اق, شارا اياسىندا ورتالىق ازيادا يادرولىق قارۋدان ازات ايماق قۇرۋ پەرسپەكتيۆالارى جانە دە ەۋرازيالىق ەكونوميكالىق وداق پەن وڭتۇستىك كورەيا ىنتىماقتاستىعىنىڭ ماسەلەلەرى تالقىعا سالىندى. ەلىمىزدەگى كورەيا ەلشىسى چو يونگچون ءوز سوزىندە ساراپشىلىق كە­ڭەس ەكى ەل اراسىنداعى بايلانىستىرۋشى كوپىرگە اينالىپ وتىرعاندىعىن اتاپ ءوتتى. ونىڭ ايتۋىنشا, ەكى ەل اراسىنداعى ىنتىماقتاستىق جوعارى دەڭگەيدە جانە ونىڭ الەۋەتىن ارتتىرۋعا بارلىق مۇمكىندىكتەر بار. قازاقستان تابيعي رەسۋرستارعا باي ەل بولسا, وڭتۇستىك كورەيادا زاماناۋي تەحنولوگيالاردى دامىتۋ جولعا قويىلعان. ال قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ەكو­نوميكالىق زەرتتەۋلەر ءبولىمىنىڭ مەڭ­گەرۋشىسى ەۆگەني حون وڭتۇستىك كورەيا ءۇشىن ورتالىق ازيا ەلدەرى مەن ەۋرازيالىق ەكونوميكالىق وداق ەلدەرى ماڭىزدى سانالاتىنىن ورتاعا سالدى. سەۋل تاراپىنان باستاماشىلىق تانىتىلعان وڭتۇستىك كورەيا جانە ورتالىق ازيا فورۋمى, سونداي-اق, جاڭا ءوزارا ءتيىمدى ىنتىماقتاستىققا قۇرىلعان رەسۋرستاردى تەحنولوگيالارعا ايىرباستاۋ سەكىلدى ازيا باستاماسىنىڭ ورنى ەرەكشە ەكەندىگى دە العا تارتىلدى. اسقار تۇراپباي ۇلى, «ەگەمەن قازاقستان».