تۇلەگەن تۇركىلىك رۋح

ارعى تەگى ءبىر تامىرلاس جۇرت­تار, ياعني تۇركى دۇنيەسى كەڭەس ءداۋىرى قۇردىمعا قۇلاعاننان كەيىن اراعا عاسىرلار سالىپ قايتا تابىستى. ونىڭ ۇيىتقىسى قازاق ەلى بولىپ وتىر. ەلباسى نۇر­سۇل­تان نازارباەۆتىڭ باستاماسىمەن تۇركىتەكتەس مەملەكەتتەر كەڭەسى, تۇركىتەكتەس مەملەكەتتەر پارلا­مەنتى­نىڭ اسسوتسياتسياسى قۇرىلىپ, تۇركى اكادەمياسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە تۇركىتانۋ جانە التايتانۋ ورتالىقتارى اشىلدى. بۇل التاي تەكتى حالىقتار جانە تۇركى الەمىن زەرتتەۋگە, زەردەلەۋگە, ءبىر كەزدە ورتاق كەڭىستىكتە ءومىر ءسۇر­گەن, سالت-داستۇرلەرى مەن مادە­نيە­تى ۇقساس حالىقتىڭ تاريحىن جۇيە­لەۋگە باعىتتالعانى بەلگىلى. وسىن­داي يگى قادامعا ارنالعان «التايتانۋ جانە تۇركىتانۋ: تاريح جانە قازىرگى زامان» اتتى رەسپۋبليكا­لىق عىلىمي كونفەرەنتسيا جۋىر­دا ەۋرازيا ۋنيۆەرسيتەتىندە وتكەن ەدى. ول نەگىزىنەن ءتۇبى ءبىر تۇركى حالىقتارىنىڭ تاريحىن, تىلدەرى مەن ەتنومادەنيەتىن, جالپى, ءتۇر­كىلىك تىيىمدار مەن استارلى ءسوز­دەردى, ياعني التايدان باستالعان كوشتىڭ امەريكاعا بارىپ تىركەلگەننەن كەيىنگى تاعدىر تالەيىن زەرتتەپ كەلە جاتقان بەلگىلى عا­لىم, پارلامەنت سەناتىنىڭ دە­پۋتاتى ءادىل احمەتوۆتىڭ شىعار­ماشىلىعىنا ارنالعانىن ايتا كەتسەك دەيمىز. كونفەرەنتسيانى ءبىلىم وردا­سى­نىڭ رەكتورى باقىتجان ءابدى­راي­ىم اشىپ, ءماجىلىس دەپۋتاتى ۋ.قاليجان, ۋنيۆەرسيتەتتىڭ تەلەراديوجۋرناليستيكا كافەدرا مەڭ­گەرۋ­شىسى ع.شالاحمەتوۆ, «الاش» ينس­تيتۋتىنىڭ ديرەكتورى, پروفەسسور د.قامزابەك ۇلى, «ديالوگ ەۋرازيا» حالىقارالىق قوعامدىق قورىنىڭ پرەزيدەنتى, «دا» جۋر­نالىنىڭ قازاقستانداعى ۇيلەس­تىرۋشىسى س.اكچاي, «نازارباەۆ ۋني­ۆەرسيتەتى» قازاق ءتىلى كافەدرا­سىنىڭ مەڭگەرۋشىسى, پروفەسسور گ.قۇرمانباي, پروفەسسور س.ساتە­نوۆا, وزگە دە ازاماتتار تۇركى دۇنيەسى تۋرالى جان-جاقتى وي تاراتا كەلىپ, كونفەرەنتسياعا ارقاۋ بولعان عالىمنىڭ ەڭبەكتەرىنە تالداۋ جاسادى. باياندامالاردىڭ تۇيىنىندە التايتانۋ جانە تۇركى­تانۋ باعىتىن ودان ءارى جالعاس­تىرىپ, ارعى التايلىق تەكپەن كلاس­سيكالىق تۇركولوگيانىڭ مۇ­را­لارى مولىنان ساقتالىپ وتىر­عان وڭىرلەرگە تۇراقتى تۇردە ەكس­پەديتسيا جاساۋ, وعان قارجىلىق مۇمكىندىكتەر تۋدىرۋ ماسەلەسىنە ءبىلىم جانە عىلىم مينيسترلىگى ۇيىت­قى بولۋ قاجەتتىگى, ل.ن.گۋ­ميلەۆ اتىنداعى ەۋرازيا جانە ءال-فارابي اتىنداعى ۋنيۆەرسيتەتتەر تۇركولوگيا ماماندىعى بويىنشا سوڭعى جىلدارى اشقان باكالاۆريات, ماگيستراتۋرا باع­دار­لامالارى­نىڭ مەملەكەتتىك ستان­دارتىن جاڭا جاعدايعا سايكەس قايتا قاراۋ, اتالعان ماسەلەلەر بويىنشا قا­زاق ەلى عىلىمىنا شەتەلدىك بەلگىلى عالىمداردى تارتۋ, التايتانۋ جانە تۇركولوگيا ما­مان­دىقتارى بويىنشا رھد عىلى­مي دارەجە قور­عايتىن شيفر بەلگىلەۋ, كون­فەرەنتسيانىڭ ماتەريال­دارىن كىتاپ ەتىپ شىعارۋ كەرەكتىگىن ءتيىستى ورىنداردىڭ نازارىنا سالۋ قاجەت دەپ شەشتى. ءسويتىپ, تۇلەگەن تۇركى­لىك رۋحتى جاڭعىرتا وتىرىپ, ۇر­پاق ساناسىنا تەك تامىردى ۇعىن­دىرۋ جايى قوز­عالدى. سۇلەيمەن مامەت.