قوس تاراپ – ورتاق مۇددە

كەشە سىرتقى ىستەر مينيسترلىگىندە اتالعان ۆە­دوم­ستۆونىڭ رەسمي وكىلى اسقار ابدراحمانوۆ ءداستۇرلى اپتالىق بريفينگىن وتكىزدى. وندا جاقىن كۇندەرگە جوسپارلانعان ءىس-شارالار جونىندە ءمالىم ەتىلدى. 15 ماۋسىمدا ۇيىم قۇرىلۋىنىڭ 10 جىلدىعىنا وراي, استانادا شانحاي ىنتىماقتاستىق ۇيىمىنا (شىۇ) مۇشە ەلدەر مەملەكەت باسشىلارى كەڭەسىنىڭ وتىرىسى وتكىزىلەدى, دەدى ا.ابدراحمانوۆ. شىۇ-عا مۇشە ەلدەر مەملەكەت باسشىلارىنىڭ كەڭەسى شانحاي ىنتىماقتاستىق ۇيىمىنىڭ جوعارى ورگانى سانالادى. ول شىۇ قىزمەتىنىڭ باسىمدىقتارىن انىقتايدى جانە نەگىزگى باعىتتارىن بەلگىلەيدى, ونىڭ ىشكى قۇرىلىسىنىڭ جانە قىزمەت ەتۋىنىڭ قۇرامىنا كىرمەيتىن مەملەكەتتەر مەن باسقا دا حالىقارالىق ۇيىمدارمەن ىنتىماقتاستىعىنىڭ ماڭىزدى ماسەلەلەرىن شەشەدى. رەسمي وكىلدىڭ ايتۋىنشا, شىۇ-نىڭ الداعى مەرەيتويلىق ءسامميتىنىڭ جۇمىسى وتكەن ونجىلدىق ىشىندەگى شىۇ قىز­مە­تىنىڭ ناتيجەلەرىن تالداۋ مەن ۇيىمنىڭ الداعى دامۋ كەلەشەگىن انىقتاۋدى كوزدەمەك. بۇعان قوسا, سامميت بارىسىندا بۇگىنگى تاڭداعى الەمدىك جانە ايماقتىق جاعدايلارعا بايلانىستى تۋىنداعان ماسەلەلەردىڭ كەڭ اۋقىمىن تالقىلاۋ دا جوسپار­لانىپ وتىرعان كورىنەدى. شارانىڭ قورىتىندىسى بويىنشا شىۇ ونجىلدىعىنىڭ استانا دەكلاراتسياسىن قابىلداۋ جوسپارلانۋدا. استاناداعى سامميت اياقتالعاننان كەيىن توراعالىق تىزگىنى قازاقستاننان قحر-عا وتەدى, دەدى رەسمي وكىل. بريفينگ بارىسىندا رەسمي وكىل يپر قالاسىندا قازاق­ستاننىڭ بەلگياداعى ەلشىلىگى جانە جەرگىلىكتى بيلىكتىڭ بىرلەسە ۇيىمداستىرۋىمەن يادرولىق سىناقتار قۇرباندارىنا ارنالعان ەسكەرتكىشتىڭ اشىلۋ ءراسىمى وتەتىنىنە دە توقتالدى. بۇل شاراعا ءماجىلىس توراعاسىنىڭ ورىنباسارى ۆلاديمير بوبروۆ باستاعان قازاقستان پارلامەنتىنىڭ دەلەگاتسياسى, ەۋروپالىق پارلامەنت پەن بەلگيا پارلامەنتىنىڭ مۇشەلەرى, ەۋرووداق ينستيتۋت­تارىنىڭ رەسمي وكىلدەرى قاتىسپاق ەكەن. ەسكەرتكىش ەلىمىزدىڭ پرەزيدەنتى نۇرسۇلتان نازارباەۆتىڭ بىلتىر قازان ايىندا بريۋسسەلگە رەسمي ساپارى كەزىندە قا­زاقستان حالقى اتىنان بەلگيا حالقىنا سىي رەتىندە تاپسى­رىلعان. ياعني, بۇل ەسكەرتكىش بەلگيانىڭ اتاقتى مۇراجاي­لا­رىنىڭ بىرىندە, ءبىرىنشى جانە ەكىنشى دۇنيەجۇزىلىك سوعىس وقيعالارىنا ارنالعان ەۋروپانىڭ «فلاندريا دالاسى» كەشەنىندە ورناتىلادى, دەدى بۇل جونىندە ا. ابدراحمانوۆ. سونداي-اق, بريفينگ اياسىندا ماۋسىمنىڭ 16-17-ءسى كۇندەرى يسپانيا كورولدىگى ۇكىمەتىنىڭ توراعاسى حوسە لۋيس رودريگەس ساپاتەرونىڭ قازاقستانعا رەسمي ساپارمەن كەلەتىنى ايتىلدى. بۇل ساپار بارىسىندا ساپاتەرونىڭ قازاقستان باسشىلىعىمەن كەلىسسوزدەرى جوسپارلانعان. تاراپتار, سونداي-اق, ەكىجاقتى ىنتىماقتاستىقتىڭ ءار ءتۇرلى سالالارىنداعى ورتاق ستراتەگيا­لىق باعىتتاردى دا باستى نازاردا ۇستاماق. ەكى مەملەكەت اراسىنداعى ساۋدا-ەكونوميكالىق قاتىناستارعا جاڭا سەرپىن بەرۋ ماقساتىندا ۇكىمەت باسشىلارىنىڭ يسپاندىق ءىرى كومپانيالار وكىلدەرىمەن كەزدەسۋى دە كوزدەلىپ وتىرعان كورىنەدى. ساپار سوڭىندا ەكىجاقتى ۇكىمەتارالىق, ۆەدومستۆوارالىق كەلىسىمدەرگە جانە كوممەرتسيالىق قۇجاتتارعا قول قويىلماق ەكەن. ءلايلا ەدىلقىزى.