قازاق مىنە, ءجۇزى جارقىن, قولى اشىق

ءبىزدىڭ سالت-ءداستۇرىمىز, ادەت-عۇرپىمىز, مادەنيەتىمىز زامان قانشا جەردەن جاڭارعانىمەن, ۇر­پاق اۋىسىپ, جاھاندانۋدىڭ ەلەسى قوعامدى داڭعازا اۋەنگە ەلىتكەنىمەن, اسىلدى تات باسپايتىنى, سىرلى اياقتىڭ سىرى كەتسە دە سى­نى كەتپەيتىنى سياقتى  سول كۇي­ىن­دە ساقتالىپ كەلەدى. ويتكەنى, سول قۇندىلىقتار وشكەن كۇنى ءبىزدىڭ  ۇلتتىق, وزىندىك ەرەكشەلىگىمىز بەن بەت-بەينەمىز دە جويىلادى. كەز كەلگەن مادەني شارا بارىسىندا ۇلتتىق كيىم كيىپ, ىزەتپەن ءيىلىپ قوناقتاردى كۇتىپ الاتىن قىزدار مەن شاشۋ شاشاتىن اجەلەردىڭ, سونداي-اق دومبىراعا قوسىلىپ ارناۋ ولەڭ ايتاتىن اقىنداردىڭ, ميكروفونسىز-اق قوزى كوش جەرگە جە­تەتىن داۋىسى بار ءداستۇرلى انشىلەردىڭ بولۋى ءجاي انشەيىن كوز الدارقاتاتىن كورىنىس ەمەس, باسقانى قايتالامايتىن دارالى­عى­مىز, شاراعا جيىلاتىن قوناق اتاۋلىعا قۇرمەتىمىز.  وسى كۇن­دەرى ەلوردادا ءوتىپ جاتقان ءدۇ­نيە­جۇزى قازاقتارىنىڭ ءىV قۇرىلتايى اياسىندا دا سول ەجەلگى سالت-ءداس­تۇردەن, ادەت-عۇرىپتان جاڭىل­ماي, دەلەگاتسيا قۇرامىنداعى بار قازاقتىڭ  باسىن قوساتىن ءداستۇر­لى مەرەكەلى مادەني شارا ۇي­ىم­داستىرىلدى. ونىڭ باسى-قاسىن­دا پرەزيدەنت اكىمشىلىگى مەن ەلوردا اكىمدىگى وكىلدەرى ءجۇردى. ەسىلدىڭ سول جاعالاۋىنداعى ەڭ ءبىر كورىكتى جەردە «اتامەكەن» ەتنومەموريالدىق كەشەنى بار. سول كەشەننىڭ اۋماعىنا جيىرما شاقتى كيىز ءۇي تىگىلدى. كيىز ءۇيدىڭ داستارقانىنا قازاقتىڭ ءداستۇرلى تاعامدارى قويىلىپ, قوناقتارعا قوناعاسى تارتىلدى. ال وسى مەزەتتە سىرتتا كونتسەرت ءوتىپ جاتتى. شەتتەن كەلگەن قانداستارىمىز, ەڭ الدىمەن قازاقتىڭ سىرعا سالۋ, قۇدا ءتۇسىپ, قۇيرىق-باۋىر اساتۋ  سياقتى ءداستۇرىن تاماشالاپ ءبىر جاساپ قالدى. بۇل قۇدا ءتۇسۋ ءداس­تۇرىن شەتتەگى اعايىن نازارىنا ۇسىنۋداعى ماقسات – ءاربىر مەملەكەتتە تۇراتىن قازاق­تارعا قازاق­تار­مەن قۇدا بولۋ ار­قىلى ءبىر-بىرىڭە جاقىنداي ءتۇسىڭ­دەر, قازاق­تىقتى ساقتاۋدىڭ قا­مىن جاساپ جۇرىڭدەر دەگەن ويدى ايتۋ دەپ بىلەمىز. ىلە-شالا اياعىن ەندى عانا اپىل-تاپىل باسۋعا جاراپ قالعان كىپ-كىشكەنتاي بوتاقان شۇعىلا­نىڭ تۇساۋى كەسىلدى.  سودان كەيىن ساحناعا كوتەرىلگەن ءتورت جىگىت, ياعني استانا قالاسى مەملەكەتتىك فيلورمونياسىنىڭ ونەر­پاز­دارى «الاش تۋى استىندا» اتتى پات­ريوتتىق رۋحتاعى جىردى الما-كەزەك وقىپ, قوناقتاردى ءبىر سەرپىلتىپ تاستادى. وسى مادەني شارادا استانا قالاسى مەملەكەتتىك في­لور­مونياسىنىڭ «سارىار­قا» ۇلت-اسپاپتار ءانسامبلى مەن «ناز» مەملەكەتتىك بي انسام­بلى­نىڭ ونەر­پازدارى اپپاقتىڭ, ءبىر­جاننىڭ, اقان سەرىنىڭ, باس­قا دا حالىق ءان­دەرىن, سون­داي-اق ىقى­لاس, قۇر­مانعازى, سۇگىر, ءتاتتىم­بەت كۇي­لەرىن شال­قىتا ورىنداپ, «اق قاز», «قۋانىش», «شالقى­ما» بيلەرىن مىڭ بۇرالا بيلەدى. شارانىڭ سوڭىن الا قوناقتار «اتامەكەن» ەتنومەموريالدىق كەشەنىن ارالاپ, ەلىمىزدىڭ تۇكپىر-تۇكپىرىنە ەكسكۋرسيا جاسادى.  ايگۇل سەيىلوۆا.