ءوزارا ىقپالداستىق ءورىسى

قازاقستان پارلامەنتى ءماجىلىسىنىڭ دەپۋتاتتارى ۆالەري ۆيشنيچەنكو مەن ايگۇل سولوۆەۆا ۋكراينا جوعارعى راداسىنىڭ دەپۋتاتى ولەگ لياشكومەن جۇزدەستى, دەپ حابارلادى وسى پالاتانىڭ ءباسپاسوز قىزمەتى. دەپۋتات ۆالەري ۆيشنيچەنكو قازاقستاننىڭ ىشكى جانە سىرتقى سايا­ساتتاعى ۇستانىمى, ەلدىڭ قول جەتكىزگەن تابىستارى تۋرالى بايانداپ بەردى. قازاقستان پرەزيدەنتى نۇر­سۇلتان نازارباەۆتىڭ جۇرگىزىپ وتىر­عان سايا­ساتىنىڭ ارقاسىندا ۇلت­ارا­لىق كەلىسىم مەن تاتۋلىق مەملە­كەت­تىڭ ءبىرتۇ­تاستىعىن ساقتاۋمەن قا­تار, ەكونو­ميكالىق-الەۋمەتتىك دا­مۋ­ى­­نا جول اشىپ كەلە جاتقانىن ايتىپ ءوتتى.  دەپۋتات قازاقستانداعى ۋكراين دياس­پوراسىنىڭ باقۋاتتى تۇرىپ جات­قانىن اڭگىمەلەدى. اسىرەسە, قوس­تاناي, قاراعاندى وبلىستارىندا ۋكراين ۇل­تىنىڭ وكىلدەرى كوبىرەك قونىستانعان. ۋكراينا قازاقتىڭ جىر الىبى جام­بىل جاباەۆقا كيەۆ قالاسىندا ەسكەرتكىش ورناتۋ ءۇشىن جەر تەلىمىن ءبولدى. ال ءوز كەزەگىندە قازاقستان تاراس شەۆچەنكوعا استانا قالاسىنداعى وماروۆ جانە اۋەزوۆ كوشەلەرىنىڭ قيىلىسىندا ەسكەرتكىش ورناتۋدى جوسپارلاپ وتىر. تاراپتار پارلامەنتارالىق ىنتى­ماقتاستىقتى نىعايتۋ, قازاقستان مەن ۋكراينا اراسىنداعى قارىم-قاتى­ناس­تى دامىتۋ باعىتىنداعى ويلارىن ور­تا­عا سالدى. ۋكراينا جوعارعى رادا­سى­نىڭ دەپۋتاتى ولەگ لياشكو: «قا­زاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىندا نۇر­سۇل­تان نازارباەۆتىڭ ايقىن جەڭىسى جانە بۇكىل حالىقتىڭ قولداۋى قازاق­ستان­دىقتاردىڭ ءوز كوشباسشىلارىنىڭ يدەيا­سى جولىندا بىرىگە بىلەتىنىن الەم­گە تانىتتى», – دەدى. مەيمان حالىق بىرلىگى بار جەردە ەكونوميكالىق جانە باسقا دا سالالار بويىنشا تابىستارعا جەتۋگە بولاتىنىن تىلگە تيەك ەتتى. «قازاقستان پرەزيدەنتى نۇرسۇلتان نازارباەۆتىڭ ءوز قىزمەتىنە كىرىسكەننەن كەيىنگى العاشقى شەتەلدىك سا­پارى ءبىزدىڭ ەلگە جاسالعانىن ۋكراينا جوعارى باعالايدى. قازاقستان باس­شىسى يادرولىق ەنەرگيانى قاۋ­ىپ­سىز جانە يننوۆاتسيالىق ماقساتتا پايدالانۋ ماسەلەلەرى جونىندەگى كيەۆ سامميتىنە قاتىستى», – دەدى ولەگ لياشكو. سۇحبات بارىسىندا ۋكراينالىق مەيمان جۋىردا سانكت-پەتەربۋرگ قا­لاسىندا  ۋكراينا جوعارعى رادا­سى­نىڭ توراعاسى ۆلاديمير ليتۆينوۆ پارلامەنت ءماجىلىسىنىڭ توراعاسى ورال مۇحامەدجانوۆتى ءوز ەلىنە شا­قىر­عانىن ايتىپ ءوتتى. كەزدەسۋدە باس­قا ماسەلەلەر دە ءسوز بولدى.