پارلامەنت سەناتىندا پالاتا توراعاسىنىڭ ورىنباسارى ا.ءسۋديننىڭ قاتىسۋىمەن «ءوڭىر» دەپۋتاتتىق توبىنىڭ توتەنشە جاعدايلارعا نازار اۋدارۋ ءۇشىن زاڭنامالىق بازانى جەتىلدىرۋ جانە وسى باعىتتاعى مەملەكەتتىك جۇيەنى دامىتۋ ماسەلەسىن قاراعان وتىرىسى بولىپ ءوتتى.
توتەنشە وقيعالار كوبەيىپ, ەلىمىزدىڭ ءار قيىرىندا ادامدارىمىز زارداپ شەگىپ جاتقاندا مۇنداي وتىرىسقا دەگەن قىزىعۋشىلىق ۇلكەن بولارى داۋسىز. سوندىقتان دا وتىرىسقا جۋرناليست قاۋىمى ادەتتەگىدەن كوپ كەلگەن ەكەن. بىراق ماسەلە قىزۋ تالقىلانۋدىڭ ورنىنا جاۋىردى جابا توقىپ, سىلاپ-سيپاۋ كوبەيىپ كەتىپ بارا جاتقان سوڭ, جۋرناليستەر دە وتىرىستىڭ اياعىن توسپاي, تەز تاراپ كەتتى.
ەڭ سوڭعى بولىپ سويلەگەن سەناتور ج.تورەگەلدينوۆ قارالىپ وتىرعان ماسەلەنىڭ اسا كۇردەلى ەكەنىنە نازار اۋداردى. الماتىدا سوڭعى رەت بولعان جەر سىلكىنىسىن ءوز باسىمنان وتكەردىم, دەدى ول. جەردىڭ استىنان الدەقانداي قۇدىرەتتى گۋىل ەستىلىپ, ونىڭ ارتىنان ۇيلەر تەڭسەلىپ, جيھازدار قوزعالعانىن كورگەن كەزدە ادام تابيعات الدىنداعى ءوزىنىڭ دارمەنسىزدىگىن سەزىنىپ, تۇلا-بويىڭدى قورقىنىش بيلەيدى ەكەن. «ساقتانساڭ ساۋ بولارسىڭ» دەگەن بار, سوندىقتان دا بۇل ماسەلەنى تەرەڭىرەك زەرتتەپ, جاڭادان ءورت ءسوندىرۋ دەپولارىن, بيىك ساتىلار دايىنداۋعا ءوز تاراپىمىزدان كومەك بەرىپ, قاراجات بولۋگە ىقپال ەتۋىمىز كەرەك, دەدى ول.
ودان ءارى سەناتور كەيبىرەۋلەردىڭ حالىقتى قاساقانا قورقىتىپ, ۇرەي تۋدىرعىسى كەلگەنىنە نازار اۋدارۋ كەرەكتىگىن ايتتى. ولار كاسىپورىندار مەن مەكەمەلەردىڭ كادرلار بولىمدەرىنە تەلەفون شالىپ, قاتتى جەر سىلكىنىسى بولادى دەپ حابارلاپ, دۇربەلەڭ تۋعىزۋدى ماقسات تۇتقان. ولاردىڭ دا كوزدەگەن ءوز ماقساتتارى بولۋى كەرەك. سوندىقتان وندايلارعا كوڭىل اۋدارماي قالدىرۋعا بولمايدى, كىمدەر ەكەنىن تاۋىپ, ىستەرىنە تەكسەرىس جۇرگىزۋ كەرەك. ال توتەنشە جاعدايلار مينيسترلىگى تاراپىنان ورتالىقتاندىرىلعان اقپارات ورتالىعى جۇمىس ىستەگەنى ءجون, دەي كەلىپ, الەمدىك ءتاجىريبەدەن زىلزالاعا دايىن بولۋ ءۇشىن جاسالاتىن كەيبىر شارالار تۋرالى ايتتى.
ال ءوزىنىڭ بايانداماسىندا ءتوتەنشە جاعدايلار ءمينيسترى ۆ.بوجكو الماتىدا بولعانداي جەر سىلكىنىسى سوڭعى بەس جىلدا 70 رەت تىركەلگەنىن, ودان ەشقانداي قاۋىپ جوق ەكەنىن ايتتى.
شاراعا قاتىسۋشىلار الدىندا سويلەگەن سوزىندە سەنات توراعاسىنىڭ ورىنباسارى ا.سۋدين «ءوڭىر» دەپۋتاتتىق توبىنىڭ ايماقتارداعى الەۋمەتتىك-ەكونوميكالىق ماسەلەلەردى شەشۋگە ءجاردەم بەرۋدە ماڭىزدى ءرول اتقارىپ جۇرگەنىن اتاپ ءوتتى. سەناتورلار يۋ.كۋبايچۋك, ق.يششانوۆ, ج.نۇرعاليەۆ جانە باسقالار توتەنشە وقيعالاردىڭ الدىن الۋ جانە ولاردىڭ زارداپتارىن ازايتۋ, قاۋىپتى نىسانداردىڭ ەسەبىن الۋ مەن باقىلاۋ جونىندەگى وزدەرىنىڭ ويلارىن ايتتى. سەناتور ب.جىلقىشيەۆ جەكەشەگە كوشىپ كەتكەن سۋ قويمالارىن باقىلاۋدىڭ قانداي دارەجەدە ەكەنىن جانە ولاردى مەملەكەتكە قايتارۋ ءىسى قولعا الىنعانىن بىلگىسى كەلگەن ەدى. وعان مينيستر باقىلاۋ جاسالاتىنىن, ءبىراق جەكەشەلەندىرىلگەن م ۇلىكتى قايتادان مەملەكەتكە قايتارۋ مۇمكىن ەمەس ەكەنىن ايتتى.
وتىرىسقا پرەزيدەنت اكىمشىلىگى, ۇكىمەت, «نۇر وتان» حدپ, «رەسپۋبليكالىق داعدارىس ورتالىعى», «ءورت ءسوندىرۋشى» اق وكىلدەرى قاتىستى. جيىن قورىتىندىسى بويىنشا ارناۋلى حاتتاما ازىرلەنىپ, ول توتەنشە جاعدايلار جانە باسقا دا ءتيىستى مينيسترلىكتەر مەن ۆەدومستۆولارعا جەتكىزىلەتىن بولدى.
جاقسىباي سامرات.
