قويشىلار مۇددەسىن قوزعاعان ماقالانىڭ ەڭبەك ءمينيسترىنىڭ كوزىنە ىلىنبەگەنى وكىنىشتى

«ەگەمەن قازاقستاننىڭ» وسى جىلعى 26 ساۋىردەگى نومىرىندە جاريالانعان «ءبىر وتباسى – ءبىر اۋىل» دەگەن ماقالا, شىن­دى­عىنا كەلسەك, الماتى وبلى­سى­نىڭ جامبىل اۋدانىنداعى اق­سەڭ­گىر اۋىلدىق وكرۋگىنە قاراس­تى جايساڭ اۋىلىندا تۇراتىن بۇرىنعى قويشىلار مەلس جانە ماكەن شويىنباەۆتاردىڭ 16 ۇل-قىز ءوسىرىپ, باقىتتى عۇمىر كەشىپ جاتقاندارى تۋرالى سىر شەرتەدى. جاز جايلاۋدا, قىس قىس­تاۋدا ءجۇرىپ-اق 16 با­لانى امان-ساۋ تۋعان ماكەن انادان دا, سول 10 قىز, 6 ۇلدى ەشتەڭەدەن تارىقتىرماي ءوسىر­گەن, ءبارىنىڭ دە ورتا مەكتەپتى بىتىرۋىنە, ماماندىق الۋىنا جاع­داي جاساعان, قىزدارىن ۇزاتىپ, ۇلدارىنا وتاۋ تىگۋىنە قامقور بولعان مەلس اكەدەن دە اينالىپ كەتكەنىمىز ءجون شىعار. ولار ءۇشىن قۋاندىق تا ماقتاندىق. اتتەڭ... بۇلاي دەۋگە سەبەپ ءومىر بويى قوي باعىپ, زەينەتكەرلىككە شىققان مەلس اعامىز­دىڭ اي سايىنعى زەينەتاقىسىنىڭ بار-جوعى 24 مىڭ تەڭگە بولىپ وتىرعاندىعى. ءۇش اي قوي فەر­ما­سىندا كىشى ەسەپشى بولعان, ەكى جىل تىكەلەي قوي باققان ادام رەتىندە دە, ۇلكەن اعاسى ءومىر بويى قوي باعىپ, زەينەتكەرلىككە شىق­قان شوپاننىڭ ءىنىسى, ۇلكەن جەڭ­گە­سى قويدا ءجۇرىپ 10 بالا تۋىپ-ءوسىر­گەن باتىر انانىڭ قاينىسى رەتىندە دە بىلەتىنىم: كەڭەستىك كەزەڭدە دە, تاۋەلسىزدىك تۇسىندا دا زەي­نەتاقى جونىنەن الىس مال جايى­لىمىندا جۇرگەن, اپتاپ ىستىقتا دا, قاقاعان ايازدا دا قويدىڭ كۇ­تىمىن ويلاعان جاندار شەتقاق­پاي كوردى. ارينە, قاي ەڭبەكتىڭ دە ءوز اۋىرتپالىعى بار, بىراق شاحتەرلەر مەن مەتاللۋرگتەرگە, اسكەري­لەر مەن دەپۋتاتتارعا قا­راعاندا شوپاننىڭ ەڭبەگى ءال­دەقايدا جە­ڭىل دەپ كىم ايتا الار ەكەن. ءار ساۋلىق ءۇشىن ايىنا 40 تيىن, ءار بويداق قوي ءۇشىن (توق­تى­دان باستاپ ەتكە وتەتىن بەستى قوي­عا دەيىن) 29 تيىن تولەنەتىن. ءار وتاردا 600 باس قوي بولسا, ساۋلىق باققان ءۇش ادام (شوپان, كومەكشى, كۇزەتشى) 240 سوم, بويداق قوي باققاندار 174 سوم الاتىن. سودان ەسەپتەي بەرىڭىز, مەلس شويىن­باەۆتىڭ قازىرگى 24 مىڭىنا دا, مەنىڭ ۇلكەن اعامنىڭ العاشقى زەي­­نەتاقى رەفورماسىنان كەيىن العان 12 مىڭ تەڭگەسىنە دە تاڭ­دان­بايسىز. بۇگىندە 24 مىڭ تەڭگە ەڭ ءتو­مەنگى زەينەتاقى مولشەرى (جا­سى­ڭىز جەتسىن دەڭىز) ەكەنىن ەسكەرسەك, ءومىر-باقي قوي باعىپ, كورگەن قيىندىعى شاش-ەتەكتەن بولعان مەلس اعانىڭ زەينەتاقىسىن ءبۇ­گىن­دە جاي ءجۇرىپ-اق زەينەت جا­سى­نا جەتكەندەر الاتىنىن ويلاساق, زەينەتكەرلىك رەفورماسى مال باققاندار جاعدايىن ەسكەردى دەپ ايتا الماسىمىز انىق. سوندىق­تان بولار, ماقالا اۆتورى, گازەت­تىڭ الماتى وبلىسىنداعى مەنشىكتى ءتىلشىسى, سول ماقالاسى مي­نيستردىڭ كوزىنە ءتۇسۋىن ايرىقشا كوزدەگەن ەكەن. «وسى ماقالا ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىقالىقوۆا حا­نىم­نىڭ نازارىنا ءتۇسىپ, ەل ىشىندە وتە سيرەك كەزدەسەتىن ەرەن اۋلەتتىڭ يەسى مەلس اعام­نىڭ ءتىپتى كۇلكىلى زەينەت­اقى­سىن قايتا قاراۋعا مۇرىندىق بولار, كىم بىلەدى, ءۇمىتسىز شايتان دەگەن عوي», دەپ ناقتى كورسەتىپتى اۆتور. ءبىزدىڭ دە ايتپاعىمىز وسى. بۇگىندە ءومىر بويى قوي باعىپ, 1998 جىلعا دەيىن زەينەت دەم­الىسىنا شىققاندار ساناۋلى-اق قالدى. ءبىزدىڭ اۋىلدا ەكەۋ-ۇشەۋ عانا... ولاردىڭ زەينەت­اقىلارى مەلس اعانىڭ الاتى­نى­مەن شامالاس. بەينەتتى كورۋ­دەي-اق كورگەن بۇلاردىڭ زەينەتىن كورۋىن ويلايتىن ەڭبەك مينيسترىنەن باسقا كىم بار ەكەن؟ ەرجۇمان سمايىل, زەينەتكەر. استانا.