بەلارۋس پرەزيدەنتى ءدارىس وقىدى

كەشە لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىنە بەلارۋس پرەزيدەنتى الەكساندر لۋكاشەنكو ارنايى اتباسىن بۇرىپ، اتالعان جوعارى وقۋ ورنىنىڭ پروفەسسورلىق-وقىتۋشىلار قۇرامىمەن جانە ستۋدەنتتەرىمەن كەزدەسىپ، جينالعان قاۋىم الىندا ءدارىس وقىدى. كەزدەسۋدى اشقان ۋنيۆەرسيتەت رەكتورى باقىتجان ءابدىرايىم الدىمەن بەلارۋس پرەزيدەنتى، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇرمەتتى پروفەسسورى الەكساندر لۋكاشەن­كو­عا نەگىزى قالانعانىنا 15 جىل تولاتىن قازاقستانداعى جەتەكشى جوعارى وقۋ ورنىنا ارنايى كەلگەنى ءۇشىن العىسىن جەتكىزدى. «ءسىز­دىڭ وقۋ ورنىمىزعا ارنايى كەل­گەنىڭىز – ءبىز ءۇشىن ايرىقشا قۇر­مەت. وسى ورايدا ءسىزدى جاقىندا وتكەن سايلاۋداعى جەڭىسىڭىزبەن قۇتتىق­تاي­مىز. بۇل حالىقتىڭ ءوزى­ڭىزگە دەگەن سەنىمىنىڭ بەلگىسى، سونداي-اق ەلىڭىزدى ىلگەرى جىل­جى­تۋ باعى­تىندا اتقارىپ جاتقان قىز­­مەتىڭىزدىڭ دۇرىستىعىنىڭ ءدا­لەلى دەپ ويلايمىز»، – دەدى رەكتور ءوز سوزىندە. وسىلاي دەي كەلە، ب.ءابدى­را­ي­ىم بەلارۋس مەملەكەتىنىڭ دامۋ جولىنا، وزگە ەلدەرمەن، ونىڭ ىشىندە قازاقستانمەن اراداعى ديپ­لوماتيالىق بايلانىسىنىڭ جىل وتكەن سايىن جاندانىپ كەلە جاتقانىنا توقتالىپ ءوتتى. «ءبۇ­گىندە گۋمانيتارلىق باعىتتاعى ىن­تىماقتاستىعىمىز دا جوعارى دەڭ­گەيدە دامىپ كەلەدى. ل.ن.گۋ­مي­لەۆ اتىنداعى ەۋرازيا ۇلتتىق ۋني­ۆەرسيتەتى بەلارۋس مەملەكە­تى­نىڭ كوپتەگەن جوعارى وقۋ ورىن­دارىمەن، عىلىمي-زەرتتەۋ مەكەمەلەرىمەن، عىلىم اكادەميا­سى­مەن جاقسى ارىپتەستىك قارىم-قا­تى­ناس ورناتقان. بۇل ەكى ەل پرە­زيدەنتتەرىنىڭ جۇرگىزىپ وتىرعان ساياساتىنىڭ جەمىسى»، – دەدى ب.ءاب­دىرايىم بۇل تۋراسىندا. بۇدان كەيىنگى كەزەكتە ول جو­عا­رى وقۋ ورنىنا كەلگەن قۇرمەتتى قوناق، بەلارۋس پرەزيدەنتى الەك­ساندر لۋكاشەنكوعا ءسوز بەردى. «قۇرمەتتى دوستار، سىزدەرمەن بىرگە وسىناۋ ءبىلىم ورداسىندا كەز­دەسىپ وتىرعانىما قۋانىش­تى­مىن. بۇل مەن ءۇشىن دە ۇلكەن قۇرمەت»، – دەپ ءسوزىن باستاعان ول ءوزىنىڭ دارقان مىنەزدى قازاق جەرىنە دوس پەيىلدى بەلارۋس ەلىنەن كەلىپ وتىرعانىن ايتىپ، پرو­فەس­سور­لىق-وقىتۋشىلار قۇرامى مەن ستۋدەنتتەردى جوعارى وقۋ ورنى­نىڭ 15 جىلدىق مەرەيتويىمەن قۇتتىقتادى. «وسى ءبىر از عانا جىل­دار ىشىندە سىزدەردىڭ ۋنيۆەر­سي­تەتتەرىڭىز شىن مانىسىندە قا­زاقستاننىڭ بەدەلدى عىلىم مەن ءبىلىم ورداسىنا اينالىپ ۇلگەردى. بۇگىندە بۇل وقۋ ورنى ەلگە قاجەتتى كاسىبي مامانداردى دايارلاۋ مەن قازاقستاننىڭ عىلىمي الەۋەتىن كوتەرۋگە ايرىقشا ۇلەس قوسىپ كەلەدى»، – دەدى بەلارۋس پرە­زيدەنتى. سونداي-اق، ول ەلور­داداعى جەتەكشى ۋنيۆەرسيتەت پەن بەلارۋس مەملەكەتىندەگى جوعارى وقۋ ورىندارى اراسىندا جوعارى دەڭگەيدە ارىپتەستىك قارىم-قا­تى­ناس ورناتۋ باعىتىندا ۇلكەن باستامالار كوتەرىلگەنىن، عىلىمي-تەحنيكالىق ىنتىماقتاستىقتى كوز­دەيتىن قازاقستاندىق-بەلا­رۋس­تىك ورتالىقتىڭ دا اۋقىمدى جۇمىستار اتقارىپ جاتقانىن تىلگە تيەك ەتتى. «بۇلاردىڭ بار­لىعى ەكى ەل ارىپتەستىگىنىڭ تەك ەكو­نو­مي­كا­لىق تۇرعىدا عانا ەمەس، گۋما­نيتارلىق باعىتتا دا ءورىس­تەگەنىن بايقاتادى»، – دەدى ا. لۋكاشەنكو. ۋنيۆەرسيتەت قابىرعاسىندا ءوت­كەن ءدارىس بارىسىندا ا. لۋكاشەنكو سونداي-اق بەلارۋس ەلىنىڭ تاريحىنا، ءجۇرىپ وتكەن جولىنا، ءتۇرلى كەزەڭدەردە باعىندىرعان اسۋ-بەلەستەرىنە كوز جۇگىرتىپ، ەل­دىڭ قازىرگى دامۋ قارقىنىنا، قوس مەملەكەت اراسىنداعى ىنتى­ماق­تاستىق اۋانىنا قاتىستى دا ءوز وي-پايىمىن جەتكىزدى. سول ار­قى­لى، ول جينالعاندارعا، اسىرەسە، ستۋ­دەنتتەرگە بەلارۋستىڭ وزگەگە ۇقسامايتىن ەرەكشەلىگى مەن ار­تىقشىلىعى جونىندە جان-جاقتى مالىمەت بەردى. ونىڭ ىشىندە قا­زاق­ستان مەن بەلارۋستىڭ گۋماني­تار­لىق، ءبىلىم-عىلىم سالاسىن­دا­عى بايلانىسىن جانداندىرۋ ءۇشىن وقۋ ورىندارى اراسىنداعى تاجىريبە الماسۋلارعا ايرىقشا ءمان بەرىلۋ قاجەتتىگىن دە اتاپ ءوتتى. ءار مەملەكەت ماماندى ءبىرىنشى كەزەكتە، ءوزى ءۇشىن دايىندايدى. ءوز ەلىنە لايىقتى ءبىلىم جۇيەسىن دامىتادى. سول ءۇشىن مەملەكەتتىك بيۋدجەتتەن قارجى بولىنەدى. ال ءار جاس كاسىبي مامان بولۋ جولىندا تالماي ەڭبەكتەنۋى، ىزدەنۋى كەرەك. سوندىقتان ەڭ الدىمەن، قوعامعا قاجەتتى مامان بولىڭىزدار دەگىم كەلەدى»، – دەدى ءسوزىنىڭ قورىتىن­دىسىندا ا. لۋكاشەنكو. بۇدان كەيىن ستۋدەنتتەر قۇر­مەت­تى قوناققا وزدەرىن قىزىقتىر­عان بىرقاتار ساۋالدارىن قويدى. كەزدەسۋ سوڭىندا ۋنيۆەرسيتەت رەكتورى ب.ءابدىرايىم جوعارى وقۋ ورنىنا كەلىپ، وقىتۋشىلار مەن ستۋدەنتتەر الدىندا ءدارىس وقىعانى ءۇشىن جوعارى وقۋ ورنى اتىنان الەكساندر لۋكاشەنكوعا تاعى دا العىسىن جەتكىزىپ، وعان «ەۋرازيا ماقتانىشى» ەستەلىك مەدالىن تابىس ەتتى. ءلايلا ەدىلقىزى.