پاتريوتتىق اندەر بايقاۋى

«نۇر وتان» حالىقتىق-دەموكراتيالىق پارتياسى ماڭعىستاۋ وبلىستىق فيليالى مەن وبلىستىق مادە­نيەت باسقارماسى بىرلەسە ۇيىمداستىرعان «تاۋەلسىز قازاقستانىمدى انگە قوسامىن!» اتتى پاتريوتتىق اندەر بايقاۋى جوعارى دەڭگەيدە ءوتتى. جاس ۇرپاقتىڭ ساناسىنا عاسىرلار بويى ارمانداپ,  قول جەتكىزگەن تاۋەلسىزدىگىمىزدىڭ قادىر-قاسيەتىن ونەر تىلىمەن جەتكىزۋدى ماقسات ەتكەن يگى شارا ەستە قالارلىقتاي بولۋمەن قاتار, وسى تاقىرىپقا ارناپ جازىلعان ءبىراز اسەم اندەردى ومىرگە اكەلدى. قازاقستاننىڭ ەڭبەك سىڭىرگەن قايراتكەرى, بەلگىلى سازگەر-ديريجەر ر.مادرەەۆتىڭ ايتۋىنشا, بۇل بايقاۋدىڭ ناتيجەسىندە انشىلەر شەبەرلىكتەرىن شىڭداپ, جەرگىلىكتى سازگەرلەر قاتارى دا كوبەيە تۇسكەن. مۋزىكانى ارلەپ, نارلەپ جەتكىزۋدە دە جەتىستىكتەر بايقالىپتى. سونىڭ ءبىر دالەلىندەي, سازگەرلەر نوميناتسياسى بويىنشا ەل ارا­سىنان كەلگەن ب. ءنادىروۆ ءبىرىنشى, س. نۇرعوجاەۆ ەكىنشى ورىندى يەمدەنىپتى. تاعى  بىر قۋانىشتى جايت, سازگەرلەر اراسىنان جۇلدەگەر اتانعاندار قاتارىنا ت.ۇسەنوۆا, ا.ابدىرازاقوۆا, م.بالجانوۆا سياقتى قىز-كەلىنشەكتەر قوسىلعان. ۆوكال نوميناتسياسى بويىنشا باس جۇلدەگە ب.رەتباەۆ, ءبىرىنشى-ەكىنشى ورىندار ءا.بولەكباەۆ پەن ت.جاقىپوۆ, ا.بەرىككە بۇيىرىپتى. ەل تاۋەلسىزدىگىنىڭ 20 جىلدىعىنا ارنالعان ونەر بايقاۋىنا قاتىس­قان­داردىڭ ءبارى دە ارنايى سىيلىقتارعا يە بولىپ, العىس حاتتارمەن ماراپاتتالدى. جولامان بوشالاق. اقتاۋ.