ولار بيىلعى كوكتەمدە تاسقىن سۋدان زارداپ شەككەن زەلەنوۆ, تاسقالا اۋداندارى مەن ورال قالاسى تۇرعىندارىمەن كەزدەستى. – ەل حالقىنىڭ بىرلىگى تاسقىن سۋ كەزىندە دە ايقىن كورىندى. باتىسقازاقستاندىقتارعا بۇكىل رەسپۋبليكا جۇرتشىلىعى كومەك قولدارىن سوزدى. ەڭبەك ۇجىمدارى ارنايى اشىلعان ەسەپ-شوتقا ءبىر كۇندىك جالاقىلارىن اۋداردى. بۇل تۇرعىدا اسسامبلەيانىڭ ۇلەسى –20 ميلليون تەڭگە, – دەدى كەزدەسۋ كەزىندە ەرالى لۇقپان ۇلى.
تەمىر قۇسايىن. باتىس قازاقستان وبلىسى.
بىلىكتى مامان ەلدى وركەندەتەدى. ەلىمىزدە يندۋستريالىق باعىتتاعى جوبالاردى ىسكە اسىرۋ الدىمەن كادر دايىنداۋ ماسەلەسىمەن ساباقتاسا ءوربيدى. بۇل ماسەلە وتكەن اپتادا اتىراۋ مۇناي جانە گاز ينستيتۋتىندا «مۇناي جانە گاز كەشەنى ينفراقۇرىلىمىنىڭ يندۋستريالانۋى جانە دامۋى» تاقىرىبىنداعى ايماقتىق كونفەرەنتسيانىڭ نەگىزگى وزەگىنە اينالدى. كونفەرەنتسيادا ينستيتۋت رەكتورى ت.سەرىكوۆ مۇناي-گاز ونەركاسىبىنە وتاندىق ماماندار دايىنداۋدىڭ ماڭىزدىلىعىنا توقتالا كەلىپ, «قازاقستاندىق جوعارى وقۋ ورىندارىن بىتىرگەن جاستارىمىز بىلىكتىلىگىن ۇدايى كوتەرۋى قاجەت. ويتكەنى, باسەكەگە قابىلەتتى ەل بولۋ ءۇشىن ماماندارىمىز دا باسەكەگە توتەپ بەرەرلىكتەي بىلىكتىلىك تانىتۋى ءتيىس», دەگەن پىكىرىن ءبىلدىردى. ەكونوميكانىڭ ءار سالاسىن وركەندەتۋ, اسىرەسە بىلىكتى ماماندار دايارلاۋمەن بايلانىستى بولاتىنىنا توقتام جاسالدى.
جولداسبەك شوپەعۇل. اتىراۋ وبلىسى.
«انا مەن بالا» اللەياسى اشىلدى. قازاقستان تاۋەلسىزدىگىنىڭ 20 جىلدىعىندا دۇنيەگە كەلگەن كوكشەتاۋلىق سابيلەر ەندى ءبىر ونشاقتى جىلدا اتا-انالارى وتىرعىزعان اق قايىڭدار جەلەگىنە بولەنگەن «انا مەن بالا» اللەياسىندا دۋمانداتىپ سەرۋەندەيتىن بولادى. جۋىردا پايدالانۋعا بەرىلگەن 170 توسەك-ورىندىق پەرزەنتحانا ماڭىندا ورنالاسقان وتباسى ساياباعىنىڭ اشىلۋى قالالىقتاردىڭ جارقىن مەرەكەسى رەتىندە ءوزىنىڭ ءداستۇرلى ساباقتاستىعىن جالعاستىرماق. سالتاناتقا جاڭا بوسانعان ون انا قاتىسىپ, وبلىس اكىمى سەرگەي دياچەنكونىڭ قولىنان وزدەرى وتىرعىزعان تالشىبىقتاردىڭ اتاۋلى سەرتيفيكاتىن الدى. سونداي-اق, بۇل ەرەكشە شاراعا قالانىڭ قۇرمەتتى ازاماتتارى, «جاسىل ەل» توبىنىڭ مۇشەلەرى قاتىستى.
باقبەرگەن امالبەك. اقمولا وبلىسى.
وتتى جىلدار تاعىلىمى. ۇلى وتان سوعىسىنا وڭتۇستىكتەن 140 مىڭنان استام ەر-ازامات اتتانىپ, سونىڭ جارتىسىنا جۋىعىنىڭ سۇيەگى مايدان دالاسىندا قالدى. سۇراپىل سوعىس سالعان جارانىڭ ورنى مىڭداعان جۇرەكتەردەن وشپەك ەمەس. ەر ەسىمى ەل ەسىندە. جەڭىس كۇنى مايدانگەرلەر “داڭق” مەموريالىنداعى “ماڭگىلىك الاۋعا” گۇل شوقتارىن قويدى. سالتاناتتى ميتينگ ءوتتى. كەشقۇرىم مەرەكە ء“شامشى اللەياسىندا” مەرەكەلىك كونتسەرت پەن وتشاشۋعا ۇلاستى.
باقتيار تايجان. شىمكەنت.
ەشكىم دە, ەش نارسە دە ۇمىتىلمايدى. قىزىلوردا قالاسىنىڭ «تاعزىم» الاڭىندا ۇلى جەڭىستىڭ 66 جىلدىعىنا وراي سالتاناتتى شەرۋ ءوتتى. «ەرلىك كوكتەمى» اتتى ساحنالىق كورىنىسپەن شىمىلدىعىن اشقان شەرۋگە ايماقتاعى ارداگەرلەر, تىل ەڭبەككەرلەرى, اۋعان سوعىسىنىڭ ارداگەرلەرى قاتىستى. جاس ۇرپاققا ۇلگى-ونەگە بولارلىق اڭگىمەلەر ايتىلىپ, سۇم سوعىستىڭ قاسىرەتى تۋرالى كورىنىستەر كورسەتىلدى. ادامنىڭ ساي-سۇيەگىن سىرقىراتار اۋەنمەن ارلەنگەن كورىنىستەر كوزگە جاس ءۇيىردى. اعا بۋىننىڭ وتان ءۇشىن وت كەشكەن جىلدارى شىنايى تۇردە بەدەرلەندى. ونان سوڭ, جەتى سارباز «تاعزىم» مونۋمەنتىنە داڭق گريلياندياسىن اكەلىپ قويدى. وبلىستاعى بارلىق مەكەمەلەر اتالار ارۋاعىنا ءمىناجات ەتىپ, الاڭدى گۇل شوقتارىمەن كومكەردى.
ەرجان بايتىلەس. قىزىلوردا وبلىسى.
ءتىس دارىگەرلەرى اۋىلدارعا بارادى. وبلىس اۋداندارىن ارالاۋعا شىققان جىلجىمالى ستوماتولوگيالىق كابينەت الدىمەن قوستاناي قالاسىنىڭ ىرگەسىندەگى زاتوبول كەنتىنە توقتادى. كولىكتىڭ ىشىنە مەديتسينانىڭ وسى سالاسىنداعى زاماناۋي قۇرال-جابدىقتار ورنالاستىرىلعان. ستوماتولوگتاردىڭ مالىمەتىنشە, وبلىستاعى 18 جاسقا دەيىنگى بالالاردىڭ 60-80 پايىزى ءتۇرلى دەڭگەيدەگى ءتىس اۋرۋىنا شالدىققان. جىلجىمالى كلينيكانىڭ اۋىلعا كەلۋى تۇرعىندارعا وتە ءتيىمدى ەكەنىن كورسەتتى. ويتكەنى, اۋىلدى جەرلەردىڭ بارلىعىندا بىردەي ستوماتولوگيالىق كابينەت جوق. اۋدان ورتالىقتارىندا بولعانمەن, ولاردا مامان دا, قۇرال-جابدىقتار دا جەتىسە بەرمەيدى. ال ءبىر قوستاناي اۋدانىنىڭ وزىندە 400-دەن استام بالا ءتىس اۋرۋىمەن تىركەۋدە تۇر. ءتىس دارىگەرلەرى ءار ەلدى مەكەندە 20 كۇن تۇراقتاپ, اۋىل بالالارىنا ستوماتولوگيالىق قىزمەت كورسەتەتىن بولادى.
ءنازيرا جارىمبەتوۆا. قوستاناي.
جەتى وقۋشى جۇلدەمەن ورالدى. وسكەمەن قالاسىنىڭ جەتى بىردەي وقۋشىسى چەح رەسپۋبليكاسىنىڭ استاناسى – پراگا قالاسىندا وتكەن حالىقارالىق وليمپيادادان جۇلدەمەن ورالدى. جالپى ءبىلىم بەرەتىن پاندەر بويىنشا ولاردىڭ بارلىعى ەۋروپا مەملەكەتتەرىندەگى وقۋشىلارمەن تەڭ دارەجەدە باق سىناسىپ, تەرەڭ ءبىلىم العاندارىن دالەلدەدى. №38 مەكتەپ-گيمنازيانىڭ 11 سىنىپ وقۋشىلارى توعجان تويباعاروۆا, دارينا ياكوۆلەۆا, قازاق-تۇرىك ليتسەيىنىڭ 11 سىنىپ وقۋشىسى تالعات ۋاتحانوۆ ءبىرىنشى ورىندى, №39 ورتا مەكتەپتىڭ جوعارى سىنىپ وقۋشىلارى دياس قامبارحانوۆ ەكىنشى ورىندى يەلەندى. اتى اتالعان شاكىرتتەردىڭ بارلىعى «التىن بەلگىگە» ۇمىتكەرلەر.
وڭداسىن ەلۋباي. وسكەمەن.
